ئامیرێن ئەلکترونی و ئەنترنێت گەفا ل بیردانکا مرۆڤی دکەن
ئەڤرۆ نیوز:
کریارا ڤەگەراندنا پێزانینان کریارەکا کاریگەرە بۆ پەیداکرنا بیردانکەکا بەردەوام، ل ھەمبەر ڤێ چەندێ ژی دوبارە لێگەریانا پێزانینا ب ئەنترنێتێ بیردانکەکا ب ھێز پەیداناکەت کو بۆ دەمەکێ درێژ ڤەکێشیت.
ڤەکولینەکا بریتانی کو ل زانکۆیا بیرمینگھام ھاتبوو ئەنجامدان دیارکریە، پالپشتیا زێدە ل سەر ئامیرێن ئەلکترونی و ئەنترنێتێ و لێگەریان ل دووڤ پێزانینا بیردانکا مرۆڤی بێھێز دکەن، ل دووڤ ڤەکولینێ دیاردبیت کو گەریان ل دووڤ پێزانینا دبیتە رێگر ل ھەمبەر ڤەگەراندنا بیرھاتنا ل پاشەرۆژێ.
وێ ڤەکولینێ شەش ھزار کەس ل بریتانیا و فرەنسا و ئەلمانیا و ئیتالیا و ئیسپانیا و بەلچیکا و ھولەندا ب خوە ڤە گرتبوون، و دیاربوو کو سێتکەک ژوان کەسێن پەنایێ دبەنە ئامیرێن کومپیوتەری و ئامیرێن دی یێن ئەلکترونی بۆ ڤەگەراندنا پێزانینا و دیاربوو کو رێژا ھەرە مەزن ل بریتانیا ب ڤی کاری رادبن، و نیڤەک ژ خەلکێ وان ئامیرێن ئەلکترونی ب کاردئینن بۆ بیرئانینا پێزانینان.
ئەو ڤەکولین دیاردکەت کو پالپشتیکرن ل سەر کومپیوتەری ب ڤێ رێکێ کارتێکرنەکا دومدرێژ ھەیە ل سەر پێشڤەبرنا بیردانکێ، چونکو ئەو پێزانینێن ب رێکا لێگەریانێ ب دەست مرۆڤی دکەڤن زوو دھێنە ژبیرکرن، ڤەکولەران ئاماژە ب وێ چەندێ کر کریارا ڤەگەراندنا پێزانینان کریارەکا کاریگەرە بۆ پەیداکرنا بیردانکەکا بەردەوام، ل ھەمبەر ڤێ چەندێ ژی دوبارە لێگەریانا پێزانینا ب ئەنترنێتێ بیردانکەکا ب ھێز پەیداناکەت کو بۆ دەمەکێ درێژ ڤەکێشیت.
