جەهەپە و دەم پارتی رۆلێ سەرۆك بارزانی د پشتەڤانییا پرۆسەیا ئاشتیێ دا ل توركیا بلند د هەلسەنگینن
د. هێمن هەورامی، ئەندامێ مەكتەبا سیاسی و بەرپرسێ پشكا رێكخستنا پارتی دیموكراتی كوردستانێ ل ئەنقەرە جودا ل گەل جێگرێ سەرۆكێ جەهەپە و شاندەكێ دەم پارتی كۆمبوو.
د. هێمن هەورامی، ل ئەنقەرە سەرەدانا بارەگەهێ سەرەكی یێ پارتییا گەل یا كۆماری (جەهەپە) كر و ل گەل نامق تان، جێگرێ سەرۆكێ جەهەپە و بەرپرسێ هەڤبەندیێن دەرڤە و پەرلەمانتار سەزگین تانریكولو نوونەرێ جەهەپە ل كۆمسیۆنا تایبەت یا پەرلەمانێ توركیا بۆ چارەسەرییا پرسا كوردی كۆمبوو.
ل دەستپێكا دیدارێ د. هێمن هەورامی، سلاڤ و رێزێن سەرۆك مەسعود بارزانی و سەركردایەتییا پارتی گەهاندە پارتییا گەل یا كۆماری (جەهەپە)، هەڤدەم ل سەر دووماهی پێشهاتێن پرۆسەیا ئاشتیێ و چارەسەرییا دیموكراسییانەیا پرسا كوردی ل توركیا و چەكدانانا پەكەكێ ، هووركاریێن پشتەڤانییا هەلوەستێ سەرۆك بارزانی و پارتی بۆ رۆهنكرن.
هەر د وێ دیدارێدا، نامق تان، جێگرێ سەرۆكێ (جەهەپە) رۆلێ مەزن و دیار یێ سەرۆك بارزانی و پارتی و هەرێما كوردستانێ د پشتەڤانییا پرۆسەیا ئاشتیێ و چارەسەرییا دیموكراسییانەیا پرسا كوردی بلند هەلسەنگاند و هەلوەستێ پارتا خوە بۆ پێنگاڤێن نوكە و داهاتی شرۆڤەكر، هەروەسا پێنگاڤێن ب هێزتركرنا هەڤبەندیێن هەردو ئالییان هاتنە گەنگەشەكرن.
هەر ل ئەنقەرە د. هێمن هەورامی، ئەندامێ مەكتەبا سیاسی و بەرپرسێ پشكا رێكخستنا پارتی دیموكراتی كوردستان، سەرەدانا ئۆفیسا سەرەكی یا (دەم پارتی) كر و ل گەل گولستان كیلیچ، جێگرا سەرۆكێ فراكسیۆنا دەم پارتی و ئەنداما كۆمسیۆنا تایبەت یا پەرلەمانێ توركیا بۆ پرسا چارەسەریێ و ئاشتیێ و پەرلەمانتارێ وانێ زولكوف ئوجار كۆمبوو.
ل دەستپێكا دیدارێ د. هێمن هەورامی، ب هووری بۆچوون و سەرنج و سیاسەتا پارتی ل سەر پرۆسەیا ئاشتیێ و چارەسەرییا دیموكراتی و دانوستاندنێن ڤێ قۆناغێ و پێنگاڤێن بەر ب پێشڤەبرنا دووماهی ئینانێ ب شەڕی و توندوتیژیێ و ڤەكرنا سیاسی و قانوونی بۆ چارەسەرییا بنەڕەتی یا پرسا كوردی ل توركیا بەرچاڤكر.
هەر د وێ دیدارێدا، هەردو ئالییان هزر و بۆچوون ل دۆر هەلسەنگاندنا پێشڤەچوونان و ئاستەنگان و پێنگاڤێن داهاتی لێكگوهارتن.
گولستان كیلیچ، حێگرێ سەرۆكێ فراكسیۆنا دەم پارتی، پێنگاڤ و كارێن كۆمسیۆنا پەرلەمانی بەرچاڤكر و گەلەك سوپاسگوزارا رۆلێ سەرۆك بارزانی و پارتی بوو بۆ پشتەڤانییا ڤێ پرۆسەیێ.
