ئەو مللەتێن کو ڕێزێ ل ئەدیب و نڤیسەرێن خوە دگرن مللەتێن ڕەوشەنبیر و تێگەهشتینە
زاخۆ، دلۆڤان هالۆ:
هەلبەستڤانێ ئیدارەیا سەربخوە یا زاخۆ مامۆستا (مستەفا حسێن) یێ ناسیار ب (هێژا) د دیدارەکێ دا بۆ ڕۆژناما (ئەڤرۆ) دیارکر: «هەلبەست هزرەکا پاقژ و ئەمانەتە ل دەف وی یێ خودان شیان بیت و ب ڕێکا هەلبەستێ پەیاما خوە بگەهینیت، هەلبەست ئیلهامە و هەر چ دەمێ هات ب ڕۆژ بیت یان ب شەڤ بیت دنڤیسم، و ئەگەر ل دەمێ کو ئیلهاما من یا هەلبەستێ بۆ من هات و من ئێکسەر نە نڤیسی، پشتی هینگێ نەشێم بنڤیسم؛ چونکی ژ بیرا من دچیت. ل دەمێ کۆچا ملیۆنی بۆ (بلەهێ) ل باكورێ كوردستانێ، من هەلبەست بۆ پشتەڤانیا پێشمەرگەی دگۆتن، هینگێ من ٤٤ هەلبەستێن خوە یێن دەستنڤیس لگەل خوە برنە گوندێ بلەهێ، ئانکو ئەو ژی لگەل من مشتەخت بوونە بلەهێ، دەمێ ئەم زڤڕینەڤە، من ل دەف خوە پاراستن، و من چەندین هەلبەستێن دی ژی نڤیسین و دانە لگەل وان و کرە دیوانەك و بناڤێ «پێتێن مشەختیێ» چاپکر».
ناڤهاتی ئاماژە ب وێ چەندێ ژی کر کو: «ل گورەی هزر و بۆچوونا من یا کەسایەتی ئەگەر هێشتا نڤیسەر یان هەلبەستڤان د ژیانێ دا بیت و ڕێز ل خزمەت و ماندیبوونا خامەیێ وی بهێتە گرتن گەلەك جوانتر و باشترە کو پشتی مرنێ ژ نوو ڕێز لێ بهێتە گرتن؛ چونکی دەمێ هێشتا ساخ دێ هەست ب هەبوونا خوە و خامەیێ خوە کەت. و ڕێزگرتنا پشتی مرنێ یا بێ مفایە؛ چونکی هینگێ مرۆڤ نەمایە ل ژیانێ و ل ناڤ گۆڕی بتنێ هەستی مایە. لەوما، پشتی مرنێ خوە بۆ مرۆڤی دونیایێ خراب بکەن یا ژ خوەیە. ڤێ هەلکەفتا ڕێزگرتنێ هەستەکێ گەلەك خوەش ب من بەخشی و من نەشیا چاوا هەستێ خوە دەرببڕم؛ چونکی هەستەکێ غەریب و جیاواز بوو».
بەردەوامی دا ئاخفتنا خوە: «بیرهاتنێن وی دەمی د هاتنە بیرا من کو ب نهێنی من هەلبەست دنڤیسین و دترسیام و هەردەم ل سەر ملێن خوە دزڤڕیم کو کەس من نەبینیت و کەس من نەگرت. لێ نوکە ئەز ب ئازادی هەلبەستان د نڤیسم و هەموو کەس هەلبەستێن من دخوینن. ئەز ل ناڤ هەڤال و کەس و کارێن خوە و خەلکێ باژێڕێ خوە کو هەموو یێ پشتەڤانیا من دکەن و گوهداریا هەست و هەلبەستێن من دکەن. من حەز دکر ب دەمژمێران بۆ ئامادەبوویان هەلبەستان بخوینم، ل ناڤبەینەکێ من نەشیا خوە و ئەز گریم؛ چونکی بیرهاتن هاتنە بیرا من کو ل سەر دەمێ ڕژێمێ تشتێ من د دلێ من دا بوو و من نە دشیا ب حەزا خوە و ب ئازادی یا من بڤێت بێژم، لێ ل دەمێ هەلکەفتا ڕێزگرتنێ ل ناڤا هۆلێ دەمێ ئەز ل پێشیێ ڕۆنشتی من ئێك دەستی و ئێك دلی ل وێرێ دیت؛ چونکی خەلکێ سەرانسەری کوردستانێ هاتبوونە ڤێ هەلکەفتێ».
ئەز ژ دل و جان سۆپاسیا بەشێ ڕەشەنبیری و ڕاگەهاندنا پارتی دیموکراتی کوردستان و بەرپرسێ وێ د. سالار عوسمان دکەم کو ئەڤ ڕێزه ل من و یێن ژبەری من گرتین، ئەو ملەتێن ڕێزێ ل ئەدیب و نڤیسەرێن خوە دگرن مللەتێن ڕەوشەنبیر و تێگەهشتینە، بێ گومان ملەتێ مە یێ کورد ژی ژ چ ملەتێن جیهانێ نە کێم ترە و ئەو ژی ڕێزێ ل ئەدیب و نڤیسەرێن خوە دگرن.
هەر وەسا هەلبەستڤان (مستەفا حسێن)ی گۆت ژی:»ژ بەری ڤێ هەلکەفتا ڕێزگرتنێ، د. سالار عوسمان بەرپڕسێ بەشێ ڕەوشەنبیری و ڕاگەهاندنا پارتی دیمۆکراتی کوردستان و شاندەکێ لگەل دا ژ هەولێرێ ب مەرەما لێپرسینا ڕەوشا من یا ساخلەمیێ سەرەدانا مالا من کرن، هەر هینگێ د. سالار عوسمان گۆتە من: ئەم دێ ڕۆژەکێ تەرخانکەین بۆ ڕێزگرتن ل خزمەتا تە د بوارێ هەلبەست و ئەدەبیاتا کوردی دا، و گەلەك کەیفا من ب ڤێ چەندێ هات؛ چونکی من زانی کەسێن بهایێ نڤیسینێ دزانن یێن هەین و خەمخوەر و ئەدەب دوستن. پێشتر ژی ئەم 25 نڤیسەرێن کوردستانێ کو ئەز ئێك ژ وان بووم ل هەولێرا پایتەخت ڕێز ل مە هاتە گرتن، و هەروەسا من چەندین خەلاتێن ڕێزگرتنێ وەرگرتینە ل سنوورێ ئیدارەیا سەربخوە یا زاخۆ و ل سەرانسەری کوردستانێ ب گشتی. هەر وەسا، من سوپاسیەكا ڕێزگرتنێ ژ لایێ مەسرور بارزانی سەرۆکێ حکۆمەتا هەرێما کوردستانێ ڤە وەرگرتیە».
دەربارەی قووناغێن سەرەكی یێن ژیانا خۆ،(مستەفا حسێن)ـێ هەلبەستڤان دبێژیت:»ئەز ل ڕێکەفتی ١٩٥٦/٧/١ێ ل گوندێ (ترکژا) ل دەشتا (سلێڤانەیا) ژ دایك بوویمە، و ل سالا ١٩٦٢ێ ل قوتابخانا (پانیه) یا سەرەتایی ل زاخۆ من دەست ب خواندنێ کریە، بۆ دەمێ سێ سالان ئەز ژ خواندنێ ھاتیمە ڤەقەتاندن، و د ژیێ ٧ سالیێ دا ژبەر ئەگەرێ نەخوەشیا دلی ل نەخوەشخانەیێن مووسل و بەغدا بتنێ مایمە؛ چونکی باب و مام و پسمامێن من ھندەك پێشمەرگە و ھندەك دناڤ زیندانێن ڕژێما وی سەردەمی دا بوون و نە دشیان بهێنە دەف من، و پشتی نشتەگەریێ جارەکا دی ڤەگەڕیامە زاخۆ بۆ خواندنێ، ل سالا ١٩٧٠ێ من قوناغا سەرەتایی ب دووماھیك ئینا، ل سالا ١٩٧٣ێ بوویمە ڕێکخستیێ ئێکەتیا قوتابیێن کوردستانێ، و ئەندامەکێ چالاك بووم د ناڤ ڕێزێن پارتی دیمۆکراتی کوردستان دا. ل سالێن ١٩٧٤ – ١٩٧٥ێ ئاوارە بوویمە و ھەر ل وێرێ ل قوتابخانا کوردی بو دەمێ دو سالان من خواندیە، لێ ڕژێمێ ئەو دو سالێن خواندنێ بۆ من نە ھژمارت، ل سالا ١٩٧٦ێ من قوناغا ناڤنجی ل قوتابخانا (بەدرخان) ب دووماهیك ئینا، ل سالا ١٩٧٤ێ من پشکداری د مەشقەکا سەربازی دا کریە ل سەر مەدفەعێت ١٠٦ ل نێزیك ڕایات لگەل چەند ھەڤالان ژ بۆ بەرەڤانیکرنێ ژ ئاخا کوردستانێ. ل سالا 1978ێ بوویمە ئەندامێ ئێکەتیا نڤیسەرێن کورد لقێ دهۆکێ. ل سالا ١٩٧٩ێ بوویمە دەرچوویێ پەیمانگەها بەرهەڤکرنا مامۆستایان ل پارێزگەها دھۆکێ. ل سالا ١٩٧٩ێ من ژیانا ھەڤژینیێ پێك ئینایە، و هەر ل سالا1979 ێ ھاتیمە دامەزراندن ل قوتابخانا زێوك سندی و پاشان ل کۆمەلگەها بێرسڤێ ل قوتابخانەیێن سەرەتایی و ناڤنجی و ئامادەیی و خواندنا مەزنان یا بلەز ل زاخۆ مامۆستا بوویمە. ل ڕێکەفتی 28/7/1992 بوویمە کادرێ پارتی دیمۆکراتی کوردستان. ل ڕێکەفتی 14/10/2019ێ ئەز هاتیمە خانەنشین کرن».
