لێدوانێن بێ بنەما
سەیفوللا محەمەد
چ پێ نەڤێت ئەڤرۆ ل بەرسایا ڤێ تەكنۆلۆژییا پێشكەفتی و سەردەم، ڕاگەهاندن و ب تایبەت سۆشیال میدیا بوویە بەشەك هەرە گرنگ د ژیانا هەر كەسیدا و ڤەحەواندییە د ناڤ هەر مال و خێزانەكێدا، هیر و گر ب خوەڤە گرێداینە و هەر ئێك ب ڕەنگەكێ سەردەرییێ د گەلدا دكەت، چ ب باشی و مفا وەرگرتن و چ ب خرابی و زیاندار، لێ ئەو سەردەرییا زێدەتر خراب و كرێت د ڤی واریدا دهێتە دیتن، ئەوە گەلەك كەس د بەرپەڕێن خوەدا یان د پەیچێن جودا جودا دا، هندەك لێدوانا ل سەر ناڤێن هندەك كەساتییان بەلاڤ دكەن كو نە ژ دویر و نە ژ نێزیك ئاگەهـ ژ ڤێ چەندێ نینن و بێ بنەمانە، ئەڤ لێدوانە ژی ئەون یێن كو خەلكی د ئازرینن و گەلەك دلتەنگ نە ئارام دكەن، ئەڤجا بەرانبەر هندێ گەلەك كەس بێی كو ڕاستییا بابەتی بزانن، دێ ڕابن سەدان تومەتا بۆ ڤان كەسێن نە تێ و نە ژێ چێكەن و ب دەهان گۆتنێن كرێت و نە هەژی د دەرهەق واندا بێژن.
بێ گومان ئەڤ چەندە دبیتە ئەگەرێ پەیدابوونا دلڕەشی و دوبەركییێ و نەڤیانێ د ناڤ جڤاكیدا، نە دویرە ئەڤ كەسێن ب ڤان كاران ڕادبن پالدای بن ژ هندەك جهان ڤە و مەرەمێن خوە یێن تایبەت هەبن، لەورا د ڤێت ب هیچ ڕەنگەكی پشتەڤانییا ڤان نەهێتە كرن و باوەری ب هەر گۆتنەكێ یان لێدوانەكێ نەهێتە كرن بێی كو ڕاستییا وێ بهێتە زانین، ب مخابنی ڤە د بێژین ئەڤ دیاردە گەلەك بەربەلاڤ بوویە ل سۆشیال میدیایێ و ڕەگڤەدانەكا خراب ل سەر جڤاكی پەیدا كرییە، چونكی ئەڤ ڕەفتارە دویرە ژ ڕەوشت و تیتالێن پاقژێن جڤاكێ مە.
لەوا دڤێت ب هەر ڕەنگەكی هەبیت ڕێگری ل ڤێ چەندێ بهێتە كرن و سنۆرەك بۆ بهێتە دانان، ئەڤجا چ ژلایێ جهێن بەرپرس و پەیوەندیدارڤە دویڤچوون و لێپرسین بهێتە كرن، یان ژلایێ وان كەسێن د بنە قوربانی ڕەفتارێن كەسێن دەرون نزم و بێ هەلویست، كو سكالایان ل سەر وان تۆمار بكەن و ب ڕێكێن یاسایی مافێن خوە ژێ وەربگرن، داكو ببیت وانە بۆ هەر كەسی خۆ تووشی ڤێ دیاردا خراب و نەڕەوا بكەت.
