ب فەرمانا مەلا مستەفا بارزانی پارە بۆ نووژەنكرنا دێرێن گوندێن دەڤەرا بەهدینان هاتە تەرخانكرن
سالار محەمەد دۆسكی:
4-5
هەمان پێشمەرگەیێ ئیلۆنێ گۆت: ل سالا 1975 و دەمێ شۆڕش تێكچووی ئەز ل دەشتا بەنداوا بووم و سەبری نوكە یێ ساخە ل گەل من بوو و من گۆتێ سەبری گۆت بەلێ من گۆتێ سەحكە گەلیێ دهۆكێ و خەلكی یێ دهێنە ناڤ باژێری و رەنگە پێك هاتنەك دروست بیت و مە ئاگەه ژێ نینە و من نەزانی و من ب دێربینێ سەحكمێ هەتا ئەم هاتین و نێزیك بووین و مە پرسیار كر گۆتن شۆڕش تێكچوو و ئەم گەلەك عاجز بووین و كەل و پەلێن مەیێن شۆڕشێ ژ مە هاتنە ستاندن و ناڤێن مە هاتنە نڤێسین و رۆژا پاشتر ئەم چووین و هەر ئێك ژ مە 25 دینار دانێ وی دەمی من كلاشنیكوف ڕادەستی حوكمەتێ كر و پشتی بورینا پێنچ رۆژا وی دەمی مالا مە ل تاخێ شێلێ بوو، ترۆمبێلەكا لەشكری هات 12 جندی تێدابوون و كەسەك تێدا بوو بناڤێ پەتروس خەلكێ سەرسنگ بوو و من گۆتێ خێرە وی كەسی گۆتێ ئەڤە ژی ژ جەماعەتێن هەندسێ یا چاندن و راكرنا ئەلغاما بوویە و ئەز چوومە دەف سەعید حەموو و گۆت تو شلیمۆنی ؟، من گۆتێ بەلێ گۆت روینە خوارێ وێنێن من كێشان و پرسیار ژ من كرن، ل سەر چاندنا ئەلغاما جهێن وا و كیرێ تینان و من گۆتێ گەلەك من چاندینە و ل دیوانا وی لیایەك ژی یێ روینشتی بوو و ڤیان گەلەك پرسیار بكەن و گەلەك كرن و من ژی راستی بۆ گۆتن.
هەمان پێشمەرگەیێ شۆڕشا ئیلونێ ئەو ژی گۆت: گەلەك جاران مەتران ماریا ئالا دگۆتە من دێ تە كەینە زاڤایێ خوە من گۆتێ كی دبێژیت دێ مینم و رەنگە شەهید بم وی دەمی ژیێ من 19 سال بوون و ئەم گەرم بووین و بتنێ روحا كوردینیێ دسەر و مێشكێ مە دابوو و مە هزرا ژن ئینانێ نەدكر، ل سالا 1975 ئەم هاتینە خوارێ و چوومە لەشكریا ئیراقێ و سێ سالان من خزمەتا لەشكریێ كر، دا ژبیر نەكەم ل سالا 1974 ئدریس بارزانی خودێ ژێ رازی بیت كاغەزەك دابوو من و تێدا نڤێسی بوو 25 دیناران بۆ ب مەزێخن، شابۆ خودێ ژێ رازی بیت نەمایە و گۆت شلیمۆن ڕابە دا بچین و من گۆتێ كاغەزا من و گۆت پێلە و و ئەز نەگەهشتم بچمێ و ئەو كاغەز ما دبەریكا من دا و ئەو بوو سالا 1975 شۆڕش راوستیا و ئەم هاتینە خوارێ وەك پێشتر مە ئاماژە پێكری ئەز چوومە لەشكریێ و ئەو كاغەزا رەحمەتی ئدریس بارزانی هەتا سالا 1977 ما بەریكا من دا، كەسەك ل عەسكەریێ هەبوو دگۆتنێ عەبدلرەحمان بەلێ یێ مەدەنی بوو و ل گەل مە بوو و گەلەك باوەری من پێ دهات و رۆژەكێ من گۆتێ تودزانی كاغەزەكا ئدریس بارزانی هێشتا بەریكا من دایە و 25 دینار بوو من مەزاختینە، و پارە من نە وەرگرتینە و ئەوی گۆت نیشا من بدە و من ژی ئەو كاغەز نیشادا و رۆژا پاشتر عەبدلرەحمان دچیتە ڤی دەنگۆباسی دبێژیتە شوعبێ و بابەتی هەمی بۆ شرۆڤەدكەت، و پشتی ماوەكی شوعبێ گازی من كر و گۆت ئەو چ كاغەزە بەریكا تەدا ئدریس بارزانی 25 دینار نڤێسی نە؟ و ئامری بەرەڤانی ژ من كر، و گۆت ئەڤ كاغەزە یا كەڤنە و چەند سال ب سەر ڤە چووینە وەرەقە ژ من وەرگرت و دڕاند و ئەگەر ئامری بەرەڤانی ژ من نەكربا رەنگە تووشی كێشەكا مەزن ب بام، و رەنگە هاتبا مە سێدارەدان، من نەزانی عەبدلرەحمان دێ چیت بێژیتە شوعبێ و من باوەری پێ هات و ئەگەر ئامر نەبا دا تووشی كێشەكێ بم، و ئامر خەلكێ مویسلێ بوو و گەلەك جاران من كارێ كارەبێ بۆ دكر.