هەر وەسا گۆت ژی: «ل سالا 1973ێ من دەست ب نڤیسینا هەلبەستان کریە. ل سالێن 197٤ – 197٥ێ من پشکداری د شۆڕەشێ دا کریه، و ھەلبەستێن من دھاتنە رەوانەکرن بو ئێزگێ کوردی ل بەغدا ب ڕێکا لژنا ناوچا زاخۆ و ب دەستێ کادرێ مە یێ پارتی (تەھا مەلا عەبدولجەلیل)، من ھەلبەست من ب قارەمانیا پێشمەرگان دژی داگیرکەران د نڤیسین. ل سالێن ١٩٨٢ێ ل بێرسڤێ و سالێن ١٩٨٨ێ و ١٩٨٩ێ و ١٩٩٠ێ ل زاخۆ داخواز ژ من د ھاتەکرن کو ئەز ھەلبەستان ب بیرەوەریا ژ دایکبوون و پەھلەوانیێن سەرۆکێ ڕژێما بەعسا فاشست بنڤیسم و بۆ ڤێ مەرەمێ ئەز د هاتمە ڕەوانەکرن بۆ دھۆك و ھەولێر و سەلاحەدین داکو من ڕازی بکەن، لێ ھەر جار ب بھانەیەکێ من خوە قورتال دکر، ل سەرھلدانا زاخۆ یا ١٩٩١ێ من ڕۆلەك کارا ھەبوو دناڤ جەماوەرێ سەرهلدانێ دا ب خواندنا چەندین هەلبەستان ژ وان ژی هەلبەستا (برێ من ڕابە)، من پشکداری د چەندین فێستیڤالێن ئەدەبی و ھەلبەستخواندنێ دا کرینە».
ل دووماهییا ڤێ دیدارێ ژی گۆت: «سەرجەم بەرهەمێن من یێن چاپکری 15 پەرتووكن کو ژ وان 1٤ پەرتووك دیوانێن هەلبەستانن و ئێك ژی پەرتووکەکا فۆلکلووری یە، دیوانا (پێتێن مشەختیێ) ب تیپێن لاتینی هاتیە نڤیسین و ل سالا 199٤ێ هاتیە چاپکرن کو ئەڤە دبیتە ئێکەم بەرهەمێ من یێ چاپکری، و دیوانا (پەسن و ڕەخنە) ل سالا 2001ێ هاتیە چاپکرن، پەرتووکا (دیلۆك سترانێن دروین و دیلانان) ل سالا 200٥ێ هاتیە چاپکرن، و دیوانا (مێرگا خوینێ) ل سالا 200٨ێ هاتیە چاپکرن، و دیوانا دگەل چرکان ل سالا 2012ێ هاتیە چاپکرن، و دیوانا (گول دبه کول) ل سالا 2013ێ هاتیە چاپکرن، و دیوانا (لێ لێ مه دیتن لۆ لۆ) ل سالا 2017ێ هاتیە چاپکرن، و دیوانا (کا ئەو پەڕه) ل سالا 2019ێ هاتیە چاپکرن، و دیوانا قەیرانا زەوقی ل سالا 2020ێ هاتیە چاپکرن، و دیوانا (ڕۆنیا گەلان) ل سالا 2021ێ هاتیە چاپکرن، و دیوانا (مژا گۆریاران) ل سالا 2023ێ هاتیە چاپکرن، و دیوانا (خابیرێ زەلال) ل سالا 202٤ێ هاتیە چاپکرن، و هەر سێ دیوانێن (هەلبەسته نیگار) و (دەرمانێ ڕشتی) و (پێتێن مشەختیێ) ب تیپێن عەرەبی ل سالا 202٦ێ ژ لایێ بەشێ ڕەوشەنبیری و ڕاگەهاندنا پارتی دیمۆکراتی کوردستان ڤە هاتینە چاپکرن و د هەلکەفتا ڕێزگرتنا من دا ل سەر ئامادەبوویان هاتینە بەلاڤکرن.