زانایه‌كێ بیانی بناڤێ (ڤیكتور گوزان) دبێژیت (ئازادیا راست ئه‌و نینه‌ یا كو هه‌ر تشته‌كێ مروڤی بڤێت ئه‌نجام بده‌ت به‌لكو ئازادی یا راست ودرست ئه‌وه‌ كو مروڤ ژ سنورێت خو نه‌ ده‌ركه‌ڤیت)، من دڤێت ئاماژێ بكه‌م كو پارتی دیموكراتی كوردستان دیروكه‌كا دویر ودرێژا پر سه‌روه‌ری و سه‌ركه‌فتن و قوربانی دان و ده‌ستكه‌فت هه‌یه‌. هه‌ر ژ دامه‌زراندنێ پارتی ب باوه‌ریه‌كا موكوم و پیلایی و ب نیه‌ته‌كا زه‌لال و ئاشكه‌را و ب گیانه‌كێ خوگوریكرنا كورد وكوردستانێ خزمه‌تكریه‌. خه‌باتا پارتی پێش چاڤه‌ و ناهێته‌ به‌رزه‌كرن و پتریا جاران پارتی ده‌ست ژ به‌رژه‌وه‌ندیێن خو به‌ردایه‌ و بتنێ به‌رژه‌وه‌ندیێن بلندێن ملله‌تێ كورد وكوردستانێ ل به‌رچاڤ وه‌رگرتینه‌و پاراستینه‌. ل ده‌مێ شوره‌شێن كوردی و ب تایبه‌ت شوره‌شێن ئیلون وگولانێ زور هه‌لویستێن چاك و جوامێرانه‌ وه‌رگرتینه‌ به‌رامبه‌ر لایه‌نێن سیاسی یێن د گوره‌پانا سیاسی یا كوردستانێ دا و هاریكاریا پاره‌یی و وره‌یی و هێزێ و چه‌كی و راگه‌هاندنێ بو وان كرینه‌ و ده‌ستێ كوردپه‌روه‌ریێ و كوردینیێ بو درێژ كریه‌ و ئه‌خلاقێ پارتی ژی هه‌ر ئه‌ڤه‌ بویه‌.
چه‌ند هه‌لویستێن پارتی به‌رامبه‌ر لایه‌نێن دی ده‌مه‌ خویاكرن یێ ئێكێ ل سالێن هه‌شتێیان پارتا كریكارێن كوردستانێ هاتنه‌ د ناڤ خاكا مه‌دا و چه‌ند كه‌سێن كێم بون و پارتی ب هه‌می لایه‌كی ڤه‌ هاریكاریا وانان كر و خانی بو چێكرن و چه‌ك دایێ و پێشمه‌رگێن وانان فێری كارێ پارتیزانی و خوراگریێ دكرن و به‌لاڤوكێن وانان ژی ب رونیویا خو چاپ دكرن و ب رێكخستیێن پارتی یێن كوردستانا تركیا دا به‌لاڤ دكرن و بناڤێ وانان. پاشان تركیا هێرش كره‌ سه‌ر باره‌گایێ لقی1 ل كوماته‌ و (48)ده‌مژمێرا پێشمه‌رگێن پارتی به‌رسینگێ هێرشا له‌شكه‌رێ تركا گرت و ئه‌وان خو ڤه‌شارت و گوت ئه‌ڤه‌ ژ مه‌را پر باشه‌. پاشان هه‌لویستێ پارتا كرێكاران به‌رامبه‌ر پارتی چ بوو. هه‌لویسه‌كێ دی كو پارتی ده‌ستێ هاریكاریێ بو ئێكه‌تیا نیشتیمانیا كوردستانێ (ینك) درێژكریه‌ و نه‌هێلایه‌ بكه‌ڤیت و ل ده‌مێن به‌رته‌نگ و نازك دا ئه‌گه‌ر پارتی نه‌بایه‌ دا (ینك) بێ سه‌روبه‌ر بیت و ژده‌ستهه‌لاتێ هێته‌ دورخستن و چ هێز و شیان نه‌دمان لێ لهه‌می كه‌فتنێن وانان پارتی ده‌ستێ وانان گرت و هاریكاریا وانان كرن و تاكو خو ل سه‌ر پێن خو گرتی و پاشان ناڤ ل خو د دا و گوت دێ ب یه‌ك لیسته‌ هێینه‌ خوارێ و هه‌لویستێن وانان دیار بوون و د هه‌لبژارتنێن پارێزه‌ران دا یێن ل (31/10/2013) هاتینه‌ ئه‌نجام دان (ینك) خو دا د گه‌ل یه‌كگرتوو. هه‌لویسته‌كێ دی ته‌ڤایا ملله‌تێ كورد هایداره‌ ل سه‌ر هاریكاریا پارتی بو كورد و پارتێن كوردستانا روژئاڤا و هه‌لویست و داخویانیێن جه‌نابێ سه‌روك بارزانی و پارتی ل دور وانان و ب تایبه‌ت پارتێن كوردستانا روژئاڤا لێ مه‌ د مه‌دیایێن دوست و دوژمنان دا دیتن ئه‌و داخویانیێن (صالح مسلم) دژی پارتی و بارزانی. پارتی ده‌ستێ پارت و لایه‌نێن عیراقی گرتیه‌ و هه‌لویستێ وان هاتیه‌ گهورین، لڤێره‌ پرسیاره‌ك دهێته‌ پێش بوچی پتریا لایه‌نان دوژمناتیا پارتی دكه‌ن به‌رسڤ زور هه‌نه‌ ئه‌و ژی یان پارتی یا شاشه‌ یان ژی یا سیاسه‌ته‌كا دروست په‌یره‌و دكه‌ت و پتر یا دوێ تێته‌ به‌رچاڤ كو ئاراسته‌یا سیاسه‌ت و به‌رنامێ پارتی به‌ره‌ڤ وێ چه‌ندێ دچیت پتر گرێدای جودابون وسه‌رخه‌بونا كوردستانێ یه‌ له‌وما وه‌لاتێن هه‌رێمی و جیهانی ئه‌ڤ ئاراسته‌یه‌ نه‌ د به‌رژه‌وه‌ندا ده‌ڤه‌رێ دا یه‌ و دژی به‌رژه‌وه‌ندیبَن وانایه‌.
ره‌وشا نوكه‌ ل كوردستانێ په‌یدا بوی یا پرسا سه‌روكاتیێ جهێ ره‌خنێ یه‌ بو هه‌می لایه‌نان و براستی نه‌ده‌مێ وێ چه‌ندێ یه‌ و هه‌می پارت و لایه‌ن گونه‌هبارن به‌رامبه‌ر ره‌وشا نوكه‌ په‌یدا بووی و بێ ئومێدیه‌ك بو سه‌رجه‌م كوردان ل كوردستانێ دروست كریه‌ و دلخوشیه‌ك و ئومێده‌كا گه‌ش بو دوژمنان دروست كریه‌ و نوكه‌ به‌لانس و بهایێ كوردان دچاڤێن كومه‌لگه‌هێ ناڤخخویی و ده‌ره‌كی دا كێم بویه‌ و دوزا كوردا پاشڤه‌ چویه‌ و ئه‌گه‌ر ئه‌م خودان ده‌وله‌ت باینه‌ هه‌ر چ رویدابا بلا رویدابا لێ ئه‌م لناڤ گه‌میه‌كێ داینه‌ ول نیڤا ده‌ریایێ داینه‌ و هه‌ر ده‌مێ كون بو یان خار بو دێ نقوم بیت. راستی بهێنه‌ دیاركرن و هه‌ر كێماسی و شاشیه‌كا دبینم ل سه‌ر دنڤێسم و ره‌خنا ژی دكه‌م ژ بو به‌رژه‌وه‌ندا ملله‌تێ كورد و دچه‌ندین بابه‌تان دا من ره‌خنه‌ ل پارتی ژی كریه‌ بلا كه‌س هزر نه‌كه‌ن ئه‌ز به‌رگریێ ژ پارتی دكه‌م لێ من دڤێت راستیان دیار بكه‌م كو پارتی ژی كومه‌كا مه‌زنا كێماسیا هه‌یه‌ و كه‌سانێن نه‌ ژ هه‌ژی كرینه‌ د جهێن بلند و حه‌ساس دا و یێن خزمه‌ت و قوربانی داین و یێن شاره‌زا و یێن چاره‌نڤێسێ خو ب پارتی ڤه‌ گرێدای هاتینه‌ ژ بیر كرن و پشت گوه هاڤێتن و دڤێت پارتی ل خو بزڤریت و به‌رێ خو بده‌ته‌ قاعیده‌یی و خه‌لكێ سڤیل و بێ گونه‌ه چونكه‌ خه‌لكێ مه‌ زور قوربانی داینه‌ و بلا ب ئارامی وسه‌ربلندی و خوشی ژیانا خو ببه‌ن سه‌ر.

پێشه‌وا قازی محه‌مه‌د دبێژیت (هه‌ستێ نشتیمان په‌روه‌ریێ و ئازادیێ ددلێ هه‌ر كورده‌كی دا جهێ خو یێ كری وده‌ستا ژێ به‌رناده‌ین تا گه‌هشتن به‌ره‌ڤ ئارمانجان) بێ گومان ملله‌تێ كورد هه‌سته‌كێ نه‌ته‌وه‌یی یێ بهێز یێ هه‌ی و دناخێ وانان دا هاتیه‌ چاندن وكێماسی و دابه‌زین بو دوژمنان نه‌كریه‌ وملله‌تێ كورد یێ نشتیمانپه‌روه‌ره‌ و لبه‌ر سینگێ مه‌زنترین وهوڤترین هێزا جیهانێ راوه‌ستا و دابه‌زین ژ بهوسته‌كا خاكا پیروزا كوردستانێ نه‌ كر و ب مێرچاكی و سه‌ربلندی و پری باوه‌ری به‌رگری ژ كوردستانێ كر تا كو گه‌هشتیه‌ قوناغا ئه‌نفالان.
