جفش و خووشكێن خوه
ل دووڤ پێش دیتنان ل پشتى ب دووماهی ئینانا داعشا خویناوى و فلمێ وێ یێ ترسێ، دێ رێخستۆیه‌كا دی هێته پێش كو ب هه‌مان مه‌ژی هشكیێ و سه‌نى و مه‌نیان بیت، بۆیاغه‌كا ئیسلامى دێ تێده‌ن و دیسا به‌رده‌نه ده‌ڤولێڤێن خه‌لكه‌كێ بێگونه‌ه و هه‌ژارڤه، ئه‌ڤ رێخراوه پێش دیتنا هه‌مى كه‌سان بووینه، چونكو فێر بووینه كو سیناریۆیه‌كا ئاشكرا دێ هێته دانان و هنده‌ك لایه‌نێن زلهێز دێ سپۆنسه‌ریا وێ كه‌ن، مه گه‌له‌ك دیتن و گوه لێ بوون، هه‌ر ژ پێش رێخستیا ئه‌لقاعیده و جه‌بهه ئه‌لنوسڕه و داعش و ماعش و ئه‌ڤه پشتى كو عیراق ژێ دهێته رامالین دێ شه‌ڕه‌كێ دژوار هێته ڤه‌گوهاستن بۆ سووریێ ل وێرێ ژى هه‌كه داعش هاته رامالین هه‌ر ژ نها ئه‌ڤه ئه‌و رێخستیا دبێژنێ (له‌شكرێ رزگاركرنا شامێ) یانكو جیش فه‌تح شام دێ هێته مه‌یدانێ و خودێ دزانیت دێ ب چ شێوه داهێنانێ د كوشتنێ دا كه‌ت و خرابیێ و خوینێ رێژیت، جفش خیشكا داعشێ یه و ل به‌ره ئێكگرتنه‌ك بهێـته كرن د ناڤبه‌را وێ و جه‌بهه نوسره دا و پێكڤه خرابیێ بگه‌هینن و دێ ره‌وشێ ژ كۆچكى به‌ن به‌ر ب ته‌نوویرێ، شه‌ر شه‌رێ پیتانه و سه‌رده‌م یێ بوویه پیتێن حزبان، ل ره‌خه‌كى پیتێن عه‌ره‌بینه و ل یێ به‌رامبه‌رى ژى پیتێن ئنگلیزى ل هه‌مبه‌رى هه‌ڤ ئاگرن، دو سێ هزر و ئایدۆلۆجینه و سه‌د حزبن، پۆلینكرنێن هوورن هه‌ر سه‌ره‌ك و حزبه‌ك و كه‌س خوه ناده‌ته ب كه‌سێ، حزبێن وان ب ناڤێ بهه‌شتێ هه‌ڤركیێ ل سه‌ر كوشتنێ و توندوتیژیێ دكه‌ن، حزبێن مه ژى ب ناڤێ نه‌زاهه‌تێ گه‌نده‌لیێ ژێك ڤه‌دچرن، پیتێن لاتینى ژى وه‌لێهاتینه كه‌س ژێك جودا ناكه‌ت، په‌كه‌كه و په‌ژه‌كه و یه‌ده‌په و یه‌نه‌كه و په‌ده‌كه و قه‌ده‌په و …هتد. ئه‌ڤ پۆلینكرنه ئێكرێزیا مالا كوردى تێك دده‌ت و دۆزا وێ یا ره‌وا به‌ر ب لاوازیێ ڤه دبه‌ت، به‌لێ یێن وان دژاتیا وان ڤیگه‌را خرابیێ و مه‌ژی هشكیێ وه‌كو گلۆلكا به‌فرێ لێ دهێت، ڤان رێكخراوان هژمارا پیڤانێ یا خرابیێ شكاند و ژ هه‌مى جیهانێ هاتین و ل بالگێ مه خوه جهنشین كرن، گه‌له‌ك لایه‌نێن مه‌زن یێن ل ده‌وروبه‌رى ڤێ پارچا شاریای كه‌یسا خوه ل هزرا ئیسلامێ دگرن و هنده‌كێن ساوێلكه بۆ خوه دكه‌نه چه‌ته و ب كونترۆلى دئینن و دبه‌ن، ئه‌ز وه‌سا دخوینم كو رۆسیا ژى ته‌خسیریێ ناكه‌ت ل گۆره‌پانا سووریێ، چونكو دخوازیت ته‌ڤنێ وێ گه‌له‌ك ئالۆز بیت و ده‌ست وه‌ردانێ بكه‌ت، به‌لكو ده‌ینێن خوه ژ سه‌ر پاتكا رژێما سووریى بزڤرینیت و بازرگانیا خوه گه‌شه بكه‌ت، ل سه‌ر خوینا هه‌ژاران چاوا جه‌مسه‌رێ دى ژى ب سه‌رێ مه ئینا!. ئه‌و دخوازن دونێ مه د سه‌رێ مه بده‌ن، له‌ورا ڤالاهیه‌كا گونجاى په‌یدا بوو ل شامێ كو بۆ خوه جفش بكه‌ته جه‌حش و خه‌له‌كا دویێ ژ زنجیرا داعش یا دوبلاجكرى به‌رده‌وام بكه‌ت، گرۆڤه‌یا ڤێ په‌یڤینێ هه‌كه مرۆڤ بسه‌لمینیت، به‌رێ خوه بده‌ینه داعش ژ لایه‌نێ هزرێ و سه‌روبه‌رێ خوه ڤه چه‌ندا پاشكه‌فتى یه و چه‌ند سالان سه‌ره‌ده‌ریا خوه زڤرانده به‌رێ، به‌لێ ژ لایه‌كێ دى ڤه چه‌ندا ب هێزه و عه‌قله‌كێ ره‌هایێ یێ برێڤه دبه‌ت، كو ئه‌ڤ زلهزێن جیهانێ نه، نها د شه‌رى دا سه‌ره‌ده‌یا وان ژ لوتكه‌یا سه‌ربازى كریارێن خوه دكه‌ت، گه‌له‌ك ب ته‌كنیكه‌كا شرۆڤه‌كری و پێشكه‌فتى پیلانێن خوه ئه‌نجام دده‌ت، چاوا خاپاندنێ دكه‌ت، پێ نه‌ڤێت ژى سه‌رده‌ریا وان به‌رۆڤاژى وێ ئێكێ یه، وان كریاران دكه‌ت یێن چ ئه‌قل باوه‌ر نه‌كه‌ت، زێده‌بارى هاتنوچوونا وان ژ وه‌لاتێن جیهانێ هه‌ر وه‌كو هه‌مى ترانزێتن، گه‌له‌ك ده‌وله‌تان پێ چێ نابیت بكه‌ت، ئه‌ڤ هه‌مى گرۆڤه بۆ مه دسه‌لمینن كو ده‌وله‌تێن مه‌زنن پشته‌ڤانیا ڤان جفش و داعشان دكه‌ت و ب مه‌را به‌ردده‌ن.. مه دكوژن و دئێنه به‌هیا مه.
