د هەلبژارتنێن داهاتی دا پارتی بێی هەڤڕك دێ بیتە سەركەفتییا ئێكێ
دیدار/ دلۆڤان ئاكرەیی
ئەندامەكێ كۆمیتەیا ناڤەندییا پارتی دیموكراتی كوردستان و هاریكارێ مەكتەبا رێكخستنا پارتی ل پارێزگەها هەولێرێ راگەهاند: پارتی حزبەكا رەسەنە و ژ ناڤا خەباتا نەتەوەیی و شۆڕشا رزگاریخوازدا هاتیە.
چیا مەحەمەد هەركی، ئەندامێ كۆمیتەیا ناڤەندییا پارتی دیموكراتی كوردستان وهاریكارێ مەكتەبا ڕێكخستنا پارتی ل پارێزگەها هەولێرێ ل دۆر رۆلێ تاكەكەس و پرسا هەلبژارتنان بۆ رۆژنامەیا (ئەڤرۆ) گوت» هەلبژارتن بنەمایەكێ گرنگ و سەرەكی یێ سیستەمێ دیموكراسییە، هەر وەلاتەكێ سیستەمێ حوكمڕانیا وی دیموكراسی بیت و چەند سالان جارەكێ هەلبژارتنەكا ئازادانە و پاقژ تێدا نەهێتە كرن، ئەم نەشێین بێژین ئەو وەلات، پێگیری وی سیستەمێ حوكمڕانیێ یێ دیموكراسییە.
چیار هەركی گوت ژی» هەلبژارتن پرۆسەیەكە كو تێدا تاك ب ئازادانە دەنگێ خوە ددەتە وان پارت و بەربژارێن كو قانوونێن وی وەلاتی مافێ پشكدارییا سیاسی و خوەبەربژاركرنێ دایێ ، ئەو وان پارت و بەربژاران هەلدبژێرن یێن باوەریا وان پێ هەی كو دشێن بەرگریێ ژ ماف و خواستێن وان بكەن».
سەبارەت ب بەرهەڤیێن پارتی دیموكراتی كوردستان بۆ هەلبژارتنێن بهێن یێن جڤاتا نوونەرێن ئیراقێ، وی ئەندامێ كۆمیتەیا ناڤەندییا پارتی رۆهنكر» پارتی دیموكراتی كوردستان بهێزتر بوویە د هەموو هەلبژارتنێن دەربازبوویدا و د ڤان هەلبژارتناندا ژی چاڤەڕێ دهێتە كرن ببیتە سەركەفتییا ئێكێ و بێ هەڤڕك، چونكە پارتی، چ وەك ئالیێ سیاسی و چ بەربژارێن وێ، خاپینۆك نینن و خەونێن مەزن ل دەف دەنگدەری دروست ناكەن و خەلكی ناخاپینن، بەلكو وان سۆزا ددەن، یێن دشێن بجهـبینن».
