فلمەكێ كوردی دو خەلات وەرگرتن
زنار تۆڤی
فلمێ سینەمایی (ژان) ل فێستیڤالا نێڤدەولەتی یا فلمێن كوردی ل بێرمینگهام ل (بریتانیا) دو خەلاتێن سەرەكی ب دەستڤە ئینان، كو ئەو ژی خەلاتێن باشترین سیناریۆ و باشترین ئەكتەرێ زەلام بوون.
بورهان ئەحمەدی، دەرهێنەرێ وی فلمی گۆت: فلمێ ژان ل فێستیڤالا فلمێن كوردی ل بێرمینگهام ل بریتانیا، سەركەفتنەكا باش ب دەستڤە ئینا و دو خەلات وەرگرتن، ئەو ژی خەلاتێن باشترین سیناریۆ و باشترین ئەكتەرێ زەلام. بوون و هونەرمەنـــــــــــــــدێ بەرنیاس (ماهر حەسەن) وەك ئەكتەرێ سەرەكی د وی فیلمی دا ڕۆل گێرایە و شیایە خەلاتێ باشترین ئەكتەرێ زەلام وەربگریت، هەروەسا هەر ئێك ژ ئەكتەران شیما مەلایی، مائیدە فەزلی، ئەفشین خدری، نیشتمان رەسوولنەژاد، ئەكــــــــــــــــــــــرەم محەمەدی و لەیلا بەیگی زادە، رۆل فلمی دا گێرایە.
فلمــــــــــێ ژان، ژ بەرهەمئینانا هەڤپشك یا ماهر حەسەنی و بورهان ئەحمــــــــــــــــەدی یە، كارێ وێنەگرتن و بەرهەمئینانا ڤی فلمی دناڤبەرا سالێن 2022 هەتا 2023 ل باژێرێ ســــــــــنە ل رۆژهەلاتێ كوردستانێ هاتیە كرن، ڤی فلمی پێشتر ژی ســــــــەركەفتنەكا دیتر ل فێســــــتیڤالێن نێڤدەولەتی و ناڤخۆیی ل ئیرانێ ب دەستڤە ئینایە، ژ وا ژی وەرگرتنا خەلاتێ باشترین فلمێ چیرۆكبێژ ل فێستیڤالا نێڤدەولەتیا فلمان ل تێسالۆنیك ل یۆنانێ، ل گەل ب دەستئینانا خەلاتێ یەلماز گۆنایی وەك باشترین فلم ل فێستیڤالا فلمێن كوردی ل لەندەن.