گه‌له‌ك كاره‌سات و گرفتاری و زورداری وگونه‌هباری بـ سه‌رێ گه‌لێ كورد و كوردستانیان هاتینه‌ ژلایێ زوردار و داگیركه‌رێن كوردستانێ ڤه‌، و ژوان گونه‌هباریێن مه‌زن و بناڤ و ده‌نگ یێن دژی ملله‌تێ كورد هاتینه‌ ئه‌نجام دان ئه‌وژی كیمیابارنكرنا ده‌ڤه‌رێن كوردستانێ و بتایبه‌ت هه‌له‌بچه‌ وده‌ڤه‌رێن بادینان و بالیسان وده‌ڤه‌رێن سوران ل هه‌ڤلێر و سلێمانی و كه‌ركوك وتاوانێن (جینوساید) و كریارێن هه‌وێن ئه‌نفالێن ره‌شتاری كو ل ناڤه‌ندێن جیهانێ ده‌نگڤه‌دای كو شه‌رمزارترین و روی ره‌شترین وهه‌تكبه‌ریترین تاوان بون كو دوژمنان دژی كورد و كوردستانیان ئه‌نجام داین كو پتر ژ (182) هزار كوردا شه‌هید كرن و بێ سه‌روشوین كرنا وه‌لاتیێن بێ گونه‌ه ژ مه‌سیحی و ئه‌رمه‌نی و ئێزدی وسابئه‌ وشه‌به‌ك و فه‌یلی وكاكه‌یی وشیعه‌ وسنی وتركمان وسورانی و بادینی و هتد.
دژمنان هه‌رده‌م جوداهی نه‌كریه‌ ل ناڤبه‌را خه‌لكێ كوردستانێ و تاوان و كومكوژی وئه‌نفال و زیندان كرن و گورێن ب كوم ده‌رهه‌قێ كورد و تركومان و ئاشوری و كریستیانان ئه‌نجام داینه‌. وه‌ك ئه‌نجامه‌ك بو وان كار وكریارێن پیس وچه‌په‌لێن رژێمێن گه‌نی یێن كو ده‌ستهه‌لات ل عیراقێ كری وبتایبه‌ت رژێما گوربه‌گورا به‌عسی یا چه‌په‌ل ملله‌تێ كورد كه‌فتنه‌ دناڤ گێله‌شوكا ئه‌نفالان دا و ب هزاره‌ها كوردێن ب شه‌ره‌ف و كورد په‌روه‌ر كه‌فتنه‌ ناڤ تورا جاش و مسته‌شار و كرێ گرتی و سوپا و ئه‌من و له‌شكه‌رێ عیراقێ دا و ل ئوردیگایێن بخورتی چێكرین و لناڤ ستری وتوز ولناڤ ده‌شتێن بێ ئاڤ و گه‌رم و لناڤ دوپشك و مارو كرم و كێزان دا و زێده‌باری گه‌ف و ئازاردان و گرتنا چه‌نده‌ك و تاوانبارێن به‌عسی یا دا وهه‌روه‌سا ب ده‌هان كوشتن و بێ سه‌روشوین كرن دكه‌له وئاڤاهیێن ئه‌منێ وزیندانێن تاری دا.
هه‌ر دیسا ب هزاران نه‌كه‌فتنه‌ دده‌ستێن رژێمێ دا به‌ره‌ڤ سنورێن وه‌لاتێن جیران ڤه‌ چون و ل ئیران و توركیا و وه‌لاتێن بیانی و ل كه‌مپ وچادرگه‌هێن مێردین و موش و دیاربه‌كر ئاكنجی بوون و ئه‌و ژیانا سه‌خت و دژوار بره‌ سه‌ر یا كو برایێن وان یێن دی بریه‌ سه‌ر. جهێ سه‌رسورمان ومه‌نده‌هوشیێ یه‌ كو ده‌زگایێن راگه‌هاندنا جیهانی ژ روژنامه‌ وگوڤار و سایتان و كه‌نالێن ناڤخویی و ئاسمانی و وه‌لاتێن خو ب كراسێ بوسلمانه‌تیێ داپوشی و وه‌لاتێن بناڤێ دیموكراسیه‌ت و ئازادیێ و ئازادیا ده‌ربرینێ دپه‌یڤن و رێكخراو و سه‌نته‌ر و لایه‌ن و پارتێن بناڤێ یاسایێ كار دكه‌ن نه‌ژدویر و نێزیك باسێ هه‌وێن ئه‌نفالان و نه‌هامه‌تێن كوردا نه‌كرن و ئه‌گه‌ر هنده‌ك ژڤان جها كربایه‌ ژی ب كێمی بتنێ باس كرن و چ لایه‌نان هه‌لویست نه‌بون و هنده‌ك لایه‌نان ژی ب ئاشكه‌رایی په‌سنا ڤان هه‌وێن ئه‌نفالان یێن هوڤانه‌ كرن و دگوت مافێ سه‌دامی یه‌ عیراقێ ژ تیرورستا ڤالا بكه‌ت و مه‌ره‌م ژ تیرورستا ملله‌تێ كورد بوو.
لڤێره‌ دڤێت ئه‌م هه‌می پێكڤه‌ كار بكه‌ین ژ بو ئاڤاكرنا وه‌لاتێ خو كوردستانێ و هه‌می ژێكنه‌گرتن و ئارێشه‌ و پرسێن ناڤخویی بده‌ینه‌ لایه‌كی و ره‌فتارێن دوژمنان دگه‌ل مه‌ كرین ل پێش چاڤێن مه‌ بن و خو ژبیرڤه‌ نه‌به‌ین و بلا هه‌رده‌م دیمه‌نێن ئه‌نفال و ده‌ربه‌ده‌ری و ئاواره‌یێ ل پێش چاڤێن مه‌ بن مینا فلمه‌كی و ببنه‌ دكیومێنتار و بو نفش و به‌ره‌بابێن داهاتی. ده‌ستێن خو بكه‌ینه‌ دده‌ستێن هه‌ڤدو دا، دا كو كوردستانێ ئاڤا بكه‌ین و بگه‌هینه‌ كنارێ ئارام ب سه‌رفه‌رازی.

فه‌یله‌سوفێ سوێسری (جان جاك روسو) د په‌یڤه‌كا خودا دبێژیت (هنده‌ك كه‌سان و مروڤێن كێم یێن شه‌ریف و پاقژ وده‌ست پاك بده‌نه‌ من ئه‌ز دێ شێم سوپایه‌كێ مه‌زن یێ گه‌نده‌لچی ودزیكه‌ر و نوكه‌ران ژ بن به‌م و ناهێلم ) ئه‌ڤ په‌یڤا زێرین راسته‌ و دجهێ خودایه‌ چونكه‌ د پروسه‌یێن به‌راهیكێ دا لسه‌ر ده‌مێن به‌رخوه‌دان وشوره‌شێن كوردی دا چه‌ند كه‌سانێن كێم شوره‌ش برێڤه‌ دبرن و ئیدارا شوره‌شان دكرن و هه‌می ساخله‌تێن باشیێ و چاكیێ و سه‌ركردایه‌تیێ و دادپه‌روه‌ریێ و جوامێریێ لجه‌م هه‌بون و شووره‌ش ب باشترین شێواز برێڤه‌ دچوو سه‌ره‌رایی وان كێماسیێن لوی سه‌رده‌می هه‌ین. نوكه‌ ره‌وش و پرسێن دی هاتینه‌ گهورین نوكه‌ بویه‌ سه‌رده‌مێ جیهانگیری وزانستی وپێشكه‌فتن و پێشڤه‌چونێ و ملله‌ت هشیار بوینه‌ و خه‌لك بچاڤ كه‌فتیه‌ و گوهێن وانان ڤه‌بوینه‌ و ب زمان كه‌فتینه‌. سیسته‌مێن ل روژهه‌لاتا ناڤه‌راست نیمچه‌ گرتی نه‌ ولێك تێك گه‌هشتن نینه‌ وبیهنا دكتاتوریه‌تێ ژێ دهێت وبتایبه‌ت ل عیراقێ كو چه‌ندین ده‌ستهه‌لاتدار بهێنه‌ گهورین هه‌ر ده‌ستهه‌لاتێ تاكره‌وی ودكتاتوری دهێته‌ په‌یره‌و كرن. پشتی روخیانا رژێما به‌عسا دكتاتورو وه‌رگرتنا ده‌ستهه‌لاتی ل عیراقێ ژلایێ ئه‌وێن بناڤێ ئوپوزسیون هه‌ر ئه‌و سیاسه‌ت هاته‌ په‌یره‌وكرن به‌رامبه‌ر ملله‌تێن عیراقێ و بتایبه‌ت ملله‌تێ كورد، هه‌ر ژ باچه‌چی عه‌لاوی و جعفری و مالكی و پاشان عه‌بادی ژی. یا خویایه‌ كو عیراق بویه‌ ئێك ژ ویلایه‌تێن ئیرانێ و ئه‌ڤێن ده‌ستهه‌لاتێ لێ دكه‌ن بتنێ فه‌رمانبه‌رێن ئیرانی نه‌ و بتنێ بریارێن وان جه بجه دكه‌ن ئه‌ڤ بریارێن ل هه‌یڤا (8/2015) ده‌رچوین بناڤێ چاكسازیێ بتنێ كوده‌تایه‌ك لسه‌ر عیراقیێن سنی وپاشان دژی كوردا و ب پله‌ ئێك ئه‌ڤ بریاره‌ ژ بو دویرئێخستنا كوردایه‌ ژده‌ستهه‌لاتا مه‌ركه‌زی چونكه‌ زور پێزانین د سایت وپه‌یجێن جودا دا به‌لاڤ بوینه‌ كو سه‌روكێ عیراقێ فوئاد مه‌عسومی هایداری یا وی ژڤان بریاران هه‌یه‌ لێ رێككه‌فتنه‌كا نهێنی ل ناڤبه‌را وی وعه‌بادی هه‌یه‌ هه‌ر ل بن چاڤدێریا ئیرانێ كو مالكی بهێلن ل جهێ وی ل دویڤ داخوازا مه‌رجه‌عیه‌تا شیعی و هه‌ر دڤان كاودانا دا تشت تێك هه‌ل دبن و پێكڤه‌ دهێنه‌ گرێدان كو مه‌عسومی ژی داخویانیه‌ك دایه‌ كو نابیت عیراق بهێته‌ پارچه‌ كرن و هه‌ر ل ده‌ست پێكا ڤان بریاران یێن بناڤێ چاكسازیێ عه‌بادی ب ئاشكه‌رایی گوت ئه‌ز ل بن فه‌رمانێن مه‌رجه‌عیه‌تێ مه‌. ئه‌گه‌ر هویرك هویرك سه‌یرا ره‌وشا ده‌ستهه‌لاتێ عیراقێ بكه‌ین و ڤه‌دیتنه‌ك و لێنیرینه‌كێ دروست بكه‌ین ئه‌و داهاتێ زه‌به‌لاحێ عیراقێ كو هه‌یڤانه‌ ب ترلیونان دولارا داهاتێ عیراقێ یه‌ و چ خزمه‌تێن پێش چاڤ بو وه‌لاتیێن عیراقی ناهێنه‌ پێشكێش كرن و وه‌لاتیێن عیراقێ دمه‌ینه‌ت و ده‌رده‌سه‌ری و برس و تێن و بێ كاره‌بیێ دنالن و زێده‌باری خرابیا ره‌وشا ئه‌منی. ل دووڤ زانیاریان كو بنه‌مال و مه‌رجه‌ع و پارت و لایه‌نێن سیاسی ل عیراقا شیعی پروژه‌ و داهاتێ په‌ترولێ ل سه‌ر هه‌ڤدوو پارڤه‌كرینه‌ و لسه‌ر ناڤێ كه‌سان تێنه‌ بناڤ كرن و داهاتێ وی پروژه‌یی ژی بو كه‌سانه‌، ب برینا بودجه‌یی و ب دروستكرنا ئاسته‌نگان و ب دانانا پیلانان نه‌شیانه‌ كوردان وهه‌رێما كوردستانێ بتنێ پیلان دانایه‌ ژ بو خرابكرنا ره‌وشا سیاسی و تێكبرنا ناڤمالا كوردی داكو ژێكڤه‌ ببن وببنه‌ پاریه‌كێ ب ساناهی بو دوژمنان و پشتگریكرن ل هنده‌ك لایه‌نان ودژایه‌تی كرن ل هنده‌ك لایه‌نێن دی و بڤێ چه‌ندی ره‌وشا مه‌ به‌ره‌ڤ ئالوزیێ ڤه‌ بریه‌ وئه‌گه‌رێن مایتێكرنێن ده‌وله‌تێن هه‌رێمی ژی ڤه‌رێژا ڤان ژێك نه‌گرتنانه‌. كارێ چاكسازیان زور باشه‌ و جهێ ده‌ستخوشیێ نه‌ ژهه‌ر لایه‌كی ڤه‌ لێ بێهنا خیانه‌ت و تولڤه‌كرن و ڤاڤارتنان ژێ دهێتن و دێ بڤێ رێكێ كوردان ژ ده‌ستهه‌لاتی دوركه‌ن و ئه‌گه‌ر بهێلم ژی دێ وان كوردان هێلن یێن كو ل به‌ر بلویلا وانان سه‌مایێ دكه‌ن و فه‌رمانێن مه‌رجه‌عیه‌تێ و ماموستایێن خو بجه دئینن. ب بوچونا من ده‌ما به‌حسا ده‌وله‌تبون وجودابونێ دهێته‌ كرن یان پیچه‌ك ره‌وشا كوردان به‌ره‌ڤ ئارامیێ ڤه‌ دچیت ئێكسه‌ر پیلانه‌ك دهێته‌ دارێشتن و ئارێشه‌كی بو هه‌رێما كوردستانێ و ملله‌تێ كورد دروست دكه‌ن، ئه‌ڤجا ئه‌ڤا عه‌بادی كری وه‌سا دیاربویه‌ كو تولڤه‌كرن و دویركرنا كوردا و گه‌له‌ك لایه‌ن و كه‌سانێن دی نه‌ ژده‌ستهه‌لاتی. ل داویێ بلا كورد ده‌ستێن خو بكه‌نه‌ د ناڤ ده‌ستێن هه‌ڤدا و كوردستانێ ژ دوژمنان پارێزن بلا كه‌یفا دوژمنان ب پروسا مه‌ یا جوان نه‌هێت و به‌ره‌ف ده‌ستكه‌فت ئارمانجێن مه‌زنتر.

ره‌وش به‌ر ب وێ چه‌ندێ ڤه‌ دچیت كو رۆژهه‌لاتا ناڤه‌راست یا ژێكڤه‌ دبیت و سایكس پیكۆیه‌كا دی دروست ببیت و چه‌ندین وه‌لاتێن دی ببنه‌ ئه‌ندامێن نوو د جڤاكێ نێڤده‌وله‌تی دا. ل ده‌مێن پێداچوونان ل لاپه‌رێن دیرۆكێ بكه‌ین و فه‌رهه‌نگا مێژویا جیهانێ ببینین دێ زۆر تشتێن سه‌یر و نه‌ دادپه‌روه‌رانه‌ بۆ مه‌ دیار بن و ئه‌و لایه‌ن و جهێن بووینه‌ قوربانی به‌رژه‌وه‌ندیێن تایبه‌ت هێنه‌ پێشچاڤ و زۆر جاران ژی نه‌خشه‌ و ستراتیجیه‌ت هاتیه‌ گوهۆرین ژ بۆ جێبه‌جێكرنا به‌رژه‌وه‌ندیێن هنده‌ك لایه‌نان. بۆ نموونه‌ (د. جێرمی سۆلت) د پرتووكا خوه‌ دا یا ب ناڤێ (تفتیت الشرق الاوسگ)دبێژیت, ل وه‌لاتێ ل ناڤبه‌را هه‌ردو ریباران دا ده‌وله‌ته‌كا نوو هاتیه‌چێكرن و ل ده‌مێ ل چه‌رخێ (16) به‌غدا هاتیه‌ ستاندن ل وی ده‌می ده‌ڤه‌ر یا دابه‌شكری بوو وه‌كو پارێزگه‌هێن ئوسمانی ئانكو (ویلایه‌ت) و ئه‌ردێ بوویه‌ عیراق زۆر كۆمێن مرۆڤان ژ هۆز وملله‌ت و نه‌ته‌وه‌ و ئایینان لێ دژیان و ئه‌ڤ پێكڤه‌ هاتنه‌ گرێدانه‌ ژبه‌ر گازێ بوو ئه‌گه‌ر نه‌ چ رامان ومانه‌ نه‌بوون بۆ گرێدانا ڤان ده‌ڤه‌ر و مرۆڤان. بیرێن گازێ ب سه‌ركه‌فتیانه‌ ل ده‌ڤه‌رێن كه‌ركووك ل سالا (1927) هاتنه‌ كۆلان و گاز هاته‌ ده‌رخستن و ڤه‌گوهاستن ب بۆرییان بۆ فه‌له‌ستین و سووریێ و به‌رهه‌مئینانا گازێ به‌رفره‌ه بوو هه‌تاكو به‌سرا و مووسل ژی ڤه‌گرتی و پتر حه‌ز و ڤیانا دوژمنان ل سه‌ر ده‌ڤه‌رێن كوردان زێده‌ بوو و ئه‌و مرۆڤێن ل سه‌ر ڤی یه‌ده‌كێ مه‌زنێ گازێ ل ناڤبه‌را هه‌ردو رووباران دژیان ئه‌و تێكه‌له‌یه‌كێ ئایینی و نه‌ته‌وه‌یی و هۆزاتی بوون و ژ بوسلمانێن سونی و كورد و عه‌ره‌ب و توركمان و كریستیان و هه‌می ئایینێن جودا و كێمه‌ نه‌ته‌وه‌ و هۆز بوون. هه‌روه‌سا ئێزیدی و جوهی و هنده‌ك ژ كوردێن شیعی و مه‌زهه‌بێن جودا بوون. هه‌ر ژ كه‌ڤندا دا مووسل و كه‌ركووك و ده‌ڤه‌رێن دی یێن كوردانه‌ لێ ژێ هاتینه‌ ستاندن. سه‌باره‌ت كوردان مووسل و كه‌ركووك و ده‌ڤه‌رێن دی ب مولكێ خوه‌ دزانن و ب تایبه‌ت كه‌ركووك پشكه‌كا نه‌ژێكڤه‌كری یه‌ ژ وه‌لاتێ مێژویێ كوردان ئه‌وێ كو رۆژه‌كێ ژ رۆژان هه‌ر دێ هێته‌ ب سه‌ر ده‌وله‌تا كوردسانێ یا سه‌رتاسه‌ری و سه‌ربه‌خوه‌ ڤه‌. ئانكو