سه‌رۆك بارزانى: پێدڤیه رێز ل رایا گشتى یا كوردستانێ بهێته گرتن
ئه‌ڤرۆ نیوز:
سه‌رۆك بارزانى د پێشوازیا شانده‌كێ ناڤه‌ندى یێ دیالۆگا رافیده‌ین كو ل ژماره‌كا كه‌سایه‌تى و نوخبه و په‌رله‌مانتار و میدیاكارێن عیراقێ پێكهاتبوو ئاماژه ب پرسا مافێن گه‌لێ كوردستانێ كر د بڕیاردانا ل سه‌ر چاره‌نڤیسێ خوه و دیاركر كو پێدڤیه رێز ل رایا گشتى یا كوردستانێ بهێته گرتن و ل چ جهه‌كێ جیهانێ ژێكڤه‌كرنا ب زورى سه‌رنه‌گرتیه و گۆت” سه‌ربه‌خوییا كوردستانێ دێ پرۆسه‌یه‌ك بیت دوورى توندوتیژیێ و دڤێت ب لێكتێگه‌هشتن و ژ پێخه‌مه‌ت چاره‌كرنا بنه‌ره‌تى یا كێشان بیت”.
بارزانى ئاماژه ب بزاڤێن خوه و مام جه‌لال كرن د قوناغا پشتى ژ ناڤچوونا رژێما به‌عس د پرسێن هاریكاریكرنا لایه‌نێن عیراقێ بۆ نڤیسینا دستوور و پێكئینانا عیراقه‌كا دیموكرات و فیدرال كو مفا ژ ئه‌زموونا هه‌رێما كوردستانێ بهێته وه‌رگرتن كو شاشیێن بوورى دووباره نه‌كه‌ن، به‌لێ كریار و بڕیارێن حوكمه‌تا عیراقێ به‌روڤاژى وان بنه‌مایان بوو كو د دستورى دا هاتیه بنه‌جه كرن و كار گه‌هشته تۆلڤه‌كرن و كووربوونا تایفه‌گه‌ریێ و ئابلوقه‌دانا پێشمه‌رگه و گه‌ف كرن ل كوردستانێ و ل دووماهیێ برینا قویتێ خه‌لكێ كوردستانێ، ئه‌ڤ هه‌موویه رامانا شكه‌ستنا ته‌وافوق و فیدرالیه‌تێ و بنه‌مایێن شه‌راكه‌تێ یه و گه‌لێ كوردستانێ نه ژێ به‌رپرسه.
