دەست ب قەرەبووكرنا كوردێن سنۆرێ پارێزگەها نەینەوا هاتە كرن
پشتی حەفت سالان ژ راوەستیانێ، دوهی 27/7/2025 دەست ب پرۆسەیا قەرەبووكرنا خێزانێن كورد یێن سنۆرێ پارێزگەها نەینەوا هاتە كرن، كو ل سەردەمێ ڕژێما بەعس ل سەر جه و مالێن وان هاتبوونە دەرئێخستن.
سیروان ڕۆژبەیانی، جێگرێ ئێكێ یێ پارێزگارێ نەینەوا، بۆ رۆژناما ئەڤرۆ دیار كر، د گەرا ئێكێ دا حكومەتا ئیراقێ ڕازیبوون ل سەر مەزاختنا چەكێ پارەیێ قەرەبووكرنێ بۆ 175 خێزانێن كورد دایە و گۆت: «دوهی دەست ب بەلاڤكرنا وان هاتە كرن، ل دووڤ ماددەیێ 140 یێ دەستووری، هەر خێزانەكا ئاوارە 10 ملیۆن دیناران و عەرەبێن هاوردە ژی دێ 20 ملیۆن دیناران وەكو قەرەبوو وەرگرن».
گۆتژی: «ب چەندین قووناغان، هەموو ئەو خێزانێن كورد یێن دكەڤنە سنۆرێ ماددەیێ 140، دێ هێنە قەرەبووكرن و د گەرا دویێ دا، پتری 170 خێزانێن دیتر دێ هێنە قەرەبووكرن، هەروەسا مە چەند لژنە پێكئینابوون، داكو خێزانێن كوردێن سنوورێ پارێزگەها نەینەوا، ل جهێن ئەو لێ د ئاكنجی، ل پارێزگەهێن هەرێما كوردستانێ، مامەلەیێن خۆ تەمام بكەن و ب تنێ بۆ وەرگرتنا پارەیی سەردانا نڤێسینگەهێن مە بكەن».
سیروانی زێدەتر گۆت: «د ناڤبەرا سالێن 2007 هەتا 2014ێ، نڤیسینگەها نەینەوا یا ماددەیێ 140 بەردەوام بوو د قەرەبووكرنا ئەوان خێزانێن ل سەردەمێ ڕژێما بەعس بۆ هندەك دەڤەرێن دیتر هاتینە ڤەگوهاستن، لێ ژ بەر شەڕێ داعشێ و چەندین ئەگەرێن دی، ئەڤ پرۆسەیە ل سالا 2014 هاتبوو راوەستاندن».
