هەتا نوكە من چو كەڤالێن خۆ نەفرۆتینە
بێوارحەمدی
شێوەكارێ گەنج (هاوكار غەفۆر) د دیدارەكێ دا بۆ رۆژنامەیا ئەڤرۆ گۆت: حەزژێكرنا من بۆ كارێ هونەری بۆ بەری چەندین سالان دزڤڕیت و ئەز دەرچۆیێ پشكا شێوەكاری مە ل پەیمانگەها هونەرێن جوان و ئەڤە (13) سالن ئەز كارێ شێوەكاری دكەم و زێدەتر ئەز وێنەیان ل سەر دیواران چێدكەم و ب كارێ خۆ یێ دلخۆش و ئارامم.
هەروەسا گۆت: هەموو شێوەكار نەشێن پەیكەران چێكەن، هونەرێ وێنەێشانێ جوداهیەكا مەزن دگەل هونەرێ پەیكەری هەیە، لێ هەكە كەسەكێ هونەرمەند بیت و خودان شیان بیت دشێت هەردو كاران پێكڤە بكەت، بۆ زانین هەتا نوكە من پشكداری د هژمارەكا پێشانگەهێن هەڤپشك یێن شێوەكاری كریە، هەروەسا پێشانگەهێن تایبەت ژی ڤەكرینە، لێ هەتا نوكە من چو كەڤالێن خۆ نەفرۆتینە، ژبەركو ئەز دبینم ل وەلاتێ مە چو گرنگی ب هونەری ناهێتە دان، لێ چو جاران ئەز دەستان نا داهێلم و دێ ل دووف خەونێن خۆ چم.
