ژ سەرهاتیەكا شۆڕەشا 26ی گولانێ
رەمەزان دەشتمری/ زاخۆ
دەمێ كۆنگرەیێ نەهێ یێ پارتی دیموكراتی كوردستان هاتیە بەستن و بریار هات دان لق و لیژنەیێن ناڤخۆیی و رێكخراوێن پێشمەرگەیی بێنە پێكئینان. ئەڤجا ل سالا 1981/1982ێ ڕێكخراوا پێشمەرگەیی ب ناڤێ رێكخراوا (رێنجبەران) كو ل ئەوی دەمی عەلی قادۆ بەرپرسێ ئەڤێ رێكخراوێ بوو و ئەركێ پێشمەرگاتیا ئەڤێ رێكخراوێ ل سنوورێ دەڤەرا لیژنا ناڤچەیا دهۆكێ بوو. ل ئەوی دەمی پێشمەرگە ب ڕۆژێ دچوو هەشارێ ل ناڤ دۆل و چەم و نهال و بەر لێڤا ڕویبارێن ئاڤێ دمان و هەر وەسا ل دەمێ ڕۆژئاڤا ببا دا پێشمەرگە قەستا ناڤ گوندان كەن و هەردو پێشمەرگە دا ل مالەكێ بنە مێهڤان و پشتی شیڤخوارنێ هەمی پێشمەرگە دا ل مالەكێ كەم بن و پاشی ل مزگەفتا ئەوی گوندی خڕڤەبن و نڤن و هەتا ببا سپێدە دا ژناڤ گوندی دەركەڤن و قەستا هەشاری ل ئاقارێ گوندەكی دیتر كەن. دەمێ پێشمەرگە چووبان مالەكێ و هەر ئەوێ مالێ دا خوارنا تێشتا سپێدێ و خوارنا نانێ نیڤرۆ بۆ پێشمەرگەیی ئامادەدكرن. هەر وەسا هەر مەفرەزەیەكا پێشمەرگەیی قوڕیەكێ چایێ هەبوو وەكی دۆرانێ هەر ڕۆژەكێ ئەڤ قۆڕییە ل دەڤ پێشمەرگەیەكێ بوو. ڤێجا پێشمەرگەیێ رێكخراوا رێنجبەران ئەبۆ مەهدی ئەڤ سوحبەتە ڤەگێڕا و گۆت: ل ئێڤاریەكێ پێشمەرگەیێن ڕیكخراوا مە یا ڕێنجبەران ئەم بۆ گوندێ شاوریكێ چووین و ئەز و هەڤالێ خوە سمایل ل مالا عەگید شاوریكێ بینە مێهڤان. پشتی شیڤخوارنێ هەڤژینا عەگیدی گۆتە مە: برا كا جانتێن هەوە یێن نانی دا بۆ هەوە نانێ خوارنا تێشت و فراڤینا داگرم. ل ئەوی دەمی قوڕیێ چایێ یێ مەفرەزامە ل دەف هەڤالێ من سمایلی بی. ڤێجا قوریێ مە یێ چایێ وەكی قسرێ ڕەش ببی و گەلەك مەزن بوو. چاوا چاڤێ هەڤژینا عەگید شاوریكی ب ئەوی قوریێ چایێ كەفت و كەنی و گۆت: ئەڤە وەكی محەمەد ڕەشیدی یە. ئەو ب خوە محەمەد رەشید كەسەكی بلند و دو تا و ڕەش ئەسمەر بوو و كارێ چێكرنا تاخمێن ددانان دكر و مالا وی ژی ل ئەوی دەمی ل گوندێ شاوریكێ بوو. دەمێ وەگۆتی ئەم هەمی كەنین و مەژی گۆتە قۆڕی محەمەد ڕەشید و هۆسا ناڤێ قۆڕی بوو محەمەد ڕەشید و ئەڤ ناڤێ قۆری و محەمەد رەشید ل دەورێ بەلاڤەبین و پێشمەرگەیی دگۆتنە قۆڕیێن خوە یێن چایێ محەمەد رەشید و ل دەمێ ل هەشارێ ب كەیف و سوحبەت و پێكەنینان دەمێ خوە ل بن كەڤر و تراش و چەمان دا دبۆراندن.
