موزیکا سلاڤا کۆماری یا دەولەتا کوردستانێ ھاتەچێکرن
ئەلمانیا، ئەدیب چەلکی:
موزیکا سلاڤا کۆماری یا دەولەتا کوردستانا سەربخۆ ژ لایێ موزیکڤانێ مەزنێ کورد مامۆستا دلشاد محەمەد سەعیدی ڤە ھاتەچێکرن، ل دەسپێکێ مامۆستای نۆتێن ڤێ سلاڤێ (کو ئاوازا سروودا نشتیمانی ئەی رەقیبە) بۆ ئۆرکێسترایێ نڤیسین و پشترا ل گەل تیپا نشتیمانی یا سەمفونی یا چیکی ل پراگ ب رەنگەکێ گەلەک جوان و سەرکەفتی ئەنجام دا.
ئەڤە چەند مەھە ئەڤ کارە ھاتیە ئەنجامدان و ل ڤان نێزیکان دێ ب ئاوایێ سی دی و دیزاینەکا جوان ھێتە بەرھەڤکرن. ئەڤ کارە ھەموو ب ئاگەھداری و پشتەڤانیا حکوومەتا ھەرێما کوردستانێ ھاتەکرن و بڕیارە دگەل راگەھاندنا دەولەتا سەربخۆیا کوردستانێ ل سەر ھەموو بالەفڕخانێن جیھانی و ناڤخۆیی بھێتە بەلاڤکرن.
ئەڤە رەنگێ ئێکێ یە ژ ڤێ سلاڤێ و تایبەتە بۆ پێشوازیا سەرۆکێ دەولەتا کوردستانێ ل بالەفڕخانان، ڤی رەنگی ئامیرێن بایی پتر تێدا ھەنە. رەنگێن دویێ و سیێ دێ ب ئاوایەکێ دی بن و کێمتر ئامیرێن بایی تیدا بن، چونکی پڕۆژێ مامۆستا دلشادی ئەوە کو ل پاشەڕۆژەکا نێزیکی وان دو رەنگان ژی ب ڤی ئاوایێ ژێری ئەنجام بدەت، دو: دانەیەکا تایبەت بۆ یاریگەھێن نێڤدەولەتی یێن وەرزشی، چاخێ تیما کوردستانێ پشکداری یاری یێن نێڤدەولەتی دبیت. سێ: موزیکا ڤێ سروودا نیشتمانی (ئەی رەقیب) دگەل دەنگێ چەند نموونێن بژارە ژ ھونەرمەندێن ھەر چار ئالی یێن کوردستانێ، دێ ھێتە تۆمارکرن.
پێشنیار ئەوە کو پەیڤێن سروودا ئەی رەقیب ب ھەردو زاراڤێن سووررانی و کرمانجی (نیڤ ب نیڤ) بھێنە تۆمارکرن “لەورا ئەز وەکو ئەدیب چەلکی رابووم من پەیڤێن سروودا ئەی رەقیبب ب ئاوایەکێ گەلەک جوان و ب ھەمان کێشا ھەلبەستا نەمر دلداری دانای کرە کرمانجی ژی. لێ نھا تنێ رەنگێ ئێکێ ھاتە ئەنجامدان و ئەڤێن دی مانە بۆ پاشەڕۆژەکا نێزیک”.
چیڕۆکا بەرھەڤکرنا ڤی کاری کر و دیار کر، ل دەسپێکا مەھا ئیلۆنا سالا چوویی، حکوومەتا فرەنسا ب رێکا ئەنستیتوتا کوردی ل پاریس، داخواز ژ موزیکڤانێ کورد دلشاد محەمەد سەعیدی کر کو نۆتێن سروودا نشتیمانی یا کوردستانێ بۆ فڕێ کەن، داکو تیپا موزیکا عەسکەری یا فرەنسا – گاردا کۆماری، وێ موزیکێ لێ بدەت، د رێورەسمێن پێشوازیکرنا سەرۆک مەسعود بارزانی دا و ب ئاوایەکێ فەرمی ل حەفتی مەھا ئیلونا ٢٠١٦ ل قەسرا ئەلیزێ ل پاریس لێ بدەن، لێ مخابن دەم گەلەک کێم مابوو و وی دەمی نەیا ئامادە بوو، لەورا نەھاتە لێخستن، پشتی ھینگێ مامۆستا دلشادی حکوومەتا ھەرێمێ ئاگەھدار کر و وێ ژی ب سوپاسی ڤە داخواز ژ مامۆستا دلشادی کر کو ئامادە بکەت. وی ژی بەری چەند ھەیڤان ئامادە کر و ب تنێ چێکرنا دیزاینی مایە بۆ جوانکرنا کاری.
