دەرچۆیا كولیژا ئەندازیاری یە و كەڤالان چێدكەت
هێلین سالم:
شێوەكار (مەستان ئحسان) كو خەلكا پارێزگەها سلێمانیێ یە، لێ چەند سالن ل پارێزگەها دهۆكێ دژیت، د دیدارەكێ دا بۆ رۆژنامەیا ئەڤرۆ گۆت: دەمێ ئەز ل قوتابخانێ من گەلەك حەزژ وانەیا هونەری دكر و ماموستایێن من ئەز هانددام كو یا بەردەوامبم و سالانە ل پێشانگەهێن قوتابخانێ پشكداربووم و هەتا نوكە یا بەردەوامم و ب كەڤالێن ئەز چێدكەم یا دلخۆشم.
هەروەسا گۆت: پشتی ناڤێ من ل كولیژا ئەندازیاری دەركەفتی ژبەر خواندنێ بۆ دەمەكی ژ كەڤال چێكرنێ دووركەفتم، لێ پشتی من زانكۆ ب دووماهی ئینای جارەكا دی بهێز ڤەگەڕیام و كەڤالێن ئەز چێدكەم دەربڕینێ ژ سرۆشتێ جوانێ كوردستانێ و گەلەك بابەتێن دی دكەم، بۆ زانین من بۆ خوە ل مالپەرەك ل ئینستیگرامی ڤەكر و كەڤالێن خوە تێدا نیشادان و بڤی رەنگی خەلكەكی دیتن و داخوازا كڕینێ ژمن كرن، بۆ كەڤالێن خوە ئەز رەنگێن (ئەكریلیكی و زەیتی) بكار دئینم و بۆ كارەكێ سەركەفتی مەرج نینە مرۆڤ یێ ئەكادیمی بیت، چنكو ئەز دەرچۆیا كولیژا ئەندازیاری مە و خوە دچێكرنا كەڤالان دا دبینم، بۆ زانین ئەز گەلەك داخبارا كەڤالێن شێوەكارێ مەزن (ڤان كۆخ) مە و هیڤی خوازم پتر گرنگی ب شێوەكاران بهێتە دان، چنكو مە ل كوردستانێ شێوەكارێن گەلەك باش هەنە.
