کۆمپانیا «Chery» گەرەنتییا هەتاهەتایی بۆ پاترییا ترومبێلێن خۆ رادگەهینیت
پهری سهلاح:
د دیبەیت و گەنگەشەیێن تایبەت ب ترۆمبێلێن کارەبایی دا، هەر دەم مەزنترین ترسا کریاران نە دووراتیا رێڤەچوونێ یان دیزاینە، بەلکو مەترسییا ئاگرگرتن و سۆتنا پاترییانە. بۆ دووماهی ئینان ب ڤێ ترسێ، کۆمپانیا چینی یا زەبەلاح (Chery) گاڤەکا بێ وێنە هاڤێتییە و گەرەنتییەکا تاهەتایی بۆ پاترییێن جورێ (Rhino)، مۆتۆرێ کارەبایی و یەکا کۆنترۆڵکرنێ ل ناڤخۆیا چینێ راگەهاندیێە.
بڕیارا مەندەهۆشکەر ئەڤەیە: ئەگەر ترۆمبێلەک ژ بەر کێشەیا پاتریا وێ ئاگر بەرببێێ، کۆمپانیا سۆزێ ددەت کو وێ ترۆمبێلێ ب تمامی ب ئێکەکا نوو بگوهۆڕیت!
مەرج و ترۆمبێل کیژکن؟
– براندێن هاتینە ڤەگرتن:
ئەڤ گەرەنتییا مەزن بتنێ ترۆمبێلێن تمام کارەبایی ڤەناگریتە، بەلکو مۆدێلێن (Chery)، (Exeed)، (Jetour) و (iCar) ڤەدگریت یێن کو ب پاترییا «راینۆ» هاتینە بەرهەڤکرن، چ ترۆمبێل کارەبایی بیت یان ژی هایبریدا بارگاویکری (PHEV) و مەودا درێژکری (EREV).
– براندێن هاتینە جوداکرن:
هەتا نوکە هەردو براندێن (OMODA) و (JAECOO) نەهاتینە ئێخستنە د ناڤ لیستا ڤێ گەرەنتییێ دا.
– مەرجێن یاسایی:
ئەڤ گەرەنتییا تاهەتایی ب تنێ بۆ خودانێ ئێکێ یێ کارایە و ب تنێ بۆ بکارئینانا کەسییە (ترۆمبێلێن کرێ و بازرگانی ڤەناگریت). هەروەسا ئەگەر دیار بوو کو ئەگەرێ ئاگری شاشییا مرۆڤی بوویە، گەرەنتی دێ هێتە هەلوەشاندن، ئەڤە ژی ب وێ رامانێ دهێت کو د بازاڕێ ترۆمبێلێن بکارئینای دا کار ب ڤێ گەرەنتییێ ناهێتە کرن.
ئەگەرێ ل پشت ڤێ بڕیارا وێرەک چییە؟
ئەگەرێ سەرەکی یێ ڤێ گاڤێ ڤەدگەڕیت بۆ بجهئینانا مەرجێن نوو و تۆندێن سلامەتییا پاترییان ل چینێ (مەرجێ GB 38031-2025) کو ل 1ێ تیرمهها 2026ێ کەفتینە د وارێ بجهئینانێ دا. ل دووڤ ڤی پیوەرێ کو ئێکە ژ توندترین پیوەرێن جیهانێ:
١- پاتری نابیت بۆ ماوێ دو دەمژمێران پشتی بلندبوونا ژ نیشکەکێ ڤە یا پلەیا گەرمێ (Thermal Runaway) بتەقیت یان ئاگر بەرببێێ.
٢- نابیت دوکێل بۆ ماوێ کێمتر ژ پێنج خۆلەکان پشتی لێدانا زەنگا ئاگەهدارکرنێ بگەهیتە د ناڤ کابینا سەرنشینان دا، دا کو دەمێ پێدڤی هەبیت بۆ دەربازبوونێ.
٣- پاتری دڤێت بەرگرییێ ل هەمبەر لێدانا گران یا تەنێن پۆلایی و سەدان خولێن بارگاویکرنا ب لەز بکەن.
ئەگەر ئەڤ بەرنامەیێ «چێری» بگەهیتە بازاڕێن هنارتنێ و وەلاتێن دەرڤە، دێ بیتە چەکەکێ کوژەک دژی هەڤڕکێن وێ یێن وەک (BYD)، (Geely) و (Haval) د بازاڕێ ترۆمبێلێن کارەبایی و هایبرید دا.
