لیوایێ خانەنشین جەمیل محەمەد مستەفا به‌حس ل بيره‌وه‌ريێن خوه دكه‌ت
ئه‌ڤرۆ نيوز:
لیوایێ خانەنشین جەمیل محەمەد مستەفا عومەر ئاغا، ژ دایک بوویێ سالا 1932 ل سالا 1953 ل کولیژا سەربازی ل بەغدا ھاتیە وەرگرتن، پشتی دەرچووی ژ کەسێن ھەرە سەرکەفتی ھاتیە ھەلبژارتن بۆ کولیژا سەربازی یا شاھی یا (ساند ھێرست) ل وەلاتێ ئنگلتەرا دھیتە وەرگرتن، ل رێکەفتی 26/7/1956 ژ کولیژا ناڤبری دەردچیت و پشتی 38 سالا خزمەتا لەشکەری یا عیراقێ دا، ل سالا 1989 ھاتیە خانەنشسنکرن، نوکە ژی سێ کورێن وی ئەفسەرن د ناڤا پێشمەرگێ کوردستانێ دا و پشتی ڤی ماوەی و ھەتا نوکە بەردەوامە ل سەر کارێ وەرگێرانێ و چەندین پەرتووک بۆ زمانێ ئینگلیزی وەرگێراینە و بەرۆڤاژی، دیسا چەندین پەرتووکێن مێژوویی چێکرینە.
پشتی پێشوازیەکا گەرم ل ستافێ رۆژناما ئەڤرۆ کری، ل گەل بەرسڤدانا پرسێن مە، لاپەرێن ئەلبوومێن وێنێن خوە ڤەدان و وێنە وێنە ب بیرھاتن و یادگاری بۆ مە شرۆڤەدکرن.
لیوایێ خانەنشین جەمیل محەمەد مستەفا بێسری، د دیدارەکا رۆژناما ئەڤرۆ دا بەحسێ ژیانا خوە و سەربورا خوە یا لەشکەری ل کولیژا لەشکەری دکەت، دیارکر کو پشتی سالا 1953 کولیژا سەربازی ھاتیە وەرگرتن و ژ قوتابیێن ھەرە زیرەک بوویە، ل گەل پێنچ قوتابیێن دی سالا 1954 ھاتە رەوانەکرن بۆ کولیژا مەلەکی یا بریتانی و ئەڤە پشتی دو سالا و نیڤا دزڤریتە عیراقێ و ل کولیژا سەربازی وانا دبیژیت.
لیوا جەمیل گۆت: دەمێ چووینە بریتانیا بۆ خواندنا سەربازی، وی دەمی (عومەر عەلی) ل کولیژا سەربازی بوو ل بەغدا و پشتی ئەم ژێگرتین وەک کەسێن سەرکەفتی، دیسا مە تاقیکرنا زمانێ ئنگلیزی کر و ئەم 20 قوتابی بووین و ئەز ژ وێ تاقیکرنێ ژی یێ ئێکێ دەرکەفتم، ئەگەر چ بوو ئەز یێ ئێکێ دەرکەتیم ل قوناغا سەرەتایی وەکی قوتابی مە مامۆستایێ مەسیحی ھەبوو یێ زمانێ ئنگلیزی و گەلەکێ زیرەک بوو و خەمخور بوو و من ھەتا نوکە وانێن وی ژبیرنەکرینە و ئەڤە بوو ئەگەر ئەز ب زمانێ ئنگلیزیی یێ زیرەک بم، دیوارێن پۆلامە شەشێ ھەموو زمانێ ئنگلیزی بوون و ھەتا نوکە ئەو ئاخفتن من ل بیرن، وی مامۆستایی بنیاتەک بۆ من دانا و ھەتا ئەز گەریام ل مووسل مالا وی دا سۆپاسیا وی بکەم کو ئەو ئەگەر بۆ ئینگلتەرا ھاتیمە وەرگرتن، لێ ئەز ب سەر مالا وی نە ھلبووم.
لیوایێ خانەنشین جەمیل ئەو ژی گۆت: ئەز ئێکەم کورد بووم چوویمە ڤێ کولیژا سەربازی ل لەندن ل بریتانیا و پشتی من ئێکێ دی چو ئەز بێژم گەرگەری بوو، ئەڤە باشترین کولیژا سەربازی یە ل جیھانێ ھەموویێ و ھەتا نوکە ژی مایە.
ھێشتا گۆت: ل ئاھەنگا دەرچوونا مە ل لەندەن شاھێ عیراقێ مەلیک فەیسەل ھاتبوو لەندن ب کارەکی و ھاتە ئاگەھدارکرن کو شەش قوتابیێن عیراقێ دێ دەرچن ژ کولیژا سەربازی یا بریتانی و شاە فەیسەل ژی گۆت مادەم عیراقی د ناڤ دا ھەنە دێ بەرھەڤ بم ل ئاھەنگا دەرچوونێ.
