تو چ ژ گوندێ شرێ دزانی
ئەڤرۆ نیوز ، نەوزاد ھلۆری:
گوندێ شرێ ئێکە ژ وان گوندێن دەڤەرا بارزان کو زورترین رێژەیا ئەنفال و جینوسایدان تێدا ھاتیەکرن و چەندین جاران ژی ژلایێ رژێما عیراقێ ڤە ھاتیە خراپکرن ، موختارێ گوندێ ناڤبری دیارکر کو رونشتڤانێن گوندێ شرێ زورترین رێژەیا جلوبەرگێن کوردی دکەن بەرخوە ل کوردستانێ.
حەسەن خورشید موختارێ گوندێ شرێ یا سەر ب دەڤەرا بارزان دیارکر کو ل گوندێ وان 181 کەس ھاتینە جینوسایدکرن و بۆ ئەڤرۆ نیوز گۆت: (درۆژەکا رەش و درەندەیی دا رژێما بەعس ب سەر خەلکێ گوندی دا گرت و 181 کەس ژ رەگەزێ نێرینەیێ گوندی دناڤبەرا ژیێ 10 سال بو 70 سالیێ دا گرتن و پاشان د چەند ئوردوگایەکان دا کومڤەکرن و بەر ب باشوورێ عیراقێ برن و ل گەل ھەشت ھزار بارزانیان ب ساخی بن ئاخکرن کو ھەتا نھا ژی کارڤەدانێن ئەڤێ جینوسایدێ لسەر خەلکێ گوندی ددیارن ب تایبەتی ژی لسەر ژنان ژبەرکو پشتی چوونا زەلامان ئێدی ژیان کەفتە سەر ملێن ژنان و رێڤەبەریا مالێ و بخودانکرنا زاروان گەلەک گران بوو ، و ل چەند رۆژێن بھێت ژی دێ سالڤەگەرا وان ھێتە ساخڤەکرن)
زێدەتر گۆت: ( گوندێ شرێ پشتی سەرھلدانێ جارەکا دن ھاتە ئاڤاکرن و خەلکی دەست ب ژیانەک نوو لژێر سیبەرا حکومەتا ھەرێما کوردستانێ دیت ، و نوکە گوندی َمە ژ 215 خێزانان بخوڤە دگریت کود بیتە 780 کەس و ژیانا وان لسەر تەرش و کەوال و چاندنێ یە ، و پشکەکا دن ژی لسەر پێشمەرگایەتی و فەرمانبەریێ یە و ب رەنگەک سادە ژیانا خوە د بورینن)
موختارێ گوندێ شرێ ل بارا ھەستا نەتەوایەتی و کوردایەتی دیارکر کو زورترین رەفتار و سالوخەتێن کوردایەتی دناڤا خەلکێ گوندێ شرێ ھەنە و گۆت ژی: ( گوندێ شرێ ژ رێژبەندا وان گوندێن کوردستانێ یە کو زورترین رێژەیا جلوبەرگێن کوردی تێدا دھێنە بکارئینان ، و دیسان ل گوندێ مە زورترین ئازادی بو ئارفرەت و رەگەزێ مێ ھاتیە بەرجەستەکرن کو ب ھیچ شێوەیەکێ زورداری و زولم ل وێ ناھێتەکرن ، و ئەگەر ل دەڤەرێن دن نەخت بەرامبەر شوکرنا کچێ بھێتە وەرگرتن و ب زوری بھێتەدان بو شوکرنێ و ب بێگورکانێ بھێتەدان ل گوندێ مە ئەڤ یەک نینە و کچ و کور ئازادن د ھەلبژاردنا کەسا بەرامبەر ، ھەردسان گوندێ مە د ھەموو رویەکێ ڤە ھەڤکاریا ھەڤدوو دکەن مینا زوبارە و کاروبارێن مالێ ، ئەڤە سەرەرای کو ئەگەر کەسەک نەخوش بو یان ئەگەر تازیەک درۆست بوو ھەموو گوند پێکڤە پشکدارن د چارەسەرکرن و ب رێڤەبرنا رێورسمێن تازیی َکو ئەڤ یەک ژی جوانترین رەفتارە ل ھەرێما کوردستانێ ، ھەردیسان ل مەھا ئیلونا ئەڤ سالە دێ ریفراندۆم بو سەربخویی یا کوردستانێ ھێتەکرن دخوازین کو ھەموو وەلاتیێن گوندی و تەڤایا کوردستانێ ب گەرما و گەرم پشکداریێ تێدا بکەن داکو ئەڤ خەبات و قوربانیدانا ھندە سالەیا کوردستان بەر ئاڤ دا نەچیت و ئەم ژی ل سایا حکومەتا خوە و سەرکرداتیا کوردی و لژێر ئالا پیروزا کوردستانێ ژیانەک ئامارام ببوورینین )
پشتی سەرھلدانێ حکومەتا ھەرێما کوردستانێ چەندین جورێن خزمەتگوزاریێن مینا کارەبا و ئاڤ و جاددە و قوتابخانە بو گوندێ شرێ درۆستکرینە ، دڤی واریدا موختاری گۆت: ( حکومەت ھندی خزمەتگوزاریەکێ بکەت ، خەلک دێ ھەر داخوازکەت بەلی َدڤێت ھەر ئێک ژ مە ل گورەی پێدڤیێن خوە داخوازیان ل حکومەتێ بکەت )
