هشيارى ڤى جۆرێ راوتهرى به دهمێ تو دكڕى
سندس سالح:
یێ ب ئاگەهـ بە ئەگەر تە ئامیرەکێ راوتەرێ نوو یێ خودان تەکنۆلۆژیا Wi-Fi 7 کری؛ هندەک ژ وان بانگەشەیا هەبوونا ڤێ تەکنۆلۆژیایێ دکەن، لێ د راستیێ دا ب تمامی وێ تەکنۆلۆژیایێ ب خوهڤە ناگرن.
ئەگەر تو ل هزرێ بی ئامیرەکێ راوتەرێ نوو بکڕی دا کو پەیوەندییا ئینتەرنێتا مالا خوه باشتر بکەی، بکارئینانا نووترین جۆرێن خودان تەکنۆلۆژییا Wi-Fi 7 بژاردەیەکا باشە. ئەڤە دێ هاریكارییا تە کەت کو رووبەرێ ڤەگرتنێ ل هەمی پشکێن مالا تە باشتر لێ بهێت، کو جێگیری و خێراییەکا زێدەتر دابین دکەت. لێ دڤێت تو یێ ب ئاگەهـ بی دەمێ تو ئامیرەی هەلدبژێری. وەک دێ بینی، ڕەنگە تو هندەک جۆرێن ئامیران بینی کو بانگەشەیا هەبوونا ڤێ تەکنۆلۆژیایێ دکەن، لێ د راستیێ دا هەمی شیانێن وێ بکار نائینن.
ئامیرێن ئاراستەکرنێ (راوتەر) یێن ب ناڤێ Wi-Fi 7 لێ د راستیێ دا بێ ڤێ تەکنۆلۆژیایێنە
هەتا ئەم چاڤەڕێی گەهشتنا تەکنۆلۆژییا Wi-Fi 8 دکەین، کو هێشتا چەندین سال ماینە بگەهیت، Wi-Fi 7 نووترین ستانداردە. زۆربەیا راوتەرێن نوو و بهێز ڤێ تەکنۆلۆژیایێ ب خۆڤە دگرن. راستە کو گەلەک ئامیرێن وەک مۆبایل و کۆمپیوتەران هێشتا د گەل ڤێ تەکنۆلۆژیایێ ناگونجن، لێ بەرەبەرە بژاردەیێن پتر د بازاڕی دا پەیدا دبن.
ئێک ژ گرنگترین تایبەتمەندیێن Wi-Fi 7 ئەو تشتەیە کو ب MLO دهێتە نیاسین (کارپێکرنا ب فرە-پەیوەندی). ئەڤە وێ چەندێ دگەهینیت کو رێ ددەتە ئامیران پتر ژ باندەکێ لەرەلەری د ئێک دەم دا بکاربینن. ئەڤە یا بمفایە چونکە کاراییا ئامیرەی باشتر دکەت و گیرۆبوونا ئینتەرنێتێ کێم دکەت.
لێ کێشە ل وێرێ یە کو هندەک راوتەرێن دهێنە بەلاڤکرن کو پشتەڤانییا Wi-Fi 7 دکەن، ب تمامی دگەل ناگونجن؛ ژبەر کو هندەک ژ وان ڤێ تایبەتمەندییا MLO نینە. بۆ نموونە، دڤێت مۆبایلا تە بشێت پەیوەندیێ ب تورا Wi-Fi 7 بکەت و لەرەلەرێن 2.4 و 5 و 6 گێگاهێرتز د هەمان دەم دا بکاربینیت، ئەڤە ژی ب تنێ ب رێکا تایبەتمەندییا MLO دهێتە کرن.
وەک کۆڤارا بسپۆر (RTINGS) دیار کری، پشتی تاقیکرنا چەندین جۆرێن ئامیران، تایبەتمەندییا MLO وەک خالەکا سەرەکی دهێتە هەژمارتن بۆ ناساندنا راوتەری د چوارچێڤەیێ تەکنۆلۆژییا Wi-Fi 7 دا. لێ خالەکا گرنگ ل ڤێرە هەیە: نە یا مەرجە راوتەرێ Wi-Fi 7 پشتەڤانییا MLO یا هەڤدەم (هنارتن و وەرگرتنا هەڤدەم) ب رێکا تەکنۆلۆژییا EMLMR بکەت. بتنێ ئەگەر ئامیرە پشتەڤانییا جۆرێ دی یێ MLO بکەت کو ب (NSTR/هنارتن و وەرگرتنا نە-هەڤدەم) دهێتە نیاسین، دهێتە هەژمارتن کو راوتەرێ Wi-Fi 7 یە.
ژ بەر هندێ، گەلەک راوتەر وەک Wi-Fi 7 دهێنە نیاسین، لێ د راستیێ دا ڤێ تایبەتمەندییا سەرەکی بکار نائینن. ب گۆرەی راپۆرتا RTINGS، کو دووڤچوون بۆ 25 راوتەرێن Wi-Fi 7 کرییە، هندەک ژ راوتەرێن بەرنیاس وەک ASUS Zen Wi-Fi BT10 و TP-Link Archer BE700، پشتەڤانییا MLO یا هەڤدەم (EMLMR) ناکەن، بەلکو پشتەڤانییا جۆرێ دی (NSTR) دکەن.
ل دووماهیێ، کڕینا راوتەرەکێ نوو ب تەکنۆلۆژییا Wi-Fi 7 مەرج نینە ببیتە ئەگەرێ گوهۆڕینەکا مەزن د لهزاتيا ئینتەرنێتا تە دا. یا گرنگ ئەوە ب هووری دووڤچوونێ بۆ وی تشتێ دکڕی بکەی و خوه ژ کڕینا وان بەرهەمان بپارێزی یێن کو ئاستێ چاڤەڕێکریێ تە دابین ناکەن.
