ههبوونا من ب داهێنان و رهنگان ڤه یا گرێدایه
زنار تۆڤی:
كیژان خهسرهو، هونهرمهندهكا شێوهكاره، د ههڤپهیڤینهكێ دا دیار كر: «پهیوهندیا من ب هونهریڤه، گهلهك بهری قووناغا خواندنا من دهستپێكریه، هونهر ههر ژ زارۆكینیێ د ناخێ من دا شین بوویه و ل گهل من دا مهزن بوویه، لهوما ئهگهر رۆژهكێ هونهر ژ من بهێته ستاندن، وهك مرۆڤهك نامینم، چونكی ههبوونا من ب داهێنان و رهنگان ڤه گرێدایه، ئهو تشتێ كارێن من ژ گهلهك هونهرمهندێن دیتر جودا دكهت.
ئهو ئازادیه ئهوا د شێوازێ كاركرنا من دا ههیی، باوهریا من وهسایه كو هونهرمهند نابیت خۆ د قالبێ ئێك ستایل دا زیندان بكهت، لهوما دهمێ كارهكی دكهیی، دڤێت وهك وهرگێرهكی خهونێن خۆ سهرهدهریێ ل گهل كهڤالێن خۆ دا بكهیی، ههروهسا ب شێوازێ كلاسیك یان نوو، دڤێت ئهو تشته بهێنه سهر شانۆیا رهنگی ئهوێن خودانێ كاری دڤێت، بهلێ د پرۆژێن من یێن تایبهت دا، بهرهف جیهانا نوو، كۆلاج و ئهبستراكت دچم و پتر ناسناما هونهریا خۆ دیار دكهم، ههروهسا د كارێن خۆ دا پتر پشت بهستنێ ب رهنگێ رۆن دكهم، چونكی ب وی جۆرێ رهنگی دشێم ب هووری و ئارامی دگهل كهڤالان دا بمینم، چونكی خاڤكرنا كاری، پشكهكه ژ تاما چێكرنا هونهری، ههروهسا هندهك جاران ب بۆیاغا ئهكریلیك و ب تنێ ب چهقۆكێ ژی كاردكهم، ب تایبهتی دهمێ پێدڤیا من ب هشكبوونا بلهز یا رهنگی ههبیت.
ناڤهاتیێ گۆت ژی: شێوهكارێ سهركهفتی، ب تنێ ئهو كهس نینه یێ كهڤالان جوان دكێشیت، بهلكو پێدڤیه سێ بنهمایێن گرنگ تێدا ههبن، لێهاتی و شارهزایی د بكارئینانا كهرهسته و تهكنیكان دا.
ههبوونا ناسنامهكا تایبهت كو كارێن وی ژ یێن دیتر جودا بكهت، شیانا ڤهگوهاستنا ههست و پهیامان، ئهو خالا وهدكهت بینهر ل پشت رهنگ و شێوهیان دا واتا و ههستهكێ بخوینیت، ههروهسا هونهرێ نوو گۆپیتكا ئازادیا هونهرمهندیه، جههكه بۆ هندێ كو مرۆڤ بشێت بێ سنۆر، بێ ترس و بێ پێگیری ب قالبان، ناخێ خۆ تێدا ببینیتهڤه، ئهز وسا هزر دكهم كو هونهرێ نوو، د ئهڤرۆ دا بوویه زمانهكێ گشتی، چونكی خهلك پتر بهرێخۆ ددهنه سادهیی و فهزایا نوو و دكهنه پشكهكا زندی ژ ژیانا خۆ یا رۆژانه.
كیژان خهسرهو دبێژیت ژی: كارێن من د بۆری دا پتر رۆلێ خۆ ل دۆر ژنێ و دونیایا ناخێ ژنان دا ددیت، رهنگێن من چیرۆكا خهم و هیڤی و ههستێن ژنان ڤهدگێران، بهلێ ئهڤرۆ هزركرنا من یا هونهری بهرهف هیڤیهكا بهرفرههتر چوویه و خهیالا من بۆ كهڤالێن مهزن دچیت كو بشێم ببمه دهنگێ مرۆڤی و ههستێن وی، من دڤێت هونهر نه ب تنێ بۆ جوانیێ بیت، بهلكو ببیته زمانهك بۆ ڤهگوهاستنا ئازار و هیڤی و خوزیێن مرۆڤی، ههروهسا ههبوونا تهكنهلۆجیایێ هندهك جاران ژ بهایێ دهسترهنگینیێ كێم دكهت و هندهك هونهرمهند پشتبهستنێ ب بهرنامێن دیجیتالی دكهن،ئهز باوهر دكهم كو ژیرییا دهستكرد دهرگهههكێ مهزنێ نوو ل بهر هونهری ڤهكریه، ژیرییا دهستكرد دشێت د چركهكێ دا ملیۆنان ستایل و دیرۆكا هونهری كۆم بكهت و دهمێ هونهرمهندی بپارێزیت، لهوما ئهگهر ب دروستی بهێته بكارئینان، ئامرازهكێ هاریكاره نهكو جهگرێ هونهری.
