هەلبژارتیێ باسكێت بۆلا ئیراقێ بەر ب قەتەرێ چوو
قەیس وەیس:
ل شەڤا دەربازبوویی هەلبژارتیێ باسكێت بۆلا ئیراقێ بەر ب وەلاتێ قەتەر بڕێكەڤت ژبۆ پشكداریێ د قارەمانیا لۆسێل یا نێڤدەولەتی دا كەت خوە بەرهەڤكرن بۆ هەڤڕكیێن كۆپا ئاسیا 2025ێ ئەوا بڕیارە دێ ل جەدە یا سعۆدیێ هێتە كرن، دناڤا پێكهاتیێ ئیراقێ دا بتنێ یاریزانەكێ كوردستانی دگەل دایە
د داخویانیەكا عقێل نەجم هاریكارێ ڕاهێنەرێ هەلبژارتیێ ئیراقێ بۆ دەزگەهێن ڕاگەهاندنێ گۆت: پشتی كەمپێ سەركەڤتی یێ باژێرێ ئیلۆا یا توركی ب دووماهی هاتی و دو یاریێن هەڤالینی دگەل هەلبژارتیێن سعۆدیێ و تونس كرین، ل شەڤا دەربازبووی شاندێ هەلبژارتیێ ئیراقێ ل شەڤا دەربازبوویی بەر ب وەلاتێ قەتەر چوو ژبۆ پشكداریێ د قارەمانییا لۆسێل یا چوارێنی دا كەت كو هەر ئێك ژ وەلاتێن قەتەر، چاپان و سعۆدیێ و ئیراق پشكدارن، ئەڤ قارەمانییە نێڤدەولەتییە و ڤەكرییە و سالانە هێتە كرن، پشكدارییا مە ژی بۆ خوە بەرهەڤكرنە بۆ كۆپا ئاسیا 2025ێ ئەوا بڕیارە ل باژێرێ جەدە یێ سعۆدیێ بهێتە كرن.
هەروەسان ناڤهاتی گۆت: شاندێ هەلبژارتیێ مە پێكهاتییە ژ 12 یاریزانان ب سەرپەرشتییا ڕاهێنەر ڤازلین ماتێچ، ل كەمپێ ڕاهێنانێ مە پشت بەستن ل سەر بلندكرنا ئاستێ یاریزانان و لێكنێزكبوونا وان، دیسان باشتكرنا لایەنێن هێلا بەرەڤانیێ و هێرشبەریێ، قارەمانییا لۆسێل تاقیكرنەكا بهێزە بۆ تیما مە بەری كۆپا ئاسیا.
بۆ زانین دیار ئەحمەد یاریزانێ ڕەڤەندا كورد ل ئۆرۆپا تاكە یاریزانێ كوردستانییە دناڤ ڕێزێن تیما ئیراقێ دا، پێشتر كوڕێ باژێرێ دهۆكێ فەرید رەعدی ژبەر ئەگەرێن تایبەت و محەمەد عەلی كوڕێ باژێرێ زاخۆ ژبەر هنگاڤتنێ لێبۆرین خواست بوون.
