نفشێ نوو كەرەستەیێن بەرێ نانیاسن
رەمەزان زەكەریا
پیرجب عەبدوللا، چایچییەكێ بەرێ یە، ل بازاڕێ كەڤن یێ ئاكرێ كار دكەت و شیایە چایخانەیا خۆ بكەتە مۆزەخانەیەكا بچووك یا پڕی كەلوپەلێن كەڤنار و كەلەپووری و ئەڤ چەندە بوویە ئەگەر كو پتر خەلكەك بچنە چایخانەیا وی.
ناڤهاتی بۆ رۆژنامەیا ئەڤرۆ دبێژیت: ژبەركو من حەزەكا مەزن بۆ تشتێن كەڤن و كەلەپوورێ باب و باپیران هەبوو، من دەست ب كۆمكرنا كەلوپەلێن كەڤن كر و ل چایخانەیا خۆ دانان دا كو ببنە جهەك بۆ سەرەدانێ و خەلك و سەرەدانكەر تشتێن كەڤن ببینن و ئێك ژ ئارمانجێن من یێن سەرەكی ئەو بوو كو نڤشێ نوو و گەنج بهێتە ئاگەهداركرن ل سەر وێ چەندێ كو باب و باپیرێن وان چ پێدڤی و كەلوپەل ب كار دئینان، هەروەسا گەلەك تشتێن كەڤن وەك (بلور، فانوس، تەشی، شانە، سندوقێن كەڤن) و چەندین تشتێن دی ل چایخانیێ داینە بەر چاڤێن خەلكی.
هەروەسا گۆت: نڤشێ نوو یێ ئەڤرۆ گەلەك جاران ناڤ و مەبەستا كەرەستەیێن كەڤن نوزانن، بۆ نموونە نزانن بلور، فانوس یان تەشی چییە و چەوا بكار هاتینە، بەر ڤێ چەندێ مە دانا كو ئەڤ تشتە هەبن دا كەسێن نوكە دهێن سەرەدانێ دكەن و ڤان كەلوپەلان بینن دیرۆك و رۆژگارێن باب و باپیرێن خۆ ژ بیر نەكەن، بۆ زانین من گەلەك تشتێن باشتر هەنە، بەلێ ژ بەر نەبوونا جهی نەشیاینە دانین.
