هارۆنی گرێبەستا خوە نووكر و موهەنەد نێزیكی یانەیا زاخۆ بوویە
پرۆسێسا ئیمزاكرنا گرێبەست و نووكرنا گرێبەستێن یاریزانان دناڤا یانەیێن كوردستانی و ئیراقی دا بەردەوامن ئەوێن بەرهەڤییا بۆ وەرزێ نوو یا خولا ستێرێن ئیراقێ 2025-2026ێ دكەن، هەر بۆ زانین گرێبەستێن یاریزانان د خولەكان دا دهێنە ڕاگەهاندن و گوهۆڕین پەیدا دبن ئەڤە دووماهی پێزانین ژ نێڤسیا بابەتی.
دهۆكێ لڤینێن باش كرینە
یانەیا دهۆك ب هوشیاری دووڤچوون و ئیمزاكرنا گرێبەستێ دگەل یاریزانێن نوو دكەت، ژ گرنگترین پێنگاڤا یانەیێ هاڤێژتی كو بوویە دلخوەشییا هەموو جەماوەرێ یانەیێ بۆ وەرزەكێ دی ژی ستێرا یانەیێ هارۆن ئەحمەد مانا خوە دگەل دهۆكێ درێژكر، سەرباری هەبوونا گرێبەستێن گران بوها تایبەت یێن یانەیێن بەغدایی، هەروەسان ل دووڤ دەنگۆباسێن هاتینە بەلاڤكرن گۆلپارێزێ یانەیا نەفت یا بەغدایی عەلی یاسین پەیوەندی ب یانەیا دهۆكێ كرییە، هەروەسان دگەل یاریزانێ بەرگێرییا یانەیا دیالا سەدیق جەمال گەهشتییە ڕێكەڤتنێ، هەر د بزاڤێن یانەیا دهۆكێ نێزیكی ئیمزاكرنا گرێبەستێ دگەل یاریزانێ هێلا بەرەڤانیێ یێ یانەیا كەربەلا یێ یەمەنی ئەحمەد وەجی ئەوێ لایێ چەپێ یاریێ دكەت، د رۆژێن بهێت دا دبیت هندەك گرێبەستێن دی بهێنە ئیمزاكرن و نووكرن، دیسان دهێتە گۆتن كو گۆلپارێزێ دهۆكی و یانەیا هەولێرێ دلۆڤان مەهدی گرێبەستا یانەیا دهۆكێ ئیمزابكەت.
زاخۆ گۆلكەرێ خولێ دڤێت
ژلایێ خوەڤە یانەیا زاخۆ ژی یا بەردەوامە ل سەر دووڤچوون و ئینانا یاریزانێن نوو بۆ وەرزێ بهێت ئەوێن دێ بۆ جارا ئێكێ د دیرۆكا خوە دا پشكداریێ د قارەمانیەكا دەرڤە داكەن ئەوژی كۆپا كەنداڤی یە، ل دووڤ دەنگۆباسێن هاتینە بەلاڤكرن یانەیا زاخۆ یا دانۆستاندنێ دگەل هێرشبەرێ یانەیا شورتە و هەلبژارتیێ ئیراقێ موهەنەد عەلی یێ ناسیار ب میمی دكەت، هەرچەندە یانەیا شورتە دەست ژێ بەرنادەت لێ ئۆفەرا زاخۆ یا بلند دبیت میمی ڕازیبكەت، ژلایەكێ دووڤە زاخۆ یا بزاڤێ دكەت ستێرێ خوە یێ ئوردنی محەمەد ئەبو حەشیش ڕازیبكەت ل سەر بڕیارا خوە لێڤەبیت ئەوێ چوویە دناڤ ڕێزێن یانەیا ئەلگەرمە دا، ژلایەكێ دووڤە لدووڤ دەنگۆباسان هەتا چار یاریزانێن دنوكە دا دانۆستاندنێ دگەل یانەیا زاخۆ دكەن.
یانەیێن ئیراقی ژی گرێبەستان ئیمزادكەن
بفەرمی هێرشبەرێ هەلبژارتیێ ئیراقێ ئەیمەن حسێن ب كۆژمەیێ ملیارەك و 300 ملیۆن دیناران گرێبەستا یانەیا ئەلگەرمە ئیمزاكریە، یانەیا زەورا یا بەغدایی گرێبەستا هەر ئێك ژ عومەر نوری و ئەمیر عەبدوللا ئیمزاكر، یانەیا ئەمانەت بەغدا گرێبەستا كوڕێ پارێزگەهێ شەعبان مەحموود ئیمزاكر، ژلایێ خوەڤە یانەیا مووسل ئەوە نوو هاتیە خولا ستێرێن ئیراقێ گرێبەستا هەر ئێك ژ مەهدی هاشم، موڕتەزا جەمال، سامر موحسن، یاسر ناجی، رامی عەلی ئیمزاكرن، هەروەسان هەردی سیامەند یاریزانێ هەولێرا پایتەخت و یانەیا ناسرییە نێزیكی نووكرنا گرێبەستا خوەیە.
