محەمەدعەلی نوری
بەری ئەم بچینە د ناڤ گۆتارا خوە دا گرنگ ئەوە پیرۆزباهیان ئاراستەیی یانەیا سەنحاریب بكەین پشتی شیاین بۆ سالا دویێ ل دووڤ ئێك ناسناڤێ خولا ڤۆلی بۆلا ئیراقێ و سێیێ یێ دیرۆكی بدەستڤە بینن، پێنەڤێت ئەڤ دەستكەڤتە ب سانەهی نەهاتییە بەلكو كۆمەكا خالێن سەركەفتی ل پشت هەبووینە.
ئەوا من دڤێت ئەز د ڤێ گۆتارێ دا ب گەهینم و گرنگ ئەوە بهێتە بەحسكرن، ل وەرزێ بۆری ب سەرپەرشتییا ڕاهێنەرێ پارێزگەهێ د. هەكار برقی ئەڤ تیمە شیایی ناسناڤێ خولا ئیراقێ بدەستڤە بینیت، دهاتە پێشبینیكرن وەكو مافەكێ سرۆشتی، ڕاهێنەرێ تیمێ بۆ ناڤ ڕێزێن هەلبژارتیێ ئیراقێ بهێنە داخوازكرن، لێ ژ نشكەكێ ڤە ئەوا هاتییە روودان بەرۆڤاژی پێشبینی و مافان بوو، فدراسیۆنا ڤۆلی بۆلا ئیراقێ د ڕێكەفتنەكا پشت پەردێ دا ڕاهێنەرێ تیما ڕێزا دویێ دەستنیشانكر ئەوێ پێشتر سەربۆر ل گەل هەین و نەشیایە هیچ ئەنجامەكی بۆ ئیراقێ بینیت، لڤێرە كاریسە نە بتنێ ئەوە مافێ ڕاهێنەرێ یانەیا سەنحاریب هاتیە ژێ ستاندن بەلكۆ كاریسە ئەوە لدووڤ ڕێكەفتنێن پێشتر یێن بۆ بەرژەوەندیا هەلبژارتنێن فدراسیۆنێ ڕاهێنەرەكێ دی هاتبوو دەستنیشانكرن، ئانكو ڕاهێنەرێ قارەمان هەر چو شیان و شارەزاهی هەبن دێ مافێ خوە ژ دەست دەت، سەرەرایی پرانییا وەرزشڤانێن ڤێ یاریێ ل ئیراقێ پێشبینییا دەستكاربوونا وی ل گەل هەلبژارتیێ ئیراقێ دكرن لێ نە هاتە دانان، ئەو ڕاهێنەرێ جهێ د. هەكاری گرتی د قارەمانییا بۆری یا ئاسیا دا خرابترین ئەنجامێن دیرۆكی بۆ ئیراقێ د سێ یاریێن دەستپێكی دا ئینا و دەستڤالا دەركەڤت، ژلایەكێ دووڤە ئەو یاریزانێن ل گەل یانەیا سەنحاریب یێن نە هاتینە داخوازكرن شیانێن وان باشتر بوون ژ ئەوان یاریزانێن یانەیێن دی ب ڕێكەفتن چووینە دناڤ هەلبژارتیێ ئیراقێ دا.
د وەرزێ ئەڤ سالە دا دوبارە یانەیا سەنحاریب شیا ناسناڤێ خولێ بدەستڤە بینیت، ڕاهێنەر د. هەكار برقی بەرسڤا فدراسیۆنێ دا كو ئەو شیان و شارەزاهیێن وی هەیی ڕاهێنەرێ خودانا ڕێزا دویێ نینن، ئێدی نابیت ب ڕێكەفتنێن نهێنی و بەرژوەندیێن تاكە كەسی ببنە ڕێكگر بۆ كەسێن خودان شیان و شارەزا، هەرچەندە ئەم یێ ل ئیراقێ ب سانەهییە بۆ كەسەكی د فدراسیۆنەكا وەرزشی یا ئیراقێ دا لدووڤ بەرژوەندییێن خوە دەستكاریێ بكەت و هەر كەسەكی بكەتە ڕاهێنەر خوە هەكە باوەرنامە ژی نەبیت، هیڤییا مە ئەوە بۆ داهاتی دا ئەم ڕاهێنەر و یاریزانێن خوە ببینن ب مافێن خوە شادبن و دەلیڤەیێن پشكداریێن دەرڤە دا هەبن.