رەڤەندا کوردی ل ئۆرۆپا پشتەڤانیێ ل لیستا ٢٧٥ دکەت
ل چەندین وەلاتێن ئۆرۆپا کوردێن هەر چار پارچەیێن کوردستانێ پشتەڤانیا خوە بۆ لیستا پارتی دیموکراتی کوردستان دیار کرن و داخواز ژ وەلاتیێن هەرێما کوردستانێ کرن دەنگێ خوە بدەنە وێ لیستا کو هەردەم کار بۆ مافێن رەوا یێن گەلێ کوردستانێ دکەت.
ل ئەلمانیا، بەلجیکا، سوید و چەندین وەلاتێن دی یێن ئۆرۆپا وەلاتیێن هەر چار پارچەیێن کوردستانێ ب چەندین چالاکیێن جودا جودا پشتەڤانیا خوە بۆ لیستا ٢٧٥ یا پارتی دیموکراتی کوردستان دیار کرن و داخواز ژ وەلاتیێن هەرێما کوردستانێ ژی کرن کو د ڤان هەلبژارتنێن گرنگ دا ب هەموو هێزا خوە پشتەڤانیێ ل لیستا پارتی دکەن، چونکی دوژمن و نەیارێن گەلێ کورد دخوازن پارتی یا لاواز بیت دا پیلانێن وان سەر بگرن، گرنگە کورد ژی د ڤان هەلبژارتنان دا ب دەنگێ خوە پشتەڤانیێ ل پارتی بکەن.
وەلاتیێن کورد یێن هەر چار پارچەیێن کوردستانێ کو وەکو رەڤەندا کوردی کار و چالاکیێن خوە ل ئۆرۆپا برێڤە دبەن ئاماژە ب ڤێ یەکێ ژی دکەن کو سەرکەفتنا پارتی د ڤان هەلبژارتنان دا سەرکەفتنا گەلێ کوردە، کورد ل هەموو پارچەیێن کوردستانێ و ل ئۆرۆپا ژێ چاڤەرێی سەرکەفتنا لیستا پارتی نە، پارتی د هەموو قووناغێن سەخت و دژوار دا بەرگری ل مافێن رەوا یێن گەلێ کوردستانێ کریە، دەستکەفتێن ئەڤرۆکە یێن ل هەرێما کوردستانێ بەرهەمێ خەبات و قوربانیدانا گەلێ کوردستانێ یە کو سەرکێشیا وێ ژی پارتی و بارزانی بووینە، ژ بەر ڤێ یەکێ ژی سەرکەفتنا لیستا ٢٧٥ د ڤان هەلبژارتنان دا دهێتە رامانا مسۆگەرکرنا پاشەرۆژا گەش بۆ هەموو گەلێ کورد نە تنێ ل ئیراقێ و هەرێما کوردستانێ بەلکو ل پارچەیێن دی یێن کوردستانێ ژی.
هژمارەک زێدە ژ وەلاتیێن رۆژئاڤایێ کوردستانێ کو ل ئۆرۆپا دژین ژی دیار دکەن، د چەند سالێن بۆری دا پارتی ب هەموو هێزا خوە پشتەڤانی ل رۆژئاڤایێ کوردستانێ کریە و دەمێ وەلاتیێن رۆژئاڤا ژ ترسا داعشێ بەرێ خوە دانە هەرێما کوردستانێ وی دەمی پارتی ب هەموو هێزا خوە پشتەڤانی ل خەلکێ خوە کر، گرنگە نها ژی وەلاتیێن هەرێما کوردستانێ دەنگێ خوە بدەنە لیستا ٢٧٥، چونکی سەرکەفتنا لیستا سەرۆک بارزانی سەرکەفتنا هەر کوردەکی یە و ب سەرکەفتنا لیستا پارتی د ڤان هەلبژارتنان دا دێ پێگەهێ کوردان ل ئیراقێ و دەڤەرێ بهێزتر لێ هێت و دێ پیلانێن دوژمنان ژی ژناڤ چن.