شلیمۆن لاجین عودیشو، زێدەتر بەحسێ ژیانا خوە كر و گۆت: پشتی لەشكری یا ب زووری یا ئیراقێ ب دووماهی هاتی ل سالا 1978 هاتمە تاخێ گرێ باسێ و من دوكانەك بخوە ڤەكر یا چاككرنا جلشو و تەزیاتیا و هەتا نوكە ژی ل سەر كارێ خوە یێ بەردەوامم، شارەزایی یا من بۆ ڤی كاری ڤەدگەریت بۆ خولا ل شۆڕشا ئیلۆنێ من پشكداری تێدا كری ل چومان خولا ڕاكرن و چاندنا ئەلغامان، ل سالا 1978 هاتمە دەستەسەركرن ژلاێ ڕەشەكێن رژێمێ ڤە و ڤەگوهاستمە بەغدا، و گۆتن ئەم یێ ل تە دگەریێن و ل باژێرێ بەغدا ڤەگوهاستمە وەزارەتا بەرەڤانیا ئیراقێ و هاڤێتمە دناڤ ژۆرەكێ دا و چ ئاخفتن یان ئێشاندن نەبوو و رۆژا پاشتر ڤەگوهاستمە باژێرێ كەركووكێ و ڤەگوهاستمە هەوالێگێریێ ل هەمان باژێر و پێنچ رۆژا چ نەكرن، و خوارنا من بتنێ سەمۆنەك و پیچەكا ماستی بوو و دایك و بابێن من زانی ئەز هاتیمە دەستەسەركرن بەلێ دەنگۆباسێن من نەدزانی كا كیڤەبرم و رۆژا شەشێ دەمژمێر 11 شەڤێ برمە ژۆرەكێ ڤە و كەسەكێ ل پشت مێزێ و ئێك ل هنداڤ سەرێ من راوستیا یە، و دارەك د دەستی دایە و سەرێ وی داری یێ گرۆڤرە و ئەو دارێن شەڕی نە و گۆتە من دا بووتە بێژم ئەم هەمی زانیاریا ل سەر تەزانین، و دێ پرسیارا ژ تەكەین و هەر بەرسەڤەكا شاش تە دا دێ تە ئێشینین، و من گۆتێ سۆزبیت من چ كربیت و كیڤە چووبوم ب دروستی بەرسڤا هەوە بدەم، گۆت تە كەنگی پەیوەندی ب شۆڕشا كوردی كریە؟، من گۆتێ ل سالا 1967ێ بوو، گۆت دروستە، گۆت كی ل وێرێ بوو؟، من گۆتێ بابە شێخ، عەلی جۆقی، خالد شلی، سالح نەرموو و گەلەكێن دی ژی ل وێرێ بوون، و دوڤدا كیڤە چووم و پرسیار چوونا خولا چاندناو ڕاكرنا مینا ژ من كر، و كێ وانە گۆتنە تە؟ وكیڤە؟ ئەڤ پرسیارە هەمی كرن، و گۆت بەرسڤێن تە دروستن و پاش دەرچووم و ل رۆژا دەرچوونێ ئدریس بارزانی خودێ ژێ ڕازی بیت هات و سحكرنە كارێ مە و چەوا ئەم فێربووینە و دەرچوویێن خولێ هەر ئێك ب كلاشینكوفەكێ ژلایێ رەحمەتی ئدریس بارزانی ڤە هاتنە خەلاتكرن، و من گۆتێ سالا 1971 هاتمە شێخان و گورگیس برایێ هورمز مەلك چكو هاتە شێخان و داخواز ژ من كر ببمە زێرەڤانێ ویێ كەسۆكی و ڕازی بووم، ل سەر داخوازیا وی و چیرۆك هەمی من گۆت، گۆت تە بارزانی دیت یە؟، من گۆتێ گەلەك جاران و من بەحسێ دیاریا خوە كر دێربینێ ئەوا ژلایێ بارزانی ڤە ب من هاتیە بەخشین و دیسا ئەو دەبانجا ئدریس بارزانی دایە من، و گۆت چەند زێرەڤان هەبوون؟ من گۆتێ مەلا مستەفا بارزانی 12 زێرەڤان ل گەل دا بوون و هەمی دچوون و بتنێ ئەز و ئەو و كەسەكێ دی مام هەتا 12ی شەڤێ ماین و گۆت تە دشیا ب كوژی؟، من گۆتێ ما ئێك بابێ خوە كوژیت؟، ئێكسەر سەرێ خوە هەژاند و ئەوێ تەنشت من دربەك ب وی داری دانا سەرێ من و من گۆت چاڤێ من پەقی و ناڤ چاڤێن من هەمی بوونە خوین، و من ئاگەهـ ژ خوە نەبوو و برمە هاڤێتمە ژۆرەكێ ڤە و شەش و نیڤی سپێدێ دەرگەهـ هاتە قوتن و گۆتن شلیمۆن ڕابە ڤە و ڕابە هەرە سەر شوویێ و ماوەكی دەربازكرم و چاڤێ من نەڤەدبوو.
