ل تورکیا و باکورێ کوردستانێ خەلک داخوازا ئاشتیێ دکەت
ئەڤرۆ نیوز:
ل باکورێ کوردستانێ و تورکیا شەر بەلاڤ دبیت و ل پرانیا باژێر و باژێرکێن باکور رێکخستنا جوانان یا سەر ب PKK ڤە و پۆلیسێن تورک د ناڤا شەرەکی دژوار دانە و ل دووڤ ئاگاھیێن ژ سلۆپی و جزیرێ ھاتنە وەرگرتن د شەرێ د ناڤبەرا پۆلیس و لاوێن کورد دا ٣ لاوێن کورد جانێ خوە ژ دەست داینە و دو پۆلیس ھاتینە کوشتن و نەە پۆلیس ژی ھاتینە بریندار کرن.
د ڤێ دەربارێ دا عەدنان سەرۆکێ سازیا مافێ مرۆڤی ل جزیرێ راگەھاند کو دەولەتا تورکیا ل سلۆپی خواست ئەزموونا کۆمکوژیێ دوبارە بکەت لێ ژ بەرخوەدانیا مەزنا گەلێ کورد و ب تایبەت لاوان نەشیان بگەھنە ئارمانجا خوە لێ سێ وەلاتیێن کورد کوشتن و ٥ وەلاتی ژی بریندار کرن و گۆت: (گەلێ کورد ناخوازیت شەر بەرفرەە ببیت و زێدەتر خوین بھێتە رێتن لێ یەک وەلاتی ژی زولم و زۆرداریا دەولەت و حوکمەتا تورکیا قەبوول ناکەت و ھەکە د زووترین دەم دا شەر نەھێتە راوەستاندن دێ کۆنترۆل ژ دەستێ سیاسیان دەرکەڤیت و ھەموو باکور بیتە مەیدانا شەری و ئەو یەک دێ گەلێ کورد ژ تورکیا جودا بکەت).
عەدنانی ئیکە ھەروەسا دیار ژی کر ھەتا نھا ئەو بزاڤێ دکەن رەوشا باژێرێن کوردستانێ ئارام بیت و گۆت: (لێ ھەکە ھێرش وەسا بەردەوام بن ئەز ب ئاشکرا دبێژم تورکیا دێ باکور ب تەمامی ژ دەست دەت و شەر ب تنێ ل کوردستانێ نامینیت دێ ل ھەموو باژێرێن تورکیا ژی بەلاڤ بیت و مەترسیا وێ یەکێ ھەیە کو ئێدی شەرێ گەلان دەستپێ بکەت و ئەڤ یەک د بەرژەوەندیا ھەردو گەلێن کورد و تورک دا نینە و تشتێ خوەیا دکەت سەرۆک کۆمار و کارمەندێن وی ژی بۆ ئاڤاکرنا دەستھەلا خوە دخوازن ڤێ یەکێ بکەن. ئەز ژ گەلێ تورک ژی داخواز دکەم کو داکەڤنە مەیدانان و ل دژی شەرێ کرێت یێ دەولەتێ راوەستن، دا کو ھەردو گەل پێکڤە بژین و دڤێت گەلێ تورک ژی ل دژی شەر ھەلویستێ خوە دیار بکەت).
ھەر د ڤێ دەربارێ دا پارێزگارێ باژێرێ ئاگری یێ باکورێ کوردستانێ ژی راگەھاند کو ئەڤ دو رۆژن شەرەکی دژوار ل دەڤەرێن ئاگری ھەیە و ھەتا نھا سێ سەرباز ھاتینە کوشتن و ھژمارەک ژی بریندار بووینە و گۆت: (ل ھەمبەر ھێرشێن گەریلایان ھێزێن سۆپای ئۆپەراسیۆنەکا مەزن دەستپێکرییە و دبێژن ھەتا ئەم ھەموو تیرۆرستان پاقژ نەکەین ئەم راناوەستین و دێ تۆلا شەھیدێن خوە ڤەکەین).
ل ھەمبەر ئاخڤتنا پارێزگاری سەرۆکێ باژێرڤانیا ئاگری سڕی ساکیک ژی بۆ رۆژناما ئەڤرۆ راگەھاند کو ئەو ل گەل ب ھزاران وەلاتی و ئەندامێن سازیێن سڤیل چووینە دەڤەرێ کو شەر لێ ھەنە و گۆت: (ھەتا ژ دەستێ مە بھێت ئەم ناھێلین شەر دژوار ببیت و ئەم دێ خوە بکەن مەتالێن زندی دا کو گەریلا و سەرباز نەھێنە کوشتن، ئەز داخواز ژ گەریلا و سەربازان دکەم کو بەرێ چەکێن خوە نەدەنە ھەڤدو و نەھێنە یاریا حوکمەتێ و دەولەتا تورکیا، ژ بەر کو سەرۆک کۆمار و سەرۆک وەزیرێن تورکیا دخوازن تورکیا و باکورێ کوردستانێ بکەنە گۆلا خوینێ و دەستھەلاتا خوە ل سەر خوین و رۆندکێن دایکان ئاڤا بکەن).
ل ئالیێ دی ل باژێرێن سێرت، ئامەد، باتمان، وان، مێردین، دێرسیم، ئەرزەرۆم، جۆلەمێرگ، گەڤەر و شەمزینانێ ل گەلەک دەڤەران شەر د ناڤبەرا گەریلایان و سەربازێن تورک دا بەردەوام دکەن و فرۆکێن شەری بێی راوەستیان باکورێ کوردستانێ بۆمبەباران دکەن و ب ھزاران دۆنەمێن ئەردێ چاندنێ ل گەل دارستانان ھاتینە سوتن.
دیسان بزاڤێن بۆ راوەستاندنان شەری ژی بەرفرەە دبن و ئەندامێن پەرلەمانێ تورکیا و شاندێ ئیمرالیێ یێ دانوستاندنا ل گەل حوکمەتێ ، داخواز ژ وەزیرێ دادێ یێ حوکمەتێ کرن کو رێ خوەش بکەت دا کو سەرەدانا عەبدوللا ئۆجەلان سەرۆکێ PKK بکەن و د ھەمبەر دا حوکمەت و وەزارەتا دادێ راگەھاندن کو ھەتا PKK ژ ئاخا تورکیا دەرنەکەڤیت دەلیڤا ھەڤدیتنا ئۆجەلانی و شاندێ ئیمرالیێ دروست نابیت، ل سەر داخۆیانیا حوکمەتێ ژی سەرکردایەتیا PKK ل قەندیلێ راگەھاند کو ھەتا ل گەل سەرۆکێ خوە نە ئاخڤن ئەو بریارا ڤەکێشانا ژ ئاخا باکورێ کوردستانێ و تورکیا نادەن و دڤێت تورکیا پێنگاڤان ب ئاڤێژیت و ھێرشێن خوە بدەتە راوەستاندن و ئاشکرا کرن کو ھەتا نھا وان دەست ب ھێرشان نەکرینە و ب تنێ چالاکیێن خوە پاراستنێ و بەرسڤدانێ ئەنجام ددەن، لێ ھەکە وەسا بەردەوام بکەت دێ دەست ب ھێرشێن مەزن کەن.