مكیاژ پەیاما كارێكتەری دگەهینتە بینەری
هەرهین محەمەد
ئالا فەوزی، كچەكا باژێرێ دهۆكێ یە، بۆ دەمێ چەندین سالە كارێ مێكئاپێ فلم و سینەمایی دكەت، د دیدارەكێ دابۆ رۆژنامەیا ئەڤرۆ دبێژیت: جوداهیا دناڤبەرا مكیاژێ جوانكاریێ یێ رۆژانە و یێ سینەمایێ فلمان ئەوە ئارمانجا سەرەكی جوانكرنا سرۆشتێ یا مرۆڤی و ڤەشارتنا كێم و كورتیێن سادەنە و بكارئینانا وێ یا ب ساناهیی یە و گوهۆڕینەكا مەزن ل دیمەنێ كەسی دكەت و مكیاژێ سینەمایی ئارمانج ژی خزمەتكرنا كارێكتەرانە و ل دووف سیناریۆ و دیمەنێن فلمی، دیسان پێدڤی ب شارەزایەكا مەزن یا هونەری و تەكنیكی هەیە بۆ دروستكرنا كەسایەتیێن نوو پیركرنێ یان دروستكرنا برینان و ب ساناهی بەرانبەری كامیرێ و رۆناهیا بهێز یا ستودیۆیێ بەرگێریێ دكەت.
هەروەسا گۆت: مكیاژ ئێك ژ ئامرازێن بهێزترینە بۆ بەرجەستەكرنا كارێكتەری، چونكو رەنگ و شێوازێ مكیاژی دشێن راستیا دەرروونێ كارێكتەری (ئەرێنی، یان نەرێنی، یان ترس، یان خۆشی) بێ كو باخڤن بگەهینە بینەری و دیمەنێ دەرڤە یێ ئەكتەری د ڤی بیاڤی دا د بیتە زمانەكێ بێدەنگ بۆ دیاركرنا قوناغێن ژیانێ و گوهۆڕینێن دەروونی یێن دناڤا چیرۆكێ دا و دمكیاژێ سینەمایی دا كەرەستەیێن تایبەت دهێنە بكارئینان.
