پەرتۆكێن مە دمەزنن و ئەم نەشێین چانتێن خوە هەلبگرین
سندس سالح سلێڤانەیی:
سالانە ل گەل دەستپێكرنا سالا نوو یا خواندنێ، قوتابێن قوناغا بنەرەت، ب تایبەت ژی یێن پولا ئێكێ و دویێ گازندا ژ وێ چەندێ دكەن پەرتۆكێن وان دمەزنن و ئەو نەشێن چانتێن خوە ب هەلگرن و ماموستا و دایك و بابێن قوتابیان ژی هەمان بووچون هەنە و نۆژدارەك ژی دبێژیت: هەكە چانتا قوتابی یا گران بیت دێ زیانێ گەهینتە ساخلەمیا وی و ناهێلێت زوو ب زوو گەشێ بكەت و پێدڤیە چارەیەك بۆ بهێتە دیتن و بارێ وان سڤك بكەن.
نارین حەمدی و ئازاد عادل، دو قوتابیێن پولا ئێكێ نە دبێژن: پەرتۆكێن مە دمەزنن و رۆژانە ئەم شەش وانەیان دكەین، لەورا ئینانا شەش پەرتۆكان ل گەل شەش دەفتەرێن وان، ل گەل پێنڤیس و ژێبرك و ڕەنگ و پێدڤیێن دی یێن قوتابخانێ دبنە گەلەك و چانتێ مە گران دبیت و دەمێ ئەم دهێینە قوتابخانێ هەر زوو ئەم دوەستیێن هەروەسا پشتا مە ژ بەر چانتێ گران دئێشیت.
بەیان سالح، دایكا چەند قوتابیەكانە دبێژیت: دەمێ زارۆیێن من ژ قوتابخانێ دهێنە مال دبێژنە من: دادێ پشتا من یا دئێشیت، چونكو چانتێ من یێ گرانە، ل دووف خشتێ رۆژانە هەكە وان پەرتۆكان ژی نەبەت دێ ماموستا گازندان ژێ كەت، لەورا دێ یا باش بیت هەكە چارەیەك بۆ هاتبا دیتنن، ئەو ژی یان پەرتۆكێن وان بچووك كربان.
فەلاح حەسەن، ماموستایەكە ئەو ژی دبێژیت: ڕاستە ئەم ژی هەست پێ دكەین چانتێ قوتابی یێ گرانە، ب تایبەت یێن پولا ئێكێ و ئەم دبینین هەتا دگەهنە قوتابخانێ یان دەمێ دزڤڕنە مالێن خوە برێڤە گەلەك دوەستیێن و من دیتیە گەلەك دایك یان باب دهێن و ئەو چانتێ كوڕێ خوە یان كچا خوە هەلدگرن هەتا دگەهینە قوتابخانێ و ماموستا و كارگێڕیێن قوتابخانەیان ژی ل گەل هندێ نە كو چەند زووترە باشترە چارەیەكا گونجای بۆ گرانیا چانتێن قوتابیان بهێتە دیتن.
د. بەهزاد بامەرنی تایبەتمەندێ نەخۆشیێن هەستیان دبێژیت: چانتا گران گەلەك كارتێكرنێ ل سەر ساخلەمیا قوتابیان و گەشەیان وان دكەن، ب تایبەت ژی ل ناڤ مل و ستوی و بڕبڕا پشتێ، هەروەسا نە ب تنێ زارۆی، بەلكو مرۆڤێن مەزن ژی دەمێ تشتەكێ زێدەی شیانێن خوە هەلگرن دێ زیان گەهیتە ساخلەمیا وان، هەروەسا دێ زوو هەست ب وەستیانێ كەن و ل پاشەرۆژێ پتر دێ كارتێكرنا خوە ل سەر شیان و گەشەیا زارۆكی هەبن، لەورا پێدڤیە ئەڤ بابەتە بهێتە چارەكرن، بۆ نموونە هەكە هندەك پەرتۆك ل قوتابخانێ بمینن و هندەكێن كێم ژی قوتابی ل گەل خوە بینیت و ببەت دێ باشتر بیت.
