مە دڤێت ل پەرلەمانی ببینە دەنگێ خەلكی و بێژینە ئیراقێ ئێدی بەسە
مەحمود نهێلی
د بەیار سەفەر چیچو بەربژارێ ژمارە 9 یێ پارتی دیموكراتی كوردستان ل بازنێ دهۆكێ دیاركر «ئەز وەك كورەكی دەڤەرا ئامێدیێ و پارێزگەها دهۆكێ یا پێدڤی دێ ل پەرلەمانێ ئیراقێ ئەنجام دەین و دێ شەری كەم ژ پێخەمەت ب دەست ڤە ئینانا مافێن گەلێ كورد».
دكتور بەیار بەربژارێ ژمارە 9 یێ پارتی د دیدارەكی دی بۆ رۆژناما ئەڤرۆ گۆت: راستە ئەم ژلایێ پارتیەكێ ڤە هاتینە بەربژاركرن كو پارتی دیمۆكراتی كوردستانە و پەیرەو و پرۆگرامێ خوە هەیە و ب درووشمێ ئارامی، ئاڤەدانی و سازان پشكداری هەلبژارتنان بوویە، لێ پارتی چ جاران رێگر نینە ئەگەر ژ دەرڤەی پرۆگرامێ وێ ژی پەرلەمانتارێن وێ كارەكی بكەن كو بەرژەوەندییا خەلكی تێدابیت، پرۆگرامێ من وەك بەربژارەكێ پارتی ئەز هەر كارەكی بكەم كو ئەنجامێ وی خزمەتكرنا خەلكی بیت.
ناڤهاتی دیار ژی كر، نە دادی د سیستەمێ رێڤەبرنا وەلاتێ ئیراقێ دا هەیە، دەما چەندین سالانە ئیراق مافێن خەلكێ هەرێما كوردستانێ ب گشتی و دەڤەرا بەهدینان ب تایبەتی دخۆت. ئەرێ تو دزانی خەلكێ باشۆرێ ئیراقێ ئەوێن ژ ئەگەرێن هێرشێن دەرەكی زیان گەهشتینێ تا نوكە ب ملیۆنان دینار قەرەبۆ وەرگرتینە و خەلكێ مە ئێك دینار ژی وەرنەگرتییە؟ ئەرێ تو دزانی ئەو شیعەیێن بووینە قوربانییێن زۆلما رژێما بەعس یا بەرێ هەیڤانە ب ملیۆنان دیناران وەك مووچە وەردگرن و تشتەك بۆ ئەنفالكرییێن مە نەهاتییە كرن؟ ئەڤە دو بابەتن ئەم دشێین ب یاسایێ شەڕی بۆ خەلكێ خوە بكەین.
گۆت ژی: ل گۆرەی یاسایا ژمارە 20 یا سالا 2009ێ، پێدڤییە ل سەر حكومەتا ئیراقێ خەلكێ وان دەڤەرێن ژ ئەگەرێ هێرشێن دەرەكی زیان دگەهنێ، قەرەبۆ بكەت و ژ بەر وێ یەكێ ژی ل گۆرەی ڤێ یاسایێ، پێدڤییە خەلكێ مە ل دەڤەرێن رێكان و نێروە و دۆسكی ژووری و بەرێ گارەی و نهێلێ و ئامێدییێ و بەرواری ژووری و ژێری و ئیدارەیا سەربەخۆ یا زاخۆ و ئاكرێ و دەڤەرێن وێ و هەر دەڤەرەكا دی یا ژ ئەگەرێ شەڕی زیان گەهشتینێ، بهێتە قەرەبۆكرن.
و گۆت: گەلەك بابەت هەنە ئەم دشێین بۆ خەلكێ خوە بكەین، ژبلی ئەو بابەتێن من پێشتر ئاماژە دایێ، ئەم نە ب تنێ دێ بۆ هندێ كار كەین مووچەیێن فەرمانبەرێن مە د دەمێ خۆ دا بهێنە هنارتن، بەلكو دێ كار كەین مووچەیێن فەرمانبەرێن مە ل گەل فەرمانبەرێن ئیراقێ بهێنە هاوتاكرن. دەما چەندین سالانە ئیراق مافێ فەرمانبەر و مووچەخۆرێن مە دخۆت، مە دڤێت ل پەرلەمانی ببینە دەنگێ خەلكێ خوە و بێژینە ئیراقێ ئێدی بەسە.
بەربژێرێ هەژمارە 9 یێ پارتی ل بازنێ دهوكێ زێدەتر گۆت: كەسێن من دنیاسن دزانن ئەز د ژیانا خوە هەمییێ دا ئەز ل هەر پلە و پۆستەكێ بم، من پشتەڤانییا گەنج و ژنان كرییە. د ئێكەتییا قوتابییان دا گەنج بووم و د ناڤ گەنجان دابووم، د ئەركێ پارتییاتیێ دا، هەر گەنج بووم و د ناڤ گەنجان دابووم و نوكە ژی چ وەك بەیارەكێ كادر و بەرپرسێ لژنەیەكا پارتی و چ ژی دكتۆر بەیارەكێ مامۆستایێ زانكۆیێ، ئەز هەر د ناڤ گەنجان دامە و كەسێن من دنیاسن دزانن رۆژانە ئەز خوە ل كێشەیێن وان دكەمە خودان بێی كو ئەز بزانم ئەڤ گەنجە كی یە؟ كوڕێ كێ یە؟ ژ كیژ گوندی یان عەشیرەتێ یە؟ ل دەما ئەم دچینە پەڕلەمانی ژی، دێ كار بۆ هندێ كەین گەنجێن مە، ب تایبەت دەرچوویێن زانكۆیان وەك دەرچوویێن زانكۆیان ل ئیراقێ دەلیڤەیێن دامەزراندنێ و دەلیڤەیێن كاری هەبن.
ناڤهاتی بەحسی پارچەك ژ ژیانا خوە كر و گۆت: ئەز كوڕێ پێشمەرگەیەكی مە و ژ مالباتەكا هەژار و خەباتكار رابوویمە، من وەكی پترییا گەنجێن نڤشێ خوە، زارۆكینی نەدیتییە. من وەكی ب هزاران خەلكێ مە یێ دەڤەرا بەهدینان ژ مالباتا خوە شەهید داینە. مە د ژیانا خوە دا گەلەك شەڕ و نەخۆشی دیتینە، لەورا من سۆز دایە هندی ئەز بشێم خزمەتا خەلكی بكەم بێی بەرانبەر.
دكتور بەیار سەفەر چیچو ل سالا 1983 ژ دایكبوویە، باوەرناما دكتوریایی د بوارێ زانستێن مرۆڤایەتی دا هەیە و شارەزایەكا باش د زمانی كورد و عەرەبی و توركی و فارسی و ئینگلیزی دی دا هەیە و ماموستایێ زانكویا دهوكێ یە و نوكە بەربژارێ ژمارە 9 ل سەر لیستا 275 یا پارتی دیمۆكراتی كوردستان بازنێ دهوكێ یە.
