چارەسەریا سەرەكی یا كێشەیێن دناڤبەرا ئیراقێ و هەرێمێ دا دەرخستنا یاسایەكا نوو یا نەفت و غازێ یە
ئەمیر ئەترووشی:
پارێزەر بناس دوسكی، بەربژارێ ژمارە 8 ل سەر لیسا 275 یا پارتی دیموكراتی كوردستان د دیدارەكێ دا ل گەل رۆژناما ئەڤرۆ دیار كر، چارەسەریا سەرەكی یا رێككەفتنا ئیراقێ و هەرێمێ و كۆمپانیێن نەفت و غازێ ئەوە، یاسایەكا نوو ژ پەرلەمانێ ئیراقێ د وارێ نەفت و غازێ دا بهێتە تەشریعكرن و ئەڤە دێ مافێ هەموو لایان گەرەنتی كەن. د لایەكێ دی یێ دیدارێ دا ل دور ژیانا خوە دبێژیت: من دلوڤانیا بابێ خۆ نەدیتیە و ب تنێ 15 رۆژان ل گەل ژیایمە، لێ تشتێ خۆش ئەو بوویە كو هەمی هەڤالێن وی پەسنا وی دكەن و دبێژن مرۆڤەكێ جامێر و كوردپەروەر و مریدێ رێبازا بارزانی بوویە و ژ بەر هندێ ژی بوویە زیندانیێ سیاسی.
بناس دوسكی دەربارەی رێككەفتنا هەولێر و بەغدا بۆ رۆژنامەیا ئەڤرۆ دیار كر، رێككەفتنا هەولێر و بەغدا دناڤبەرا سێ جهان دا هاتیە كرن، ئەو ژی حۆكمەتا ئیراقێ و حۆكمەتا هەرێمێ و كۆمپانیێن پترۆلێ، بنیاتێ یاسایی یێ ڤێ رێككەفتنێ ل سەر راستڤەكرنا یاسایا میزانیا 2025ێ یە و وان بریاردا بۆ هەر بەرمیلەكا نەفتێ یا هەرێما كوردستانێ ب رێكا سۆمۆ ب 16 دولاران بدەین، د هەمان دەم دا كۆمپانیەك دێ هێت سەنگاندنا ڤی بهای كەت، ئەڤ میزانیە ئەڤ سالە ب دووماهی دهێت و ژ بەر هندێ ئەڤ رێككەفتنە بۆ سێ هەیڤان هێتە كرن و پشتی هینگی دێ رێككەفتنەكا نوو دناڤبەرا هەرسێ لایەنان دا هێتە كرن و گۆت: چارەسەریا سەرەكی یا ڤێ رێككەفتنێ ئەوە، یاسایەكا نوو ژ پەرلەمانێ ئیراقێ د نەفت و غازێ دا بهێتە تەشریعكرن و ئەڤە دێ مافێ هەموو لایان گەرەنتی كەن.
خویاژی كر، پارتا ئێكانە یا شیای ببیتە رێگر هەمبەری هەیمەنەتا ئیرانێ ل سەر ئیراقێ ب تنێ پارتی بوویە و هەردەم پارتی بوویە دیوارێ نەبڕ بەرامبەر هەمی پیلانێن دوژمان، چونكو ئەم هەموو دزانین كوردستان وەكو جهێ جوگرافی دناڤبەرا چەندین دوژمنان دایە و ڤان وەلاتێن دەوروبەر چو جاران نەهێلایە ئەم خۆشیێ ب بخوە ببەین، لێ دەولەت سەرێ جەنابێ سەرۆكی ئەم نها د سەربەخۆیی و ئازادیەكا تەمام دا دژین و گۆت ژی: هەكە مە ئاریشا مووچەی نەبیت مە چو ئاریشێن دی نینن و كوردستان ل هەمبەری هەموو پارێزگەهێن دی یێن ئیراقێ بەهەشتە.
ل دور وێ پرسیارێ كا دێ بناس دوسكی چیتە پەرلەمانی چ كەت، د بەرسڤێ دا دبێژیت: راستە نها ئەز وەكو بزنسمان و وەبەرهێنەر كاردكەم، لێ چو جاران ئەز ژ گۆرەپانا سیاسی دوورنەكەفتیمە و هەمی دەمان من بۆچوونا خوە یا سیاسی و تێكەلیێن سیاسی هەبووینە، ئارمانجا من ژ چوونا پەرلەمانی یا مادی نینە، بەلكو دێ خەلكێ مە پەیامێن جودا بینن و هەر تشتەكێ راگرتی دناڤبەرا هەرێمێ و بەغدا دا، دێ هەول دەم ب رێكا پەرلەمانی و یاسایێ دا بهێنە چارەسەركرن، ئەز ب باوەرم ئەڤ جارە ژی دێ پارتی حزبا ئێكێ بیت ل سەر ئاستێ ئیراقێ و زۆرترین دەنگان بدەستخۆڤە ئینیت.
زێدەتر ل دور ژیانا خوە یا كەسایەتی دیار كر «ئەم ژ خێزانەكا ناڤدار یا دهۆكێینە و ئەز ب ئێتیمی و ئێكانە مەزن بوویمە، من چ جارا هەست ب خویشك و براینیێ نەكریە و ئەز نزانم نوكە هەستێ خویشكێ یان برای چیە، ب تنێ من یێ گوه ل ئاخفتنا خویشك و برایان بووی، د سەر هندێ ڕا، بنەمالا مە گەلەك چاڤدێری ل من كریە و چ كێماسی ل من نەهێلاینە و گۆت: دایكا مە ئەز ئاڤاكرم و قوربانی ب من دا و ل گەل من ژیایە و ب شەڤ و رۆژ دگەل من دابوو و رۆناهیا رێكا ژیانا من بوو هەتا گەهاندیمە ڤێ قوناغێ.
بناس دوسكی ل سالا 1980ێ ژدایكوویە و باوەرناما بەكالوریوس د بسپۆریا یاسایێ دا هەیە و زمانێ كوردی و عەرەبی و ئینگلیزی باش دزانیت و شارەزایی د كارگێری و ئابووری و سەركردایەتیا سازیان دا هەنە و نوكە بەربژارێ ژمارە 8 ل سەر لیسا 275 یا پارتی دیموكراتی كوردستان بۆ پەرلەمانێ ئیراقێ و چاڤ ل سەركەفتنێ یە.
