گورەپانەکا دەخلودانی ل باتێل دھێتەچێکرن
ئەڤرو نیوز: نەوزاد ھلۆری:
ب مەرەما پشتەڤانیکرنا جوتیاران و باشترکرنا رەوشا چاندنێ ل سنوورێ ناحیا باتێلێ و دەشتا سلێڤانەیا ، گورەپانەکا کومکرنا دەخلودانی ل باتێل دھێتە درۆستکرن.
دڤی واریدا “وەلید عەرەب سلێڤانەی “بەرپرسێ کوگەھا چاندنێ ل ناحیا باتێل بۆ ئەڤرو نیوز گۆت: (ب مەرەما پشتەڤانیکرنا جوتیاران و وان کەسانێن کو دەخلودانی دکەن مە ب فەردیت کو گورەپانەکا کومکرنا دەخلودانی ل سنوورێ ناحیا باتێلێ و دەشتا سلێڤانەیان درۆست بکەین داکو جوتیار دەخلودانێ خوە تێدا کوم بکەن ھەتاکو د فرۆشن و توشی چوو ئاریشەیان نەبن)
زێدەتر گۆت: (ئەڤ گورەپانە لسەر رووبەرێ چوار دونەمێن عەردی ل گوندێ باوەردێ یا سەر ب ناحیا باتێلێ دھێتە چێکرن ، کو پێکدھێت ژ چوار بانکەران و ھەر بانکەرەک ژی لسەر رووبەرێ ٥١م×٢١م ب بلنداھیا ٢م ھاتیە چێکرن و کومپانیا ھاشان دێ ب ئەرکێ درۆستکردنێ رابیت)
بەرپرسێ کوگەھا چاندنێ ل ناحیا باتێل دیارکر ژی کو ئەڤ سالە ل سنوورێ رێڤەبەریا وان ١٠٠ ھزار دونەمێن عەردی ب دەخلودانی ھاتیە چاندن و دھێتە پێشبینیکرن کو رێژەیەکا زورا دەخلودانی بھێتە بەرھەمئینان و چێکرنا ئەڤێ گورەپانێ دێ زێدەتر چاندن ل ناحیا باتێل ھێتەکرن.
