نەشوان كۆچەر: زانیار كوڕێ پارێزگەهێ یە چوویە هەلبژارتیێ ئیراقێ و دهۆكێ وەرنەگرت
د دیدارەكا تایبەت دا نەشوان كۆچەر یاریزانێ دێرین یێ یانەیا دهۆك و بابێ زانیار كۆچەر یاریزانێ هەلبژارتیێ لاوێن ئیراقێ گازندە ژ هەبوونا پشتگوهـ هاڤێتنا زانیارێ 19 سالی ژلایێ یانەیا دهۆك كر.
زێدەتر ناڤهاتی بۆ ئەڤرۆ گۆت: زانیار یاریزانێ یانەیا ئۆربرۆ یا سویدی یە د خولا پلا سێیێ دا یاریێ دكەت و كوڕێ باژێرێ دهۆكێ و ڕەڤەندا سویدە، ژبەر شیانێن وی یێن نایاب، من و كوڕێ خوە گەلەك حەز دكر یاریێ بۆ یانەیا دهۆكێ بكەت ژبەركو یانەیا باژێرێ مە و من باوەری ب شیانێن كوڕێ خوە هەیە، ل دەستپێكا ڤێ مەهێ من ئینا كوردستانێ ب پشتەڤانییا ئێك ژ ئەندامێن كارگێریێ ڕێك بۆ هاتە ڤەكرن بچیتە دناڤ ڕێزێن تیمێ دا، لێ د ماوەیێ ڕاهێنانان دا هیچ خولەكەكی ژی ڕێك ب زانیاری نە هاتە دان یاریێ بكە تدا ئاست و شیانێن وی بهێتە دیتن، ئەڤە ژی یا سرۆشتییە و دڤێت ڕاهێنەر یاریێ ب یاریزانی بكەت دا بزانیت ئاستێ وی چەندە.
هەروەسان نەشۆانی گۆت: هەر د ماوەیێ مانا یاریزانی ل باژێرێ دهۆكێ داخوازنامەك ژ دەڤ ڕاهێنەرێ هەلبژارتیێ لاوێن ئیراقێ بۆ هات كو پشكداریێ د كەمپێ ڕاهێنانێ دا بكەت، ئێكسەر زانیار بەر ب باژێرێ بەسرا چوو و زێدەتری حەفتیەكێ ل گەل هەلبژارتیێ ئیراقێ ڕاهێنان دكرن و بوو جهێ باوەرییا كادرێ ڕاهێنانێ، بەری كەمپا هەلبژارتیێ ئیراقێ ب دووماهی بینیت ڕاهێنەری خواست هەردەمێ ژ سوید ڤەگەڕیت یان ژی پێدڤی وی بن بهێتە دناڤ ڕێزێن تیمێ دا، ئەڤە ژی پێنەڤێت ژبەر ئاست و شیانێن ویە، بۆ مە گرنگتر ئەو بوویە یاریێ بۆ یانەیا باژێرێ خوە بكەت لێ مخابن نە دەلیڤە بۆ هاتە دان و نەك هێلا ئاستێ خوە نیشان بدەت؟ ئەڤە ژی جهێ پرسیارێ یە، ئەرێ چەوا یاریزان بۆ هەلبژارتیێ لاوێن ئیراقێ بهێتە داخوازكرن و ل یانەیا دهۆكێ پشتگوهـ پاڤێژن!، داخوازێ ژ كارگێرییا یانەیێ دكەین دۆڤچوونا بابەتی بكەن و كادرێ ڕاهێنانێ ئاگەهداربكەن كو یاریزانێن كوردستانی ژی خودان شیانن.
