تیپا ڕوباد یا مۆزیکێ دێ قەفتەکا سترانێن ئەردەوان زاخۆیی بەلاڤ کەت
زاخۆ، دلۆڤان هالۆ:
مۆزیکژەن مەهدی نوری، ئەندامێ تیپا ڕۆباد یا مۆزیکێ د دیدارەکا هونەری دا بۆ ڕۆژناما ئەڤرۆ دیار کر کو تیپا ڕۆباد یا مۆزیکێ یا سەر ب ڕێڤەبەریا ڕەوشەنبیری و هونەری ل دهۆکێ بەرهەمەکێ نوو بناڤێ «گەشتەکا سترانێن ئەردەوانی» تۆمارکرییە کو ئەڤ بەرهەمە ژ ٦ سترانێن هونەرمەند ئەردەوان زاخۆیی پێك دهێت.
ناڤهاتی ئاماژە ب وێ چەندێ ژی کر کو ئەڤ بەرهەمە هاتیە ئامادەکرن و بەلاڤکرن ژ لایێ مۆزیکژەن محەمەد زەکی ڤە، و ل تۆن ستۆدیو ل دهۆکێ هاتیە تۆمارکرن، و ئەڤ بەرهەمە ژ لایێ دەرهێنەر ستار ئەحمەد و هەڤالێن وی ڤە هاتیە کلیپ کرن.
گۆت ژی:»دیمەنێن وێنەکرنا ڤیدیۆ کلیپێ ل کەلها زاخۆ هاتینە گرتن ب بەژداریا هونەرمەندێ مەزن سەباح زاخۆیی و مۆزیکژەن هاوار میکائیل و هەموو ئەندامێن تیپا ڕۆباد یا مۆزیکێ لگەل کۆڕالا دەنگ خوشێن دهۆکێ کو ژ کچ و کوران پێك دهێت».
زێدەتر ژی گۆت:»ئەڤ بەرهەمە ب سپۆنسەریا تۆرا میدیایی یا کوردستان هاتیە بەرهەمئینان، و ل دەمەکێ نێزیك ب شێوێ ڤیدیۆ کلیپ دێ هێتە بەلاڤکرن».
