وەبەرهێنەرەكێ باتیفا پڕۆژەیەكێ كارەبا تێهنا ڕۆژێ دانایە
زاخۆ، دلۆڤان هالۆ:
وەبەرهێنەرەكێ قەزا باتیفا ل سەر ڕووبەرەكێ مەزن یێ ئەردی پڕۆژەیەكێ وەبەرهێنانێ یێ مەزن و گرنگ بۆ بەرهەمئینانا كارەبا تێهنا ڕۆژێ ل قەزا باتیفا دانایە و وێ كارەبێ ددەتە حكۆمەتێ و د بەرامبەر دا حكۆمەت ژی كارەبێ ددەتە پڕۆژەیێن وی.
حەجی مەشهوود، خودانێ پڕۆژەیێ بەرهەمئینانا كارەبا تێهنا ڕۆژێ ل قەزا باتیفا د دیدارەكێ دا بۆ ڕۆژناما ئەڤرۆ دیار كر، مە ل سەر ڕووبەرێ 10 دۆنەمێن ئەردی پڕۆژەیەكێ وەبەرهێنانێ یێ كارەبا تێهنا ڕۆژێ دانایە، كو ئەڤ پڕۆژە 4 مێگاواتێن كارەبێ بەرهەم دئینیت و دئێخیتە سەر تۆڕا كارەبا نیشتیمانی و ل داهاتی مە ل بەرە بگەهینینە دابینكرنا 15 مێگاواتێن كارەبێ.
ناڤهاتی ئاماژە ب وێ چەندێ ژی كر، پشتی پڕۆژەیێ ڕۆناهی یێ حكۆمەتا هەرێما كوردستانێ هاتیە دانان، مە پەیوەندی ب وەزیرێ كارەبێ كر و مە پێشنیار كر كو ئەگەر بگۆنجیت ئەم دێ پڕۆژەیەكێ كارەبا تێهنا ڕۆژێ دانین و كارەبا وێ دەینە حكۆمەتێ و د بەرامبەر دا حكۆمەت ژی كارەبێ بدەتە پڕۆژە و كارگەهـ و كۆگەهێن مە ل پارێزگەها دهۆكێ و ئیدارەیا سەربخوە یا زاخۆ.
گۆت ژی:»دڤێت ئەم كورد ژی وەكو وەلاتێن ئەوڕۆپی مفایی ژ كارەبا تێهنا ڕۆژێ وەرگرین و بكاربینین، چونكی بەرهەمئینانا ڤێ كارەبێ پێدڤی ب گاز و غاز و مەزاختنەكا زێدە نینە».
