حه‌يده‌ر عه‌بادى بۆ ڤێ مه‌ره‌مێ گه‌هشته كه‌ركووك
ئه‌ڤرۆ نيوز:
حه‌يده‌ر عه‌بادى سه‌رۆك وه‌زيرێن عيراقێ گه‌هشته پارێزگه‌ها كه‌ركووك و بڕياره دو ته‌وه‌رێن سه‌ره‌كى ل گه‌ل ئيدارا پارێزگه‌هێ و وه‌ڤده‌كێ ئێكه‌تى نشتيمانى كوردستان ل سه‌ر ئاستێ بلند گه‌نگه‌شه بكه‌ت كو ئه‌و ژى بابه‌تێ رزگاركرنا حه‌وێجه و په‌ترۆلا پارێزگه‌هێ نه.
عه‌بادى ل فرۆكخانا له‌شكرى يا كه‌ركووك ژ لايێ نه‌جمه‌دين كه‌ريم پارێزگارێ كه‌ركووك و ژماره‌كا ئه‌ندامێن جڤاتێ هاته پێشوازيكرن.
هه‌ر وه‌كو خه‌ندان ژ ژێده‌ره‌كێ ناڤا جڤاتا وه‌زيرێن عيراقێ به‌لاڤكرى حه‌يده‌ر عه‌بادى دو مه‌ره‌م يێ ب سه‌ره‌دانا خوه هه‌ين كو يا ئێكێ دێ ل گه‌ل ئيدارا پارێزگه‌هێ و يا دويێ ژى ل گه‌ل وه‌ڤده‌كێ بلندێ ئێكه‌تيێ گه‌نگه‌شه كه‌ت.
ته‌وه‌رێ ئێكێ دێ دانوستاندنێ ل سه‌ر ئۆپه‌راسيۆنا ئازادكرنا قه‌زا حه‌وێجه بيت كو ل ناڤه‌راستا 2014ێ ل گه‌ل چار ناحيێن دى يێن كه‌ركووك كه‌فتيه ده‌ست چه‌كدارێن داعش كو بڕياره ئازادكرنا وێ ل گه‌ل ئۆپه‌راسيۆنا رزگاركرنا مووسل بيت.
بۆ ڤێ مه‌ره‌مێ ژى عه‌بادى دێ ل گه‌ل پارێزگارێ كه‌ركووك و هێزێن ئه‌منى يێن وێ پارێزگه‌هێ دانوستاندنێ ل سه‌ر كه‌ن و سه‌ره‌دانا هێزێن پێشمه‌رگه‌ى و هێزێن دى كه‌ن كو ب گۆره‌ى وى ژێده‌رى حه‌شه‌د شه‌عبى ژى ئێكه ژ وان هێزێن ل وێرێ دێ پشكداريێ كه‌ت كو دێ ژ كووراتيا كه‌ركووك ده‌سپێكه‌ت.
ته‌وه‌رێ دويێ يێ سه‌ره‌دانا عه‌بادى ب گۆره‌ى هه‌مان ژێده‌ر بۆ دانوستاندنێ يه ل سه‌ر پرسا په‌ترۆلا كه‌ركووك كو دێ ل گه‌ل شانده‌كێ بلندێ ئێكه‌تى نشتيمانى كوردستان گه‌نگه‌شه كه‌ت و به‌حس ل چاوانيا ره‌وانه‌كرنا وێ هێته كرن بۆ بازارێن جيهانێ.
ب گۆره‌ى پێزانينێن هاتينه به‌لاڤكرن بڕياره سه‌رۆك وه‌زيرێن عيراقێ حه‌يده‌ر عه‌بادى د هه‌مان رۆژ دا ڤه‌گه‌ريته به‌غدا.