وه‌كو ل سه‌ری مه‌ ئاماژه‌ پێ كری و ل دووڤ بۆیه‌رێن ده‌ڤه‌رێ و ب تایبه‌ت ل رۆژهه‌لاتا ناڤه‌راست بۆیه‌ر پتر گه‌رم بووینه‌ و نوكه‌ گه‌رمتر لێ هاتینه‌ و ئه‌و ژێده‌رێن كو به‌حسا چێكرنا چه‌ندین ده‌وله‌تان كری ل رۆژهه‌لاتا ناڤین نوكه‌ نیشانێن وێ چه‌ندێ دیار دبن و ل دووڤ وی نه‌خشه‌یێ ل سالێن بۆری ژ په‌نتاگۆنا ئه‌مریكی ده‌ركه‌فتی كو تێدا عیراق ببیته‌ سێ زۆن ئه‌و ژی زۆنا كوردی و شیعی و سنی و پشتی په‌یدابوونا شه‌ڕێن گران ل ده‌ڤه‌را سونی و كوردان ل عیراقێ ئه‌ڤه‌ وێ چه‌ندێ دسه‌لمینیت كو ده‌م نێزیكه‌ ژ بۆ ژێكڤه‌بوونێ. هه‌روه‌سا داخویانیێن مه‌زنه‌ به‌رپرسێن وه‌لاتێن مه‌زن مینا ئه‌مریكا و بولگاریا و ئه‌لمانیا و فره‌نسا و توركیا ل سه‌ر دامه‌زراندنا ده‌وله‌تا كوردی كو ل (22/5/2015) سه‌رۆكێ تركیا ب ئاشكه‌رایی بۆ میدیایا جیهانی گۆت ئه‌م نه‌ دژی دامه‌زراندنا ده‌وله‌تا كوردینه‌ نه‌مازه‌ پشتی بزاڤێن بارزانی یێن بێ راوه‌ستیان ژبۆ راگه‌هاندنا سه‌رخوه‌بوونێ و وێ پێشوازیا ل جه‌نابێ وی دئێته‌كرن وه‌كو سه‌رۆك ده‌وله‌ت نه‌ سه‌رۆكێ هه‌رێمه‌كێ و بلندكرنا ئالایێ پیرۆزێ كوردستانێ. دیسا ل یه‌مه‌نێ و په‌یدابوون و گرتنا ده‌ستهه‌لاتێ ژ لایێ حوسییان ڤه‌ و هێرشێن سعوودیێ ئه‌ڤه‌ ژی گرۆڤه‌كێ ب هێزه‌ بۆ ژێكڤه‌بوونێ، دیسا ل ده‌ڤه‌رێن سووریێ، تركیا، ئیرانێ، لیبیا و لبنانێ بۆیه‌ر غاردانێ دكه‌ن و ب له‌زتر لێ هاتینه‌ و به‌ر ب ژێكڤه‌بوونێن رۆژهه‌لاتا ناڤینن, هه‌ر دیسا ل هه‌می ده‌ڤه‌ر و جهان ژێك نه‌گرتنێن مه‌زهه‌بی و ئاینی و نه‌ته‌وه‌یی و ده‌ڤه‌ری سه‌رێ خوه‌ هه‌لدایه‌. دیسا سونی و شیعی و سابئه‌وعه‌له‌وی و جه‌ركه‌س و درۆز و كریستیان و ئیزدی و بسلمان و هتد. ب هه‌ڤدو ڤه‌ ماینه‌ و هه‌می داخوازا مافێن خوه‌ یێن نه‌ته‌وه‌یی و ئایینی و مه‌زهه‌بی دكه‌ن. چاوا مه‌ به‌حسكر كو مووسل كه‌فته‌ ب سه‌ر عیراقێ ڤه‌ و بوویه‌ تشته‌كێ ئاسایی نوكه‌ ئاسانتره‌ كو ڤان ده‌ڤه‌ران ژێكڤه‌بكه‌ن و سه‌رخوه‌بوونێ بده‌نی ل دووڤ رێكه‌فتنامه‌كا نێڤده‌وله‌تی, هه‌می ملله‌ت و نه‌ته‌وه‌ و ئایین و مه‌زهه‌ب ب مافێن خوه‌ شاد ببن، ژ لایه‌كێ دی ڤه‌ به‌رژه‌وه‌ندیێن وه‌لاتێن زلهێز ژی ل رۆژهه‌لاتا ناڤین دێ بده‌ستڤه‌ئێن، چونكو جڤاكێ نێڤده‌وله‌تی و وه‌لاتێن زلهێز گرنگیا رۆژهه‌لاتا ناڤین دزانن و ئه‌و هه‌می مفا و سامان و ئایندێ د ڤێ ده‌ڤه‌رێ دا هه‌یی ژ هه‌می ئالیان ڤه‌. ل داویێ دخوازین ئومێد و خه‌ونا ملله‌تێ كورد بهێته‌ بجهكرن و ئه‌و سته‌ما ب درێژاهیا سالان ل كوردان هاتیه‌ كرن و بێ به‌هریا وانان ژ كێمترین مافێن وان كو ببنه‌ وه‌لاتیێن ده‌وله‌ته‌كا سه‌ربه‌خوه‌ و هه‌ست ب وه‌لاتیبوونێ بكه‌ن و كورد ژی ببنه‌ خودان ده‌وله‌ته‌كا سه‌ربه‌خوه‌ خودان ئالایه‌ك تایبه‌ت كو ل ناڤه‌ندێن جیهانێ بهیته‌ بلندكرن و دانپێدان پێ بهێته‌كرن.

بزاڤێن ئیرانێ یێن به‌رده‌وام ژ بۆ چێكرنا هیلالێ خوه‌ یێ شیعی و به‌رفه‌رهكرنا ده‌ستهه‌لاتا خوه‌ ل ده‌ڤه‌رێ ل سه‌ر بنه‌مایێن مه‌زهه‌بی ب تایبه‌ت ل ده‌ڤه‌را رۆژهه‌لاتا ناڤه‌راست، ل ده‌مێ دیمه‌نێن وه‌لاتێ یه‌مه‌نی دبینی دێ سه‌رسورمان مینی، چونكو بزاڤه‌كا سه‌یر و یا مه‌زن هه‌یه‌ ژ لایێ حوسێن یه‌مه‌نێ ڤه‌ و ئه‌ڤ بزاڤا سه‌یر و مه‌زن هاته‌ گوهۆرین ژ بزاڤه‌كا تیۆری و هزری بۆ بزاڤه‌كا له‌شكری و چه‌كدار و شه‌ركه‌ڕ و ل به‌ر سینگێ ده‌ستهه‌لات و سه‌ركرداتیا یه‌مه‌نێ رابوو و زێده‌گاڤی ل سه‌ر ده‌ستهه‌لاتێ كرن و ده‌زگه‌ه و پارچه‌كا مه‌زن ژ وه‌لاتێ یه‌مه‌نێ داگیركرن و ده‌ستهه‌لاتا خوه‌ ل وان ده‌زگه‌ه و ده‌ڤه‌ران گێرا و ئه‌ڤه‌ ل ناڤبه‌را شه‌ڤه‌ك و رۆژه‌كێ دا په‌یدا نه‌بوویه‌ن لێ ئه‌ڤ كاره‌ ب پێنگاڤ و قووناغێن درێژ و پێشده‌م هاتینه‌ ئه‌نجامدان و كار ل سه‌ر هاتیه‌ كرن د ده‌مێ پتر ژ (30) سالان و بتایبه‌ت ل ده‌مێ سه‌ركه‌فتنا شۆره‌شا ئیرانێ ب سه‌ركێشیا خومه‌ینی و خودانێن عه‌ماما چونكو ژ گرنگترین ئارمانجێن وانان هنارتنا تیۆر و هزرێن شیعی بۆ ده‌رڤه‌یی ئیرانێ و ب تایبه‌ت ل وه‌لاتێن رێژا شیعا هه‌یی و ل ناڤ وان وه‌لاتان یه‌مه‌نێ ژی رێژه‌كا باش یا شیعان لێ هه‌یه‌. ئیرانێ ب هه‌می شیانێن خوه‌ كار كر ژبۆ شیعه‌كرنا وه‌لاتێن ده‌ڤه‌رێ و یێن هه‌رێمی و وه‌لاتێن ئیسلامی و شیان هه‌تا راده‌یه‌كێ به‌رچاڤ تێكدانا پێكڤه‌مانا ئایدیۆلۆجی یا گه‌ل و شیعێن یه‌مه‌نێ بكه‌ن شیعه‌یێن یه‌مه‌نێ (زه‌یدیه‌) و هێدی هێدی وانان كار كر و حۆسی كرنه‌ ئه‌نیه‌كا ب هێز یا له‌شكری دا كو ب تنێ بۆ به‌رژه‌وه‌ندیێن ئیرانێ كار بكه‌ت و ل سه‌ر ڤی بنه‌مایێ ئیرانێ ژ هه‌می ئالیان ڤه‌ هاریكاریا حوسیان ل یه‌مه‌نێ پتر كر و ژ هه‌می ئالینان ڤه‌ ئالیێ سیاسی و دراڤی و له‌شكری و لۆجستی وهتد. هاریكاریا ب هێز یا ئیرانێ بۆ حوسییان یا پێشچاڤ بوویه‌ نه‌یا ڤه‌شارتی یه‌، هه‌روه‌سا دلسۆزی و وه‌فاداریا حوسیان ژی بۆ ئیرانێ یا ئاشكه‌را و پێشچاڤ بوو، ئه‌و بوو حوسیان ب فه‌رمانێن ئیرانێ كار دكر وخالا وێ چه‌ندێ دیار دكه‌ت كوحوسیان داخواز ژ حوكمه‌تا یه‌مه‌نێ كرن كو هنده‌ك به‌رژه‌وه‌ندیێن ئیرانێ ل یه‌مه‌نێ جه بجه بكه‌ن به‌رامبه‌ر هنده‌ك دۆزێن دی