خوریانا پیستی ل هاڤینێ.. ئەگەر و چارەسەری
دگەل هاتنا وەرزێ هاڤینێ و بلندبوونا بەرچاڤ یا پلا گەرماتیێ، گەلەک ژ هاولاتیان روی ب روی کێشەکا ساخلەمی یا بێزارکەر دبن کو ئەو ژی خوریانا پیستی یان حەساسیا وەرزی یە.
دکتۆرە هۆزان محەمەد قاسم بەرواری، تایبەتمەندا نەخۆشیێن پیستی و جوانکاریێ، دیار دکەت کو ئەگەرێ سەرەکی یێ خوریانێ د هاڤینێ دا بۆ خوهدانا زێدە دزڤریت، نەخاسمە دەمێ شەهـ د سەقایی دا بلند دبیت و دبیتە ئەگەرێ گرتنا غوددێن خوهدانێ و هەستداریا پیستی. هەروەسا ئاماژە ب هندێ کر کو لێکخشاندنا ل جهێن هەستیار وەک بن کەفشان دبیتە ئەگەرێ سۆتن و زڕیانێ، و ل لایەکێ دی ڤە، ماددێ کلۆر یێ د ناڤ ئاڤا مەلاڤانگەهان دا و حەتا شووشتنا لەشی ب ئاڤا گەلەک گەرم دبنە ئەگەرێ هشکبوونا پیستی و زێدەبوونا خوراندنێ.
ل سەر ئاستێ عەمری، زارۆک و ساڤا پتر ژ مەزنان زیانێ ژ ڤێ چەندێ دبینن چونکی لەشێ وان نەشێت هەڤسەنگیا پلا گەرماتیێ ڕاگریت و غوددێن وان بلەزتر قەپات دبن، زێدەباری هندێ کو بەستنا حەفازێ حەتا عەمرێ دو سالیێ رەوشێ خرابتر دکەت و سۆتنێ چێدکەت.
دکتۆرێ هۆشداری دا کو پێدڤیە مرۆڤ کێم سەحنەکەتە خوریانێ
هەکە یا بەردەوام و دومدرێژ بیت، چونکی ڕەنگە نیشانا نەخۆشیێن ناڤخۆیی یێن گران بیت. بەس د حالەتێن دەمکورت دا، خوریان دبیتە مەترسیەکا بلەز ئەگەر د گەل بلندبوونا پلا گەرماتیا لەشی (تا)، یان ئێکسەر پشتی خوارنا دەرمانەکی، یان د گەل وەرما لێڤ و ئەزمانی و تەنگاڤبوونا هەناسێ (وەک د حالەتێ لیرێ دا) پەیدا ببیت کو ل ڤێرێ پێدڤی ب دیتنا نۆشداری یا بلەز هەیە.
بۆ خۆپاراستنێ ژ ڤان مەترسیان، دکتۆرە هۆزان ڕێنمایێ ددەت کو مرۆڤ هندی پێ چێبیت ژ تیشکا ڕۆژێ یا ڕاستەوخۆ دوور بکەڤیت و د جهێن فێنک دا بمینیت، و جلوبەرگێن فرەهـ، سڤک و ڕەنگ ڤەبوویی بکەتێ دا کو ڕێگریێ ل حەبسکرنا خوهێ بکەن. هەروەسا گەلەک فەرە مرۆڤ ئێکسەر پشتی دەرکەفتنێ ژ مەلافانگەهێ لەشێ خۆ ب ئاڤا تێهنشیر بشۆیت دا کو کلۆر ل سەر نەمینیت، و پاشان لەشی ب باشی هشک بکەت و کرێمێن مورەتەب و شەهدارکەر ب بەردەوامی بکاربینیت.
ل دووماهیێ، وێ جەخت ل سەر هندێ کر کو نابیت هاولاتی حەبکێن حەساسیێ (دژە هیستامین) ب شێوەیەکێ سەرخۆ و بێی ڕێنماییا نۆشداری بکاربینن، نەمازە بۆ حالەتێن دژوار.
