ئەم هەموو بزاڤان دکەین داکو بەرەڤانیێ ژ مافێن هونەرمەندان بکەین
ئەڤرۆ، بێوار حەمدی:
بەرپرسێ سەندیکا هونەرمەندان تایێ زاخۆ بۆ ڕۆژناما ئەڤرۆ دیارکر کو بۆ دەمێ پێنج سالایە ئەو وەکو بەرپرسێ سەندیکایێ دەست بکاربوویە و گۆت: ئەم هەموو بزاڤان دکەین کو بەرەڤانیێ ژ مافێن هونەرمەندان ب گشتی بکەین ژبەرکو ئەم ڤێ چەندێ ب ئەرکێ خوە دبینین.
دلێر کامیران، بەرپرسێ سەندیکا هونەرمەندان تایێ زاخۆ گۆت: هەتا نوکە ئەم وەکو نڤیسینگەھ کاردکەین و گرێدای سەندیکا هونەرمەندێن پارێزگەها دهۆکێ ینە و هێشتا نەبووینە سەربەخۆ لێ ژبەرکو زاخۆ بوویە ئیدارەیەکا سەربەخۆ ل نێزیک ئەم ژی دێ سەربەخۆ بین، پتری 200 هونەرمەندان ب هە موو بەشێن هونەری ڤە دگەل مە ئەندامن، لێ بەردەوام گوهۆڕین دهێنەکرن و ئەندامێن مە بەرەڤ زێدەبۆنێ دچن و ئەم هەمی بزاڤا دکەین بەرەڤانیێ ژ مافێن وان بکەین.
دلێری دبەردەوامیا ئاخفتنا خوە دا گۆتژی، بێگۆمان مەرجێن وەرگرتنا ئەندامان ل هەمی تایێن سەندیکایێ ل کوردستانێ وەکو ئێکن و ژوان مەرجان ژی ( دڤێت هەشت بەرهەمێن پێش چاڤ هەبن دگەل 10 سالێن خزمەتکرنێ ب داتا وبەڵگەڤە) ئەڤە ددەمەکی دایە کو بنیاتێ کارێ مە بەرەڤانیە ژ مافێن هونەرمەندان ژ بەرکو گەلەک ژ هونەرمەندان ژ تەخەکا هەژارن لەوما مە داخواز ژحکومەتێ کر کو هاریکاریا وان بهێتە کرن و پشتی کۆژمێ 100 ملیون دیناران بوومە هاتیە تەرخانکرن مە ل سەر وان بەلاڤکرن.
ل دووماهیێ ژی بەرپرسێ سەندیکایێ دا زانین، ئەو هونەرمەندێن کو نە ئەندام دگەل سەندیکایێ مە ماف هەیە سکاڵایێ لسەر تۆماربکەین و وان براوەستینین، لێ مە نەڤێت ڤێ چەندێ دگەل کوڕێن باژێرێ خوە بکەین، لەوما داخوازێ ژوان دکەین کو ژیاسایێن هونەری دەرباز نەبن وئەم ژی بزاڤان دکەین بکەینە ئەندام دگەل خوە.
