حوكمه‌تا عيراقي چو پێنگاڤ بۆ پاراستنا كێم نه‌ته‌وان ل عيراقێ نه‌هاڤێتينه
ئه‌ندامه‌كي خۆلا بۆري يا جڤاتا نوونه‌رێن عيراقي بۆ ئه‌ڤرۆ دياركركو ل سه‌ر كاره‌ساتا شنگالێ و بێ ده‌نگيا حوكمه‌تا عيراقێ، دێ سكالايه‌كێ دژي حوكمه‌تا عيراقي ل دادگه‌ها نێڤده‌وله‌تي تۆماركه‌م، چونكو ئه‌و يا به‌رپرسه كو هزاره‌ها وه‌لاتي ل شنگالێ هاتينه كوشتن و هزاره‌ها زارۆ و ژن هاتينه ره‌ڤاندن.
مه‌حما خه‌ليل بۆ ئه‌ڤرۆ گوت” ل دووڤ هنده‌ك ئامارێن نه فه‌رمێ، هه‌تا نوكه پتر ژ 400 هزار خێزانان ده‌ربه‌ده‌ر بووينه ژبه‌ر تيرۆرستێن داعش ل شنگالێ و ده‌ڤه‌رێن سه‌ر ب ڤه و دۆرێن 10 هزار كه‌سان يێن هاتينه كوشتن و دۆرێن پێنچ هزار زارۆ وژنان ژي هاتينه ره‌ڤاندن و هه‌تا نوكه چاره‌نڤيسێ وان يێ به‌رزه‌يه و ئه‌م بزاڤێ دكه‌ين بۆ بده‌ستڤه‌ئينانا ئاماره‌كا دروست يا كوشتنا خه‌لكێ بێگونه‌ه ل شنگالێ و گوندێ كۆچۆ و هه‌موو ده‌ڤه‌ران و مخابن هه‌تا نوكه حوكمه‌تا عيراقي وه‌كو پێدڤي چو پينگاڤ نه‌هاڤێتنه، به‌لكو هه‌تا كار ب رژدي نه‌كريه كو ئه‌ڤ كاره‌ساته ببيته جينۆسايد”.
مه‌حما خه‌ليل زێده‌تر گوت”:مه‌زنترين كاره‌سات ب سه‌ر خه‌لكێ شنگالێ دا هات و ژبلي تالانكرنێ و مال وێرانكرنێ، ب هزاره‌ها خووشكێن مه كه‌ڤتنه د ده‌ستێن تيرۆرستان دا و نوكه ل سووريێ بازرگاني پێ دهێته كرن و داعش يا ژنان دفرۆشيت و پێدڤي بوو حوكمه‌تا عێراقي و جڤاتا نوونه‌رێن عيراقي ب سه‌دان پێنگاڤ هاڤێتبانه بۆ رزگاركرنا ڤان زارۆ و ژنێن ره‌ڤاندي”.
په‌رله‌مانتارێ كورد يێ خۆلا بۆري يا جڤاتا نوونه‌ران ئاشكرا كركو ئه‌و نامينيت بێ ده‌نگ و دێ هه‌موو شيانێن خوه ئێخيته د كاري دا بۆ تۆماركرنا سكالايێ ل سه‌ر حوكمه‌تا عيراقي و سزادانا كه‌سێن خه‌مسار، چونكو ل دووڤ دستۆري عيراقي، حوكمه‌ت يا به‌رپرسه ژ پاراستنا كێم نه‌ته‌وه‌يان ل عيراقێ، لێ پاراستنا خه‌لكي نه‌هاته كرن و ئه‌م سه‌رۆكێ وه‌زيرێن عيراقێ و وه‌زيرێ مافێن مرۆڤي تۆمه‌تبار دكه‌ين ل سه‌ر ڤي كاره‌ساتا مه‌زن و كوشتنا خه‌لكێ بێگونه‌ه ل شنگالێ و ده‌ڤه‌رێن ب سه‌رڤه و ره‌ڤاندنا زارۆ و ژنان، و دێ فشاره‌كا مه‌زن ئێخينه سه‌ر حوكمه‌تا عيراقي بۆ هندي زارۆ و ژنێن ره‌ڤاندي و وه‌لاتيێن هاتينه كوشتن بگه‌هنه مافێن خوه و تۆمه‌تبار بهێنه سزادان و ئه‌ڤ كاره‌ساته وه‌كو جينۆسايد بهێته هژمارتن”.
مه‌حماي ئاماژه دا وێ چه‌ندێ كو حوكمه‌تا هه‌رێمێ و خه‌لكێ كوردستانێ گه‌له‌ك هاريكاريا ده‌ربه‌ده‌رێن شنگالێ كر و ئه‌م سۆپاسيا حوكمه‌تێ و په‌رله‌مانێ كوردستانێ دكه‌ين بۆ وان پێنگاڤێن هاتينه هاڤێتن ژلايێ وانڤه.