كو حوسی خوه‌ ل سه‌ر بێ ده‌نگ بكه‌ن، هه‌روه‌سا حوسیان داخواز ژحوكمه‌تا یه‌مه‌نێ كر كو وان كه‌ساتیێن ئیرانی به‌رده‌ن یێن گرتی ل جه‌م وه‌زاره‌تا به‌رگریا یه‌مه‌نێ و ئه‌گه‌ر نه‌ گه‌فێن مه‌زن ل حوكمه‌تا خوه‌ كرن. ئه‌ڤ هاریكاریا مه‌زن یا ئیرانێ بۆ حوسیێن یه‌مه‌نێ ب تنێ ژبه‌ر وێ چه‌ندێ یه‌ كو ئیران دزانیت رۆلێ گرنگێ حوسیان ژبۆ گه‌فكرنا ئاسایشا وه‌لاتێن خه‌لیجی و ب تایبه‌ت سعوودیێ و ئه‌ڤ رۆله‌ یێ سه‌ره‌كی یه‌ ل جه‌م سه‌ركردێن ئیرانێ ژ بۆ هه‌لكرنا ئاگری ل وه‌لاتێن عه‌ره‌بی و خه‌لیجی و هاندانا شیعێن وان وه‌لاتان ژ بۆ نه‌هێلانا حوكمرانیا سونیان و گوهۆرینا وان حوكمرانان ب شیعی یا و ئیران شیایه‌ هه‌تا نوكه‌ ده‌ستهه‌لاتێ خوه‌ ب هێز بێخیت ل سووری و عیراق و لبنان و یه‌مه‌ن و نوكه‌ یا كاردكه‌ت ب هه‌می رێیان ژبۆ به‌رفه‌رهكرنا ده‌ستهه‌لاتا خوه‌ بۆ به‌حرین و سعوودیه‌ ژی وب دیتنا وانان ئه‌گه‌ر شیان كونترۆلێ سعودیێ ژی بێخیته‌ د ده‌ستێن خوه‌دا ئه‌ڤه‌ شیان وه‌لاتێن خه‌لیجی هه‌میان كونترۆل بكه‌ن، ل به‌رامبه‌ر ڤێ چه‌ندێ سعوودیه‌ ژی هه‌ستیاریا ره‌وشا نوكه‌ دزانیت له‌وما رابوون ب هێرشكرنا حوسیان ل یه‌مه‌نێ ل (26/3/2015) و چێكرنا هێزه‌كا له‌شكری یا عه‌ره‌بی یا ئێك گرتی ژبۆ نه‌هێلانا ناڤێ حوسیان ل یه‌مه‌نێ. ئیران ل سه‌ر دو به‌ره‌یان كاردكه‌ت ئه‌و ژی به‌ره‌یێ شیعێن ل سعوودی و به‌ره‌یێ دوویێ ل سه‌ر وان شیعێن یه‌مه‌نی یێن ل سه‌ر هێلا سنۆری ل ناڤبه‌را سعوودیێ و یه‌مه‌نێ و ژبه‌ر ڤێ چه‌ندێ ئیران هاریكاری و پشته‌ڤانیا حوسیێن یه‌مه‌نێ دكه‌ت، چونكو سعوودیه‌ هاریكاریا ملله‌تێ سووری دكه‌ت ل دژی خوینمێژ به‌شار ئه‌سه‌دی، داكو ئیران بۆ سعوودیێ دیار بكه‌ت كو گڤاشتنێن خوه‌ ل سه‌ر رژێما ئه‌سه‌دی سست بكه‌ت و ئه‌گه‌ر نه‌ ئه‌ڤه‌ حوسیێن یه‌مه‌نێ گه‌فه‌ ل سه‌ر هه‌وه‌. ل داویێ دبێژم ئیران یا ل سه‌ر چه‌ندین ئه‌نیا شه‌ڕی دكه‌ت و حه‌ز و بلند بینیێن ئیرانێ زۆر زێده‌بووینه‌ و یا ده‌ڤه‌را به‌ره‌یێن شه‌ڕێ خوه‌ زێده‌ دكه‌ت و هه‌ولدده‌ت به‌ر ب ومتی ڤه‌ بچیت، لێ هه‌می ده‌ما با وه‌كی حه‌زێن كه‌سۆكی ناهێت و زۆر جاران ژی مرۆڤ بخوه‌ دكه‌ڤیته‌ د وێ بیرێ دا یا مرۆڤی بۆ هنده‌ك كه‌سان كو لایی و ب بۆچوونا من دێ ئیران ژی كه‌ڤیته‌ د نه‌هاله‌كا كوی ردا چونكو یا مایی تێكرنا د هه‌می واران دا دكه‌ت.

چه‌ندین سال بوورین ده‌ستهه‌لاتدارێن عیراقێ سیاسه‌ته‌كا شاش به‌رامبه‌ر ملله‌تێ كورد په‌یره‌و دكه‌ن و ب هه‌می ره‌نگێن جودا وه‌سا هزر بۆ وانان په‌یدا بوویه‌ كو ب چ ره‌نگان نه‌شیانه‌ مه‌، رابوون كاركرن كو پرسێن مه‌زهه‌بی و تائیفی تێكه‌لی ملله‌تێ كورد كرن و ژێك دووربوونه‌ك خسته‌ ل ناڤبه‌را پارت و لایه‌نێن كوردستانی و پرسا شیعیه‌ت و سنیه‌تێ و شیان لایه‌نه‌كێ كوردستانی یێ به‌رنیاس بكه‌نه‌ دبن چه‌نگێ خوه‌ڤه‌ و ده‌ڤه‌رێن كوردستانی مینا جه‌له‌ولا و سه‌عدیه‌ بێخنه‌ بن كونترۆلا میلیشاتێن شیعی و ل شوونا ژ بن حه‌شدا شعبی یا سنی و داعشێن تیرۆرست ده‌رخستی كه‌فته‌ ژێر كونترۆل و ده‌ستهه‌لاتا شیعێن توندره‌و كو هه‌تا نوكه‌ ژی ناهێلن پێشمه‌رگه‌ و خه‌لكێ ده‌ڤه‌رێ ژی بچنه‌ ناڤ وان ده‌ڤه‌ران.
ئه‌رێ هه‌كه‌ ئه‌ڤه‌ پیلان نه‌بیت ما بۆچی به‌رێ حه‌شدا شعبی یا شیعی و سنی ناده‌نه‌ ده‌ڤه‌رێن عه‌ره‌بنشین و شیعه‌ و سنه‌نشین ئه‌رێ ما هه‌تاكه‌نگی دێ كورد و ب تایبه‌ت هنده‌ك لایه‌ن و پارت نوكه‌ری و دووڤه‌لانكیێ بۆ دوژمنان كه‌ن ئه‌رێ بۆچی وان ده‌ڤه‌ر و ئه‌ردێ ملله‌تێ كورد ب درێژاهیا مێژویێ و ب ده‌هان شۆره‌ش و به‌رخودانان و ب خوینا هزاره‌ها شه‌هیدان دێ ب ساناهی و بێ شه‌ڕ راده‌ستی دوژمنان كه‌ین و ب تایبه‌ت دوژمنێن توندره‌و و توخمپه‌رێس. ئه‌رێ دێ هه‌تا كه‌نگی هزركه‌ین كو دێ ره‌وشا كوردان ل عیراقێ باش بیت و ب ئارامی و خۆشی بژین چونكو ل سه‌رده‌مێن كه‌ڤن سونیان ده‌ستهه‌لات دكر سته‌م ل ملله‌تێ كورد دكر و نوكه‌ شیعه‌ حوكمرانن هه‌ر پتر یێ سته‌مێ ل ملله‌تێ مه‌ دكه‌ن. ئه‌رێ ما حوكمه‌تا مالكی پاشی یا عه‌بادی كو رۆژانه‌ دو ملیۆن و نیڤ به‌رمیلێن گازێ دفرۆشن و ژبلی داهاتێن دی ل عیراقێ نه‌شێن سوپایه‌كێ ب هێز و ئێكگرتی دروست بكه‌ن یان ژی ئێمناهیێ ل عیراقێ به‌رپا بكه‌ن به‌لێ دشێن لێ ناكه‌ن چونكو نه‌خودانێن بریارێ نه‌ بریار ل ده‌رڤه‌ بۆ دهێن و ل عیراقێ ب تنێ جه بجهكرنا بریارانه‌. نوكه‌ ل به‌رمه‌ یا ئاشكه‌رایه‌ ئه‌ڤا ل عیراقێ دهێته‌ كرن ب تنێ پیلانه‌كه‌ دژی كوردان و مه‌ره‌م ب تنێ نه‌هێلان و ژناڤبرنا كوردایه‌ و ئه‌گه‌ر نه‌ ملله‌تێ كورد و سه‌ركرداتیا كوردستانێ یێن دبێژن وه‌رنه‌ دستووری و دستوور و قانوون چ دبێژن ئه‌م ب وێ چه‌ندێ درازی نه‌. ل داویێ دبێژمه‌ پارت و لایه‌نێن كوردستانێ كو ده‌ستێن خوه‌ بكه‌نه‌ د ناڤ ده‌ستێن هه‌ڤ دا و سه‌نگه‌رێن خوه‌ بكه‌نه‌ ئێك سه‌نگه‌ر و په‌یامێن خوه‌ بكه‌نه‌ ئێك په‌یام و ده‌ستان ژ ژێكنه‌گرتنێن خوه‌ به‌رده‌ن و بلا هه‌ر ل هزرا هه‌وه‌ بیت دوژمنێن مه‌ هه‌ر ئێكه‌ چ سه‌فه‌وی بیت یا عوسمانی و پێكڤه‌ كار بكه‌ن داكو ئه‌ڤا مه‌ هه‌یی بۆ مه‌ بمینیت و كورد بگه‌هنه‌ ماف و ئارمانجێن خوه‌.

