یانەیێن پارێزگەهێ دو دیدارێن ئاگرین هەنە و چاڤ ل سەرێ لیستێ نە
بڕیارە سوبەهی و شەمبییا بهێت هەڤڕكیێ گەڕا 17ێ ژ خولا پلا نایابا كوردستانێ یا فوتبۆلێ بهێنە ئەنجامدان، هەردو یانەیێن پارێزگەهێ و ئیدارا سەربەخۆ یانەیێن ئاكرێ و زاخۆ یاریێن ئاگرین هەنە و چاڤ ل پاراستنا ڕێزبەندیێن خوە هەنە، ئەوا بڕیارە هەموو یاری ل دەمژمێر 2:30 پشتی نیڤرۆ بهێنە كرن.
زاخۆ بەرانبەر خودانا سەرێ لیستێ یە
بڕیارە ل شەمبییا بهێت دناڤ ئەرد و جەماوەرێ خوە دا ل یاریگەها دەلال یانەیا زاخۆ مێڤاندارییا یانەیا هندرین بكەت ئێك ژ دیدارێن ئاگرین یێن ڤێ گەڕێ و خولێ، كوڕێن خابووری ل ڕێزا دویێ دهێن ب كۆمكرنا 28 خالان ژ هەشت سەركەڤتن، چار وەكهەڤی و چار خوسارەتیان، د بەرانبەر دا یانەیا هندرین ل ڕێزا ئێكێ و سەرێ لیستێ دهێت ب كۆمكرنا 37 خالان، ئەڤ یارییە بۆ زاخۆییان گەلەك یاگرنگە ژبۆ بەردەوامی دان ب هەڤڕكیێ ل سەر ڕێزبەندیێ و كێمكرنا خالان دناڤبەرا خوە و هەڤڕكا خوە یا سەرێ لیستێ، زاخۆیی باش دزانن خوسارەتییا ڤێ یاریێ دبیت پاشڤە ببەتە ڕێزا كێمتر، دبەرامبەردا یانەیا هندرین یا ڕژدە كو سەرێ لیستێ بەرنەدەت و خالا زوورتر لێبكەت.
یارییا ئاكرێ ژی ب زەحمەتە
ژلایەكێ دووڤە دهێتە چاڤەڕێ كرن سوبەهی ل یاریگەها خوە و دناڤ ئەرد و جەماوەرێ خوە دا یانەیا ئاكرێ مێڤاندارییا یانەیا سیروانی نوو یا باژێرێ سلێمانیێ بكەت، كوڕێن پایتەختێ نەورۆزێ ل ڕێزا سێیێ دهێن ب كۆمكرنا 25 خالان ژ حەفت سەركەڤتن، حەفت وەكهەڤی و دو خوسارەتیان، ژلایێ خوەڤە یانەیا سیروانی نوو ل ڕێزا چارێ دهێت ب 23 خالان، ئەڤ یارییە بۆ ئاكرەییان ژی ب سانەهی نابیت ژبەركو تیما مێڤان ژی هەڤڕكەكا دژوارە لێ هیڤیێن وێ بۆ ناسناڤێ ژ دەست نەداینە و دێ بۆ سێ خالان ب چەكێ خوە یێ پشتەڤانان هێتە دناڤ یاریگەهێ دا.
ژ یاریێن دی یێن ڤێ حەفتیێ
سوبەهی ئەینی قەلادزێ- پێشمەرگەیا هەولێر، ڕانیە- چوارقوڕنە، ل شەمبییا بهێت، پیشەسازی- ڕزگاری، دەربەندیخان- شێروانە.
هەلوەستێ گشتی بەری دەستپێكرنا یاریێن گەڕا 17ێ.
1- هندرین 37 خال.
2- زاخۆ 28 خال.
3- ئاكرێ 28 خال.
4- سیروانی نوو 23 خال.
5- ڕانیە 22 خال.
6- چوارقوڕنە 21 خال.
7- پێشمەرگەیا هەولێر 19 خال.
8- شێروانە 19 خال.
9- قەلادزێ 17 خال.
10- ڕزگاری 15 خال.
11- پیشەسازی 15 خال.
12- دەربەندیخان 10 خال.