لیوا جەمیل گۆت ژی: پشتی زڤرین ھەر ئێکسەر بووینە مامۆستایێن کولیژا سەربازی ل بەغدا و گەلەک ئەفسەرێن پلە بلندێن عیراقێ ژ بن دەستێن من رابووینە، ژ وانا سەرۆک ئەرکانێ عیراقێ یێ بەرێ (عەبد جواد) چونکە ئەڤە قوتابیێ من بوو و ببوو سەرۆکێ ئەرکانێ عیراقێ، سالانە ناڤێ من بلندکر کو پلا من بلند بیت، لێ چونکو بەعسی نەبووم و کورد بووم، سەدام حسێن ناڤێ من رەشکر و نەھێلا پلا من بلند بیت و ھەتا دووماھیێ پشتی ھاتیمە مووسل و شیانێن من پتر دیاربووین د راھێنان دا د بیاڤێ سەربازی دا پلا من ھات و بلند بووم بوومە لیوا.
لیوا جەمیل بەحسێ سەربورا خوە دکەل ل گەل چێبوونا شورەشا 14 تەموزێ، ئەز ل یانا عسکەری بووم و مە خولەک بۆ ئەفسەرا ڤەکر بوو بۆ راھێنانان، دا ژ پرێ دەرباز بم دبینم رێیا گرتی یە و لەشکەری گۆتە من قەدغەیە ھێژا تۆ بۆری، من گۆتێ بوو گۆتنە من شورەشە، من گۆتێ کورێن من نابیت دڤێت بچم ئەفسەرێن ل ھیڤیا من رێیا من بکەن و ئەز بوریم، چوومە قوتابخانا لەشکەری و جھێ راھێنانێ و من ئەفسەرێ نوبەدار ل سەر تشتێ من دیتی من ھایدارکر و وی ژی ھەموو ئەفسەر ژ خەو راکرن و چەک ھەلگرتن و ھێرش کرنە قەسرا شاھێ عیراقێ، ب دیتنا من ئەو ئەفسەر ئینابوونە وێرێ بۆ ھێرشا سەر شاە فەیسەل، چونکو ئەم نێزیکی قەسرا مەلیک فەیسەل بووین.
گۆت ژی: ب دتینا من ھەکە ئەز ھێرشێ بکەمە سەر ڤی باژێری، چونکو باژێرەکێ مەزن و ئاڤ د نیڤێ دا ھەیە، پێدڤی ئەڤ لایە دەسپێکێ بھێتە رزگارکرن، چونکە ئەڤ ھێزە وەکی یا لایێ دی نینە، ل دووڤ دا لایێ دی، یان دێ دورماندوری موسل گری و دێ قەپات کەی، یان دێ رێیەکێ بۆ ڤەکەی و دێ چەند رۆژان دەلیڤێ دەیێ برەڤن و ئەڤە بۆ پاراستنا گیانێ وی خەلکی کو پتر ژ ملیۆنەکێ مرۆڤ تێدانە و دا گیانێ خەلکی و ژن و زارۆکان یێ پاراستی بیت، ھەکە ڤیان بچنێ شێن پشتی ژ باژێری دەر دکەڤن بچنێ لێ ڤێت گیانێ خەلکی بەری ھەر تشتەکی ل بەرچاڤ بھێتە وەرگرتن و ئەڤە تاکە رێیە بۆ ئازادکرنا مووسل، ئوپراسیونێن تایبەت نابینم سەرکەفتی چونکە ھێزا داعش ل مووسل گەلەکە و دو سالە گەل خەلکی دژیت و چوویە دناڤ دا، دبینم دێ رەڤن و تایبەت ئەگەر بۆ رێکەک ھێلا، ئەو شەری نەشێن بکەن.
لیوایێ خانەنشین جەمیل محەمەد مستەفا بەحسێ چوونا پێشمەرگەی کر بۆ شەرێ مووسل و گۆت: ب بۆچوونا من پێشمەرگە بلا پشکداری شەرێ ئازادکرنا مووسل بیت و ل گەل لەشکەرێ عیراقێ و ھەڤپەیمانان، لێ پێشمەرگە بلا نەچیتە ناڤ سەنتەرێ مووسل، دبینم بابەتێ کەرکرنا پارێزگەھا نەینەوا دێ ئالوزی کەڤنێ، چونکە بۆچوونێن جودا ھەنە، لەوما ھەر شتی خوە بمینت باشترە، لێَ ھەر ئێک دەستھەلاتێ دەڤەرا خوە بکەت، بێژم بلا ئارمانجا ھەموو ھێزێن پشکدار ب تنێ رزگارکرنا مووسل بیت ژ دەستێن ڤان تیرۆرستان.