ل زۆر داموده‌زگایێن میدیایێ و ل ئۆرگانێن پارتێن سیاسی و ئیسلامی ئه‌م داخوه‌یانیێن هنده‌ك ژ به‌رپرس و شاره‌زایا، هه‌روه‌سا خه‌لكه‌كی دبینین و داخویانیان دده‌ن و دبێژن كو سالا(2014) سه‌خترین و نه‌خۆشترین سال بوو بۆ ملله‌تێ كورد كو تێدا و هه‌ر ل ده‌سپێكا سالێ بودجا هه‌رێمێ هاته‌ برین و مووچێن فه‌رمانبه‌ر و كارمه‌ند و هه‌ژاران ژی هاتنه‌ بڕین و پروۆه‌ هاتنه‌ راوه‌ستاندن و كار مانه‌ نیڤه‌رۆ و روه‌شا هه‌رێما كوردستانێ یا ئابووری هاته‌ شێلیكرن و چاڤێن مالكی و هه‌ڤكار و پالده‌رێن وی و چه‌ند هێز و وه‌لاتێن هه‌رێمی ب هه‌رێما كوردستانێ نه‌ رابوون ب وێ پێشكه‌فتن و سه‌ركه‌فتن و ده‌ستكه‌فتان یێن كو ملله‌تێ كورد بده‌ستخوه‌ڤه‌ ئیناین, وان وه‌سا هزردكر كو ملله‌تێ كورد دێ خوه‌ راده‌ستی مالكی و ئه‌وێ ئه‌و پێ دخوریت كه‌ت و دێ راده‌ستی ئیرادا چه‌ند كه‌سه‌ك و نه‌حه‌زه‌كا بن یێن كو ئه‌و پێشنیاز بۆ مالكی كری و ب راستی چ قانوون و شریعه‌ت و ماف نینن كو پاریێ ده‌ڤێ هه‌زار و به‌له‌نگاز وبێ گونه‌ه و سڤیلا ببڕن پێخه‌مه‌ت به‌رژه‌وه‌ندیێن چه‌ند لایه‌نه‌كێن كیم و یا دیار بوو بێهنا خیانه‌ت و نه‌دادپه‌روه‌ریێ ژ دوور ڤه‌ دهات. بێهنا وان دوژمن و هۆڤان ب ڤێ چه‌ندێ ژی نه‌هات و شكه‌ستن ل به‌رامبه‌ر ڤێ پیلانێ ئینان، هه‌ر ئه‌و ده‌ستوداربوون و ب رێكه‌فتنه‌كا نهێنی و كاره‌كێ بازرگانی و تۆلڤه‌كرنه‌كێ به‌رێ ترسناكترین و هۆڤترین رێكخراوا تیرۆرستی ل جیهانێ دایه‌ كوردستانێ و ب هێزترین و به‌رفره‌هترین و مه‌زنترین هێز هێرش كرنه‌ سه‌ر كوردستانێ و ئه‌ردێ كوردان داگیركرن مینا بابكالكێن خوه‌ دوباره‌ ئه‌ردێ پیرۆزێ كوردستانێ داگیركرن و ب سه‌دان خه‌لكێ كورد یێ بوسلمان و ئێزدی و كریستیان و شیعی و سونی كوشتن و مالێن وان تالان كرن و هه‌ر چه‌ندی بێژین كێمه‌ ژ وێ زولم و سته‌ما ل خه‌لكێ مه‌ هاتیه‌ كرن. لێ ب باوه‌ریا پیلایی یا خه‌لكێ مه‌ و ب هێزا مه‌زنا پێشمه‌رگێن قه‌هره‌مان ئه‌ڤ پیلانا وانان ژی هاته‌ شكاندن و روو ره‌ش و شه‌رمزاربوون و دوباره‌ ئه‌و راته‌قاندن، ئه‌و ئه‌ردێ داگیركری هاته‌ زڤراندن ب تنێ رێژه‌كا كێم مایه‌. ل ڤێره‌ من دڤێت ئاماژێ ب مانشێتێ بابه‌تێ خوه‌ بده‌م كو دبیت ل ده‌مێ دهێته‌ خواندن، سه‌یر بیت لێ مه‌ره‌ما من ئه‌وه‌ كو زۆر كێماسی مه‌ هه‌نه‌ و ئه‌م وه‌كو ملله‌تێ كورد و حوكمه‌تا هه‌رێما كوردستانێ و هه‌می لایه‌ن و پارتێن كوردستانێ كو هێشتا دوژمنێن مه‌ دزۆرن و هه‌ر یێ پیلانان بۆ مه‌ ددانن و بلا ئه‌م ده‌ستێن خوه‌ بكه‌ینه‌ د ناڤ ده‌ستێن هه‌ڤ دا و بلا ئه‌م سیاسه‌ته‌ك و سیسته‌مه‌كێ دی په‌یره‌و بكه‌ین یێ نوو ژ خه‌رجكرن و ئیداره‌كرن و دامه‌زراندنێ و دانان و ئه‌نجامدانا پرۆژان و كه‌سانێن ماندوو بووی ژبیر نه‌كه‌ین و ئابووره‌كێ بهێز دانین و كارگه‌ه و كۆمپانیان بدامه‌زرینین و یێن خودان شیان و هه‌ژی دانینه‌ جهێن ژ هه‌ژی و یێن خودانێن به‌رژه‌وه‌ندیێن تایبه‌ت دووربێخین و داموده‌زگه‌هێن خوه‌ ب هێز بێخین و هاریكاریا خودان شیانان بكه‌ین و خزمه‌تا ملله‌تێ خوه‌ بكه‌ین دووربین ژمرۆڤكانێ و گرۆپ و گرۆپانێ و مالێ گشتی ب دادپه‌روه‌رانه‌ بهێته‌ دابه‌شكرن و ب كێمێ رازی بین و نه‌مینینه‌ ب پله‌ و ڤله‌ و كه‌لهه‌ و كۆمپانی و پرۆژێن تایبه‌ت ڤه‌ و خه‌لك بهێته‌ ژبیركرن. هێزه‌كا پێشمه‌رگه‌یی یا سه‌رتاسه‌ری بهێته‌ دروستكرن و ئه‌ڤا هه‌یی بهێته‌ لێكدان و هێزه‌كا یاسایی و راست و دروست بهێته‌ دامه‌زراندن و باوه‌ری بۆ خه‌لكێ مه‌ دروست ببیت. هه‌ر وه‌لاته‌ك و ملله‌ته‌كێ مایه‌ ب پله‌ و مال و قه‌سران ڤه‌ دوم نه‌كریه‌. له‌وما دبێژم سالا(2014) ساله‌كا پیرۆز بوو بۆ كوردان و ب تایبه‌ت ل هه‌رێما كوردستانێ داكو پێداچوونه‌كێ د سیاسه‌ت و به‌رنامێ خوه‌ بكه‌ین و پێداچوونه‌كێ ل ره‌خو روویێن خوه‌ بكه‌ین و پێداچوونه‌كێ د سیسته‌مێ خوه‌ دا بكه‌ین دا كو بشیێن پتر خزمه‌تا ملله‌تێ كورد بكه‌ین و بگه‌هیته‌ كنارێن ئێمن

ل جه‌م من نازكترین وب بهاترین و پیرۆزترین په‌یڤ په‌یڤا (پێشمه‌رگه‌) یه‌ چونكو رامانا په‌یڤا پێشمه‌رگه‌ مه‌ نه‌چار دكه‌ت ئه‌م ب پیرۆزی بزانین و بكه‌ینه‌ ژ پیرۆزیێن خوه‌ چونكو رامانا په‌یڤا پێشمه‌رگه‌ ئه‌وه‌ كو گیانێ خوه‌ ددانیته‌ پێش هه‌ر تشته‌كی و خوی گۆری ملله‌ت و وه‌لاتێ خوه‌ دكه‌ت و یێ به‌رهه‌ڤه‌ به‌رڤانیێ ژ ملله‌تێ خوه‌ بكه‌ت و خوه‌ بۆ وانان بكه‌ته‌ قوربان ب خۆشتڤترین تشت ل جه‌م هه‌ر كه‌سه‌كی، ئه‌و ژی گیان و خوینا خوه‌. هه‌كه‌ سه‌حكه‌ینه‌ پرتووكا دیرۆكا ملله‌تێ كورد، دێ بینین پتریا پشك و لاپه‌ڕێن وێ پرتووكێ دپرن ژ داستان و ده‌ستكه‌فت و قوربانیدان و سه‌ركه‌فتنێن مه‌زنێن پێشمه‌رگه‌ینه‌ و تێدا د توماركرینه‌ ب حوبرێ سۆر. د هه‌می ژێده‌رێن بیانی و خوه‌یی و د هه‌می بیرهاتن و بیره‌وه‌ریێن ملله‌تێ كورد ژی یا توماركریه‌ كو د هه‌می شۆره‌ش و به‌رخوه‌دانێن ملله‌تێ كورد دا ل كوردستانێ كو ب تنێ هێزێن پێشمه‌رگه‌یی بۆ به‌ره‌ڤانی ژ ملله‌تێ كورد و كوردستانێ كریه‌ وهه‌ر بتنێ پێشمه‌رگه‌یێ كوردستانێ بوویه‌ داستان تۆماركین و سه‌ركه‌فتن ل دووڤ سه‌ركه‌فتنێ بده‌ستڤه‌ ئیناین و ناڤێ ملله‌تێ كورد بلند كری ل ناڤه‌ندێن جیهانی. هه‌ر ب تنێ پێشمه‌رگێن قه‌هره‌مان بوون ترسا خوه‌ كریه‌ د مێشكێ دوژمنان دا و دوژمن مینا رووڤی یان ژ به‌ر ناڤوده‌نگێن پێشمه‌رگیی دره‌ڤیان و كون مشك ل به‌ر دوژمنان دبوونه‌ قه‌یسه‌ری. دارا ئازادیێ شوون بوویه‌ ب خوینا شه‌هیدێن پێشمه‌رگێن كوردستانێ و هه‌ر ب هۆسته‌كا خاكا كوردستانێ هاتیه‌ ئاڤدان ب خوینا پێشمه‌رگێن قه‌هره‌مان. د هه‌می قووناغێن بزاڤا رزگاریخوازا كوردی و د هه‌می شۆره‌ش و راپه‌رین و به‌رخودانێن ملله‌تێ كورد دا ب تنێ رۆلێ سه‌ره‌كی یێ پێشمه‌رگێن قه‌هره‌مان بوو هه‌كه‌ پێشمه‌رگه‌ نه‌بایه‌ ئه‌ڤ ره‌وشا نوكه‌ یا ئه‌م تێدا نه‌دبوو. پشتی قووناغا سه‌رهلدانا پیرۆزا سالا (1991) هه‌ر دیسا رۆلێ سه‌ره‌كی