كیژان خهسرهو، ئاشكراكر ژی: ل چهند سالێن بۆری دا، من ب كهڤالێن خۆ پشكداری د چهندین پیشانگههێن كاریگهر دا كریه وهك، پێشانگهها «ژێر ئهرد» ل ئهمنا سۆر ل سلیمانیێ، ل گهل هژمارهكا هونهرمهندێن دی من كارێن خۆ نیشادان كو ب تهكنیكا كۆلاج دهربرین ژ ههست و ژیانا ژنان دكر، ههروهسا د پێشانگهها (ههوارێن بن ئاخێ) دا، ب شێوازێ تێگههشتنێ و ب بۆیاغا ئهكریلیك، من كهڤال ل دۆر وان ژنان چێكرن یێن كو بێدهنگیا وان بوویه پشكهك ژ دیرۆكێ، ل ههولێرێ ژی، د پێشانگهها «زین» دا، ل گهل چهند هونهرمهندان ل سهر جوانی و رهسهناتیا ههسپی من كار كریه.
هێشتا دبێژیت: خۆ ب هونهرمهندهكا گهرۆك دزانم، ئهز كهسهكم من باوهری ههیه كو هونهر دهریایهكا بێ دووماهیه و هونهرمهند چو جاران ناگههیته وی جهی و بێژیت» فێری ههموو تشتان بووم» لهوما ههردهم لدووڤ فێربوون و تاقیكرن و ڤهدیتنا تهكنیك و رێكێن نوو دگهرم، پهیاما سهرهكی یا كارێن من بهردهوامی و نووكرنه، من دڤێت ب رێیا رهنگ و كهڤالان بێژم، هونهر سنۆران نانیاسیت و مرۆڤ دشێت ب شێوازهكێ ساده، جیهانهكا جوانتر بۆ خۆ و دهوروبهرێن خۆ دورست بكهت.
ئهو ژی گۆت: پرۆژێ من یێ نوو د دهمهكێ دا دهستپێدكهت كو دهمهكێ بهرفرهه بۆ من ههبیت بۆ نوقمبوونێ د ناڤ كۆنسێپتهكا كوور یا جڤاكی دا، نوكه بیر و ههستێن من ب پرسێن مرۆڤی و دهروونی یێن گرانڤه د مژوولن، ئهڤ چهنده كارتێكرنهكا راستهوخۆ ل سهر داهێنانا من یا هونهری دكهت، بهلێ باوهریا من وهسایه كو هونهرمهند دشێت ژ ناخێ ئازار و هزركرنێن كوور دا تشتهكێ جوان و واتادار دورستكهت، هونهرمهند ههردهم لدووڤ جوانی و رهسهناتیا ژیانێ دگهریت، ههروهسا ئهز بزاڤێ دكهم جیهانا خۆ یا هونهری پاقژ و دوور ژ ههر تشتهكی بپارێزم، كو بشێت رۆحا شێوهكاریا من تێكبدهت، ئهڤ پرۆژێ نوو ژی رهنگڤهدانا وێ بزاڤێ یه كا مرۆڤ چاوان دشێت د ناڤ فشار و چاڤدێریا دهوروبهران دا، هێشتا ئازادی و رهسهناتیا خۆ بپارێزیت.
* هونهرمهندا شێوهكار، كیژان خهسرهو، ل سالا 1999 ل سلێمانیێ ژ دایكبوویه.
* دهرچوویا پشكا گرافیك دیزاینه ل كۆلیژا هونهرێن جوان، زانكۆیا سلێمانیێ.
* پشكداری د چهندین پێشانگههێن شێوهكاری دا ل باژێرێن ههولێر و سلیمانیێ دا كریه و نوكه ژی یا بهردهوامه ل سهر كارێ خۆ.
