دو مۆدێلێن نوو یێن زیرەکییا چێكری ب بهایەکێ کێم
ئه‌ڤرۆ، سندس سالح:
مایکرۆسۆفت دەست ب بەرهەمئینانا دوو مۆدێلێن ناڤخۆیی یێن زیرەکییا چێكری کریە ب کوالیتەیەکا بلند و بهایەکێ کێم، دا کو بشێت پێشبڕکێیێ د گەل GPT-5 و دیپ سیک بکەت کو د ڤی واری دا پێشەنگن.
ئەڤ پێنگاڤە د دەمەکی دا هات کو پێشبڕکییا د بوارێ زیرەکییا چێكری دا گەلەک گەرم بوویە و کۆمپانیێن مەزن هەوڵ ددەن پێشکەفتنێن بەردەوام بکەن بۆ بدەستڤەئینانا بازاری.
مۆدێلێ دەنگی یێ مایکرۆسۆفتێ تایبەتمەندییەکا گرنگ هەیە، ئەو ژی ئەوە کو ب تنێ پێدڤی ب ئێک کارتا گرافیکێ هەیە بۆ كاركرنێ، ئەڤ چەندە دێ بهایێ بکارئینانێ گەلەک کێم کەت.
ئەڤ مۆدێلە دێ د خزمەتێن وەکو «کۆپایلۆت دەیلی» دا هێتە بکارئینان، ئەڤە ژی دێ بیتە ئەگەرێ باشتربوونا کارایی و کێمکرنا مەزاختیان.
کۆمپانیا مایکرۆسۆفت ژ بۆ گەهشتنا ئارمانجێن خوه د وارێ زیرەکیا چێكری دا، بەرنامەكێ ستراتیژی یێ پێنج سالان دانایە. ئارمانجا سەرەکی ژ ڤێ بەرنامەیێ گەهشتنا سەربەخۆیێ یە د وارێ تەکنۆلۆژیا زیرەکیا چێكری دا، سەرەڕای کو نوکە مایکرۆسۆفت پشتبەستنێ ل تەکنیکێن «ئۆپن ئەی ئای» دکەت.
بسپۆرێن وارێ تەکنۆلۆژیایێ دبێژن کو ئەڤ پێنگاڤە ژ لایێ مایکرۆسۆفتێ ڤە دێ بیتە ئەگەرێ گوهۆڕینێن مەزن د بازارێ زیرەکیا چێكری دا، چونکو پێشکێشکرنا خزمەتێن بەرفرەهـ ب بهایێن گونجایی دێ ئاستەنگێن بەردەوام بکارئینانا بەرفرەهـ یا ڤێ تەکنۆلۆژیایێ ژ ناڤ بەت.
هەروەسا مایکرۆسۆفت كار دكه‌ت کو سیستەمێن خوه باشتر بکەت دا کو د شیان دا بیت خزمەتێن خوه بۆ کۆمپانیێن بچووک ژی پێشکێش بکەت، نە ب تنێ بۆ کۆمپانیێن مەزن. ئەڤە ژی دێ بیتە ئەگەرێ بەلاڤبوونا زێدەتر یا زیرەکییا چێكری د کەرتێن جودا جودا دا.
جهێ ئاماژەیێ یە کو مایکرۆسۆفت وەبەرهێنانەکا مەزن د وارێ زیرەکیا چێكری دا کریە و هەڤکارییەکا ب هێز د گەل «ئۆپن ئەی ئای» هەیە، لێ د ڤێ پێنگاڤا نوو دا دیار دبیت کو دخوازیت هێدی هێدی سەربەخۆیێ ب دەست خوه ڤە بینیت.