یێ پێشمه‌رگه‌یی بوو و هه‌ر پێشمه‌رگه‌ یێ ب بها بوو لێ پشتی ره‌وش به‌ر ب ئارامیێ ڤه‌ چوویی و حوكمه‌ت و په‌رله‌مان و ده‌زگه‌ه و ئۆرگان هاتینه‌ دامه‌زراندن و حوكمه‌تا هه‌رێمێ ده‌ستبكاربووی ئه‌و پێشمه‌رگێن خه‌باتا چیا دكر ب گیان و مال خوه‌ گوری كورد و كوردستانێ دكر هاتنه‌ پشت گوه هاڤێتن و مووچێن وان به‌هرا خوارنا چه‌ند رۆژه‌كان نه‌ دكر و هێدی هێدی ئه‌وێن خه‌باته‌كا دوور و درێژ هه‌یی هاتنه‌ دووركرن ژ كارێ پێشمه‌رگاتیێ و هاتنه‌ بێ به‌هركرن ژ پله‌ و پۆستێن له‌شكری و ل جهێن وان پله‌ و پۆست دانه‌ كوڕێن جاش و كرێگرتی و مسته‌شاران و ناڤێ پێشمه‌رگه‌یی بێ بها ما ل ناڤ خه‌لكی دا و زوو ب زوو یێ پێشمه‌رگه‌ ژی شه‌رم دكر ل ناڤ داموده‌زگه‌ه و خه‌لكی دا بێژیت ئه‌ز پێشمه‌رگه‌ مه‌ دا ب ئاشكه‌رایی یان نه‌ ئاشكه‌ر و دبن لێڤ لێڤكا ڤه‌ پێ كه‌نه‌ كه‌نی و یاریا پێ كه‌ن. بێ ئۆمێدیه‌كا مه‌زن بۆ خه‌لكه‌كی په‌یدا بوو و دگۆتن خوزی مه‌ ئه‌ڤ خزمه‌ت و كاره‌ نه‌كربایه‌ و خۆزی مه‌ ژی بۆ خوه‌ كاره‌كێ دی كربایه‌ یان ژی بۆ خوه‌ خواندبایه‌ و زۆر كه‌سان ژی په‌یڤێن كرێت و ره‌ش دگۆتنه‌ پێشمه‌رگه‌یی. لێ هه‌ر چه‌ند ده‌م بچیت دێ پتر راستی دیار بن و كه‌ڤیته‌ د وارێ راپه‌راندنێ دا ودێ كه‌ڤیته‌ دكه‌توارێ خوه‌ یێ دروست دا و ب تایبه‌ت پشتی هێرشێن تیرۆرستین داعشێ هاتینه‌ سه‌ر خاك و وه‌لات و ملله‌تێ مه‌ ب تنێ هه‌ر ئه‌و پێشمه‌رگێن هاتینه‌ ژبیركرن یێن كه‌ڤن و دێرین بووینه‌ خوه‌ جاره‌كا دی كریه‌ مه‌رتال و خوه‌ هاڤێته‌ به‌رسینگێ دوژمنی و قادا شه‌ڕی گه‌رم كری و دوژمن ل سنۆرێن وانان راوه‌ستاندین، جاره‌كا دی بۆ خه‌لكه‌كێ بیانی و یێ خوه‌یی سه‌لماند كو ئه‌و ناڤێ ل سه‌ر وانان جاره‌كا دی ساخكره‌ ڤه‌ و پتر بهێزخست ب تایبه‌ت ل ناڤه‌ندێن جیهانی و بیانی، هه‌ر وه‌سا ل ناڤ خه‌لكێ مه‌ ژی دا ناڤێ پێشمه‌رگه‌یی به‌رز هاته‌ راگرتن وجاره‌كا دی داستان توماركرن سه‌رێ ملله‌تێ كورد بلند كرن. ل داویێ دبێژم فه‌ره‌ حوكمه‌ت و سه‌ركردایه‌تی یا كوردی ب رژدی كار بكه‌ن ژبۆ خوشكرنا ژین و ژیارا ڤان قاره‌مانان و ره‌وشا وانان باشترلێ بكه‌ن و خه‌بات و خزمه‌تا پێشمه‌رگان ل به‌ر چاڤ بهێته‌ وه‌رگرتن و كار بكه‌ن پتر ببیته‌ هێزه‌كا نیزامی و سیسته‌می و یاسایی و ناڤێ پیرۆزێ پێشمه‌رگه‌ هه‌ر بمینیت به‌رز و بالا مینا كومتێن بلندێن چیایێن كوردستانێ و خورستی بمینیت مینا پیلایی و بریسقه‌دار بیت مینا تیرۆژكێن رۆژا ئازادیێ. له‌وما دبێژم ناڤێ پیرۆزێ پێشمه‌رگه‌یی هاته‌ قورتال كرن ژ به‌رزه‌بوون و نه‌مانێ.

مه‌زنێن مه‌ كوردان گۆتینه‌ (هه‌تاكو نیڤا ده‌ستی ره‌ش نه‌بیت تاما ده‌ڤی خۆش نابیت) یان (یێ نه‌كه‌ت ناخۆت) هه‌ر په‌یڤه‌كا مه‌زنێن مه‌ گۆتین حیكمه‌ته‌ك تێدا هه‌یه‌. باشه‌ هه‌كه‌ گه‌نج پله‌ و پۆستان و به‌رپرسیاریان وه‌رگرن و بشێن داهێنانێ د تایبه‌تمه‌ندیا خوه‌ دا بكه‌ن، دێ بیته‌ هانده‌ره‌ك و داهێنان و شیان دێ هێنه‌ دیاركرن، لێ سه‌ربۆر و ژیی و شێوه‌ و رابردوو زۆر د پێدڤینه‌ د وه‌رگرتنا هه‌ر پۆسته‌ك و به‌رپرسیاریه‌كێ دا. مه‌ره‌م ژ ڤی مانشێتی ئه‌وه‌ كو نه‌یا دروسته‌ هه‌ر كه‌سه‌ك زوو بێ خزمه‌ت یان شاره‌زایا كاری یان بێ سه‌ربۆڕ بهێته‌ پێش و ببیته‌ مه‌زن و عه‌قلدارێ هۆزه‌كێ یان رێڤه‌به‌ر و سه‌رۆكێ ده‌زگه‌هه‌كی یان پله‌ و پۆسته‌كی وه‌رگریت. هه‌ر رێیه‌كا پڕه‌ ژ ژێهه‌لی ونشیڤیان و ده‌مێ دچیه‌ رێیه‌كێ بێگومان دێ زۆر ماندی بیت و شوونوارێن وه‌ستانێ پێڤه‌ دیار بن. ژیان ژی یا پڕه‌ ژ ئاسته‌نگان و ل گه‌ل بۆرینا ژیانێ دێ ماندی بین هه‌تا ئارمانج بده‌ستڤه‌دهێن. هه‌كه‌ك لێنێرینه‌كا كورت ل باب و باپیرێن خوه‌ بكه‌ین، دێ بینین كو زۆر ماندو بووینه‌ و ب كێمێ رازی بووینه‌ و زوی ب زوی و ب ساناهی پله‌ و پایه‌ و به‌رپرسیاره‌تی نه‌ وه‌رگرتینه‌ هه‌تا كو ژیێ وان نه‌یێ گونجای بایه‌، نموونه‌ ژی ل زۆر وه‌لاتێن بیانیان و ب تایبه‌ت ئه‌مریكا هه‌تا ژیێ كاندیدێن سه‌رۆكاتیێ نه‌گه‌هیته‌ (50) پێنجی سالان نابیت بهێته‌ به‌ربژاركرن بۆ پۆستێ ناڤئینای، نهێنیا ڤێ چه‌ندێ ژی ئه‌وه‌ كو د ژیانێ دا دڤێت هه‌ر كه‌سه‌كی سه‌ربۆر و سه‌رهاتی هه‌بن و ژ هه‌می ئاسته‌نگان ده‌ربازببن. لێ نوكه‌ ل رۆژهه‌لاتا ناڤه‌راست و ل ناڤ جڤاكێ كورده‌واری پتریا خه‌لكی زوو پۆسته‌ و به‌رپرسیاره‌تیێن مه‌زن و گران وه‌ردگرن و بێ كو خزمه‌ت و خه‌بات هه‌بیت و سه‌ربۆرا كاركرن و به‌رپرساتیێ هه‌بیت و سیسته‌مێ كاركرن و ئیداره‌كرنێ بزانیت و هه‌كه‌ كه‌سه‌ك ل جهه‌كی بهێته‌ داناندن زۆر فه‌ره‌ مه‌رج و خالێن پێدڤی هه‌بن یێن وه‌رگرتنا هه‌ر پۆسته‌كی و نه‌ ب هنده‌ك رێیێن نه‌ سروشتی و نه‌ دادپه‌روه‌رانه‌ بهێنه‌ داناندن و ژ به‌ر هه‌ر ئه‌گه‌ره‌كی بهێته‌ پێشنیازكرن چ ئه‌گه‌رێن هۆزاتیێ یان مرۆڤكانێ یان كوتله‌وكۆمانێ یان ل سه‌ر بنه‌مایێن مه‌لاقی و له‌گله‌گیێ ل ڤی ده‌می مافێن كه‌سانێن خودان شیان و خه‌باتكه‌ر و یێن خزمه‌ت هه‌ی دچه‌وسینن وبوارێ خزمه‌ت كرن و پێشڤه‌چوون و كاركرنێ ب ئێكجاری دهێته‌ پێشیلكرن، به‌لكو هه‌ر هه‌بوون بۆ وارێ ناڤبری نابیت. ئه‌ڤه‌ لایه‌نه‌كێ نه‌رێنی یێ وه‌رگرتنا پۆستان بوو و لایه‌نێ خرابتر ئه‌وه‌ ده‌مێ ل ژیه‌كێ زوو و ب له‌ز پله‌ و پۆسته‌ وه‌رگرتن، دێ د ناخێ خوه‌ دا خوه‌ ژ هه‌ر كه‌سه‌كێ باشتر بینیت ژ بۆ وه‌رگرتنا پۆسته‌كێ مه‌زنتر و دێ خه‌مساریێ د كار و پۆستێ خوه‌ دا كه‌ت، ب تنێ دێ بۆ كاروپۆستێ مه‌زنتر كاركه‌ت، ئه‌ڤه‌ دێ بیته‌ ئه‌گه‌ر كو سستیه‌ك كه‌ڤیته‌ د كارێ وی یێ ئیداری دا، چونكو بێ ماندیبوون كه‌س نا گه‌هته‌ مه‌ره‌مێ و هه‌كه‌ گه‌هه‌شتنێ ژی، دێ ئه‌و پۆسته‌ یێ تژی بیت ژخرابكاری و كێماسی و شاشیان. بلا ماندی ببین و خزمه‌تێ بكه‌ین هه‌تا كو بهایێ وی پله‌ و پۆست و كورسیێ بزانین و ب درستاهی مافێ كورسیێ بده‌ینێ و كه‌سانێن ژ هه‌ژی ل جهێن هه‌ ژی بن و ب تنێ خزمه‌تا ملله‌ت و وه‌لاتێ خوه‌ بكه‌ت.

