پاوهر بانك زيانێ دگههينيته پاتريا مۆبايلێ؟
سندس سالح سلێڤانەی:
گەلەک جار مرۆڤ د رێیا خۆ دایە یان ل جهەکى یە کو کارەبا نینە، پاوەر بانکی (Power Bank) دکەتە ڕزگارکەرێ تەلەفۆنا خۆ. لێ پرسیار ئەوە: ئایا بکارئینانا پاوەر بانکی زیانەکا مەزن دگەهینتە پاترییا تەلەفۆنێ؟ گەلەک جار ئاریشە نە ژ پاوەر بانکی ب خۆیە، بەلکو شێوازێ باركرنێ و داتەقاندنا وێ خەلەتییا ڕاستەقینە یە.
ئهرێ پاوەر بانک ب تنێ زیانێ دگەهینت؟
بەرسڤا دروست ئەوە کو پاوەر بانکێن مودێرن و یێن باش چ زیانێن راستەقینە بۆ پاترییا تەلەفۆنێ نینن، ئەگەر ب ڕێيا خۆ بێنە بکارئینان. پاترییێن نوو زۆر د زیرەکن و سیستەمێن پاراستنێ د ناڤ تەلەفۆنێ و پاوەر بانکی دا يێن هەيين کو کۆنتڕۆلا ڕێژا ڤۆلت و ئهمپێری دکەن. لێ ئاریشە دەست پێ دکەت. دەمێ مرۆڤ پاوەر بانکێن بێ بەلگە، یێن خراب یان ڕێکارێن نهدروست د باركرنێ دا بکارئینیت.
ڕێکارێن خەلەت یێن پاتریێ تێک ددن
گەلەک جاران مرۆڤ ب خۆ ئهگهرێ سەرەکی یە بۆ تێکچوونا پاترییا تەلەفۆنا خۆ بێی کو بزانێت:
-1 باركرنا تەلەفۆنێ ل جهێن گەرم: دانانا تەلەفۆنێ و پاوەر بانکی ل نێزیک پەنجەرەکێ یان ل ناڤ سەیارەکێ ل بن تیشکا ڕۆژێ؛ گەرماتییا بلند ژەهرە بۆ پاتریێ و دبيته ئهگهرێ ژناڤچوون و خراببوونا وێ ب لەز.
-2 بکارئینانا تەلەفۆنی دەمێ بارکرنێ: یاریكرن یان ديتنا ڤیدیۆیان دەمێ تەلەفۆن ل سەر پاوەر بانکی یە؛ ئەڤە گەرماتییا پاتریێ دو هند بلند دکەت و زیانەکا مەزن ب خانەیێن وێ دگەهینت.
-3 هێلانا تەلەفۆنێ ل سەر باركرنێ هەتا سپێدێ: باركرن ب رێژا ١٠٠٪ و هێلانا وێ بۆ دەمژمێرێن درێژ ب رهنگهكێ بەردەوام، ب تایبەتی ب پاوەر بانکێن کو سیستەمێ ڕاگرتنا خودکار نینە، فشارەكا مەزن ل پاتریێ دروست دکەت.
چاوا پاترییا خۆ بپارێزین و پاوەر بانکی ب دروستی بکارئینین؟
پاوەر بانکەکا باش و ناسکری بکڕە: ئەڤە گهلهك يا گرنگە، چونکی پاوەر بانکێن نزم و بێ باوەری کۆنتڕۆلا ڤۆلتیێ نینن و دبنە ئهگهرێ شۆکێن کارەبایی بۆ پاترییا تەلەفۆنێ.
بارا پاتریێ د ناڤبەرا ٢٠٪ بۆ ٨٠٪ دا بهێلە: نەهێلە پاتری ب تەمامی بهێتە خوار بۆ ٠٪. هەر چێبوو پڕ نەکە هەتا ١٠٠٪؛ ئەڤ چەندە ژيێ پاتریێ گەلەک درێژتر دکەت.
دوورکەڤە ژ گەرماتیێ: هەر دەمێ تەلەفۆن و پاوەر بانک د بارکرنێ دا گەرم ببن، ئێکجار ژێک ڤەکەن و دەمى بدەنێ هەتا تەمام سار دبن.
