پێدڤی یە ل کوردستانێ پتر گرنگیێ ب وەرزشا یۆگایێ بهێتەدان
بێوار حەمدی
دداخویانیەکێ دا راهێنەرێ یۆگایێ شانۆ مەتوو بو رۆژناما ئەڤرۆ دیارکر کو ل کوردستانێ یۆگا هێشتا ل دەسپێکا گەشەکرنا خوە دایە، هەرچەندە بەرامبەر سالێن پێشتر باشترە لێ شایەنی پترێ یە و پێدڤی یە ل کوردستانێ پتر گرنگی ب یوگایێ بهێتەدان و سەنتەرو رێکخراوێن تایبەت ب یوگایێ هەبن
ناڤهاتی زێدەتر گۆت: یۆگا هونەرێ ژیانکرنێ یە و وی دەمی دەسپێدکەت دەمێ مرۆڤ سەرنجا خوەیا دەرەکی بو ناڤخوەیا خۆ ڤەدگەڕینیت، ژبو وێ چەندێ کو خوباشتر بناسیت و دهەستێن خوبگەهیت ودیسان هەڤسەنگیەکا زێدەتر دناڤا جەستە و هەناسە ودەورنێ خوەدا پەیدابکەت، کو ئەڤە ژی دبنە ئەگەرکو هەڤسەنگی دناڤبەرا لەش وهزرو روحێ دا دروست ببیت
راهێنەرێ یۆگایێ دبەردەواییا ئاخفتنا خودا دیارکرکو یوگا بتنێ بولەشێ مرۆڤی بتنێ نینە، بەلکو رێیەکە ژبوو ئارامکرنا مێشکی ورێکخستنا هەناسەدانێ و مە فێردکەت کو دگەل جەستەیێ خۆ بژین وکویراتیا خوە بنیاسین وگۆت :هەرچەندە ل ڤێ دووماهیێ ل کوردستانێ پتر ژبەری نوکە گرنگی ب یوگایێ ددەن وبوویە ئاراستەیەک وشێوازەک بو ژیانا گەلەک ژ خەلکێ، لێ کوردستان پێدڤی پتر گرنگی دانێ و کویراتیا یوگایێ یە
ئەوچەندە ژی دازانین، ئێک ژوان ئەگەرێن کو یوگا تانوکە نەگەهشتیە ئاستەکێ بەرز ل کوردستانێ هەبوونا تێگەهشتنەکا شاشە وگەلەک جاران ژی ب شاشی یوگایێ ب ئایینی ومەزهەبان ڤە گرێددەن ژبەر هندێ ژی تانوکە گەلەک ژ خەلکی ژ ئەگەرێ ڤێ شاش تێگەهشتنێ ژ یوگایێ دترسن و خوە ژێ دوور دکەن، لەوما ژی گەلەک یا گرنگە ئەم بزانین کو یوگا دبنەرەتدا شێوازەکە ژبوو کارکرنا جەستە وهەناسە و ئارامیا مرۆڤی و هیچ گوهۆڕینەکێ دناسنامە وئایینێ کەسێ دا ناکەت.