پشتی هێرشێن هۆڤانه‌ یێن تیرۆرستێن داعشێ بۆ مووسلێ و شنگار و زومار وره‌بیعه‌ و ده‌ڤه‌رێن ده‌رڤه‌یی ده‌ستهه‌لاتا هه‌رێمێ ڤه‌ وگرتنا وان ده‌ڤه‌ران ژ لایێ وان تیرۆرستێن بێ وژدان و ده‌ڤبخوین ڤه‌ و هاتنا ژمارێن زۆرێن ئاواران بۆ هه‌رێما كوردستانێ كو ژمارا وانان پتر ژ ملیۆن و نیڤانه‌ و ژمارا هه‌ره‌ زۆرا ئاواران بۆ پارێزگه‌ها دهۆكێ و ئاكنجیبوونا زماره‌كا زۆر كو پتر ژ (850) هزار ئاواران ب تنێ ل پارێزگه‌ها دهۆكێ نه‌ و ئاكنجیكرنا وان ئاواران د ئاڤاهیێن خواندنگه‌هێن دهۆكێ دا. ئه‌ڤه‌ وه‌رزێ ئه‌ڤ ساله‌ یێ خویندنێ هات و هه‌می قوتابخانه‌ دگرتینه‌ و چاره‌نڤێسێ ڤان قوتابیان یێ به‌رزه‌یه‌ و تاوانه‌كا مه‌زنه‌ كو ئه‌ڤ ساله‌ ژ ڤان قوتابیان بفه‌وتیت و بمینن بێ خویندن و هه‌ر ساله‌ك بۆ هه‌ر قوتابیه‌كی گه‌له‌كه‌. ئه‌م نه‌ ل گه‌ل وێ چه‌ندیێنه‌ كو ڤان ئاواران ده‌ربێخن یان نه‌ حه‌وینن لێ زۆر رێێن دی یێن چاره‌كرنا ڤان ئاواران هه‌بوون. بۆ نموونه‌ ئه‌و جهێن بریارا ئاكنجیكرنا ڤان ئاواران د قوتابخانا دا دای فه‌ر بۆ هزر كربانه‌ كو دێ پشتی چه‌ند هه‌یڤه‌كان سالا خویندنێ ده‌ستپێكه‌ت و قوتابی دێ قه‌ستا خویندگه‌هێن خوه‌ كه‌ن. یا فه‌ر ئه‌و بوو كو هه‌ر ل وێ رۆژێ كه‌مپ بۆ وان دروستكربانه‌ یان جهێن دی بو دروست كربانه‌ دا رێكخراو و ده‌زگه‌هێن بیانی و حوكمه‌ت ژی زووتر د هه‌وارا وانان هاتبانه‌ و نوكه‌ ئه‌و رێكخراوێن بیانی یێن تایبه‌تمه‌ندیا وان ئیداره‌كرنا ئاواران ژی خه‌مساریێ دكه‌ن ل به‌رامبه‌ر ڤان ئاواران و نه‌شێن خه‌رجیێن زێده‌ بكه‌ن و ئاواره‌ د جهێن خۆش و حه‌لان و سیرامیك و به‌رفه‌ره دانه‌. ل سالا (1988) مه‌ ژی ئاواره‌یی دیتیه‌ ول تركیا بووین هه‌تاكو سالا (1992)، سه‌ره‌رایی وان شیان و پێچێبوونێن حوكمه‌تا توركیا و د شیانێن وانان دا بوون مه‌ بكه‌نه‌ د شوقه‌ و ڤیلان دا لێ ئه‌م بۆ ده‌مێ پتر ژ چار سالان هێلاینه‌ دبن چادرێن مالوێران و بێ سوته‌مه‌نی و بێ هه‌می پێدڤیێن رۆژانه‌ وكێم خوارن و نه‌ دهێلان ئێك بهوست ژی ژ كه‌مپان ده‌ركه‌ڤین؟ ل ڤێره‌ هه‌ر چه‌ندی بۆ ڤان برایان بكه‌ین یێن كو نه‌ ئاواره‌ به‌لكو خودانێن مالێنه‌ هه‌ر كێمه‌ لێ ئه‌م و حوكمه‌ت ب هه‌ڤرا دشیایین كاره‌كێ وه‌سا بكه‌ین كو كارتێكرن ل قوتابخانێن زارۆیێن مه‌ نه‌بانه‌. یا ل ڤێره‌ من مه‌ره‌م پێ ئه‌وه‌ كو چه‌ندین جۆرێن خواندنگه‌هان هه‌نه‌ خویندگه‌هێن زه‌نگینان و خویندنگه‌هێن هه‌ژاران، هه‌كه‌ هه‌می خویندگه‌هێن مه‌ راوه‌ستیابانه‌ چ ئارێشه‌ نه‌بوون، لێ خواندگه‌هێن زه‌نگینان ئانكو خواندنگه‌هێن تایبه‌ت د ڤه‌كرینه‌ و وانه‌ و ده‌وام ئاسایی دهێته‌كرن و خواندنگه‌هێن حكومی كو من ب ناڤكرینه‌ یێن هه‌ژاران ده‌وام لێ نینه‌ و دپرن ژ ئاواران و هه‌می مامۆستا و قوتابی د روونشتینه‌ ل مالێن خۆ و ئه‌ڤ ساله‌ وه‌سا دیاره‌ دێ ژ وانان چیت و دێ كارتێكرنێ ل سه‌ر ئایندێ وان یێ زانستی و گشتی ژی كه‌ت، ڤێ پرسێ زۆر نه‌ره‌حه‌تیه‌ك كریه‌ د دلێ خه‌لكێ مه‌ دا ل ڤێره‌ جڤاكێ چینایه‌تی دروست بوویه‌ ل كوردستانێ و ب تایبه‌ت ل پارێزگه‌ها دهۆكێ، چونكو هه‌می یان پێ چێ نابیت زارۆیێن خۆ ببه‌نه‌ قوتابخانێن زه‌نگینان یێن ب پاره‌كێ مه‌زن دهێنه‌ وه‌رگرتن به‌رامبه‌ر وه‌رگرتنا قوتابیان و هه‌كه‌ زانست گه‌هشته‌ وی راده‌ی كو بازرگانی پێ بهێته‌ كرن ئه‌ڤه‌ بێ گومان دێ ئه‌رزان هێته‌ كڕین و دێ هه‌می لایه‌ن و كه‌س یێن لاواز ژ ئالیێ زانستی ڤه‌ قه‌ست كه‌نێ و وان كه‌سانان پاره‌كێ مشه‌ یێ هه‌یی و دێ زانستی ژی پێ كرن و دێ كاروانێ زانستی لاواز بیت. ل دووماهیێ فه‌ره‌ ئه‌م هه‌می راستیان بێژین و به‌رژه‌وه‌ندیا وه‌لاتیێن خۆ بپارێزین و بێژین بۆچی خواندنگه‌هێن حكومی دێ هێنه‌ گرتن و یێن تایبه‌ت ئاسایی پۆسا خواندنێ دهێته‌ برێڤه‌برن؟. له‌وما دبێژین خواندنگه‌هێن هه‌ژاران و یێن زه‌نگینان.