رەوشـەنبیریا قـانـوونـی
رێژین نهێلی
رەوشەنبیریا قانوونی ئێكە ژ بابەتێن هەرە گرنگ و پێدڤییە ئەم ب هوشیاریانە زانیاریان ل سەر وەربگرین و كار پێ بكەین، چونكو قانوون بنەمایێ دروستبوونا جڤاكەكا ئارام و دادپەروەرە. رەوشەنبیریا قانوونی، واتە هەر تاكەكێ د ناڤا جڤاكێ دا پێدڤی یە زانیاریێن باش دەربارەی قانوونێ هەبن، دا كو پتر ماف و ئەركێن خوە بزانن، ئەڤە ژی دێ ل وی دەمی دروست بیت ل دەمێ تو قانوونێ بنیاسی و دێ هەر كەس باشتر شێت مافێن خوە بپارێزیت و مافێ كەسانێن دی ژی دێ رێزێ لێ گریت و خوە ژ كێشە و سەرپێچیێن قانوونێ پارێزیت, پێدڤی یە بزانین قانوون ب تنی َژبۆ سزادانێ نەهاتیە. بەلكۆ ژ بۆ پاراستنا ماف و دادپەروەری و ئەولەهی و رێكخستنا ژیانا جڤاكی هاتیە دانان، لەورا هەر وەلاتەك بیت، بێی قانوون نەشێت ئاشتی و سەقامگیریێ دروست بكەت و بپارێزیت.
ژ بەر ڤێ چەندێ ئەم ژی وەك هەڤولاتی پێدڤیە قانوونێ بنیاسین و پێگیریێ پێ بكەین و مافێن خوە و كەسانێن دیتر ژی رێزێ لێ بگرین، دبەرامبەر هەر جورە دەست درێژی و توندوتیژیەكێ و گەندەلی تاوانەكێ دا رێكا یاسایی بگرین، هوشیاریا قانوونی د ناڤ خێزان و قوتابخانە و جڤاكێ دا بەلاڤ بكەین و هەر دیسا ل سەر دەمێ سۆشیال میدیایێ دا رەوشەنبیریا قانوونێ گرنگتربوویە. پێدڤیە هەر كەس بزانیت بەلاڤكرنا دەنگۆیێن نەراست و سڤكایەتی و هەرەش و بەلاڤكرنا وێنەیان و بەلاڤكرنا زانیاریێن تایبەت و بێ مولەت دشێن ئەنجامەكێ قانوونی هەبیت.
ل ڤێرێ دێ بێژین رەوشەبیریا قانوونی ب تنی َئەركێ دادگەهێ و پۆلیسان نینە، بەلكو بەرپرسیارەتیا مە هەمیانە. ل دەمێ تاكێن جڤاكێ قانوونێ بنیاسن و كار پێ بكەن دێ جڤاكەكا ئارامتر و دادپەروەرتر و پێشكەفتیتر دروست بیت.
