ئه‌ڤرۆ نیوز، هه‌رهین محه‌مه‌د:
مۆزیكژه‌ن سالار وه‌لید خالد، لێده‌رێ‌ ئامیرێ‌ پیانۆیێ‌ یه‌ دیار كر كو وی ژ زارۆكینیا خوه‌ حه‌زا مۆزیكێ‌ هه‌بووویه‌ و پاشان ل چالاكیێن قوتابخانا ل گه‌ل بابی َخوه‌ یێ‌ مۆزیكژه‌ن وه‌لید خالد وه‌كو لێده‌رێ‌ ئوكوردیون كاركریه‌ و پاشان هاتیه‌ وه‌رگرتن ل په‌یمانگه‌ها هونه‌رێن جوان پشكا مۆزیكێ‌ ل وێرێ‌ بوویه‌ لێده‌رێ‌ ئامیرێ‌ پیانۆیێ‌ و ل گه‌ل هندێ‌ ژی خوه‌ فێری ژه‌نینا ئامیرێ‌ عودێ‌ كریه‌، چونكو ده‌نگێ‌ وی نێزیكی عودێ‌ بوویه‌ و دیسان پشكداری د چه‌ندین خولێن ئه‌ندازیاریا ده‌نگی دا كریه‌ و هه‌تا نوكه‌ ژی یێ‌ به‌رده‌وامه‌.
سالاری گۆت: “من گه‌له‌ك مفا ژ په‌یمانگه‌هێ‌ و شیره‌تێن بابێ‌ خوه‌ دیتیه‌ و ئه‌ڤه‌ ژی وێ‌ دگه‌هینت كو هه‌تا نوكه‌ یێ‌ به‌رده‌وامم ل سه‌ر مۆزیكێ‌، چونكو ژیان بێ‌ مۆزیك و ستران ده‌رباز نابیت و هه‌كه‌ مۆزیك و سترانبێژی ئارازو نه‌بیت چه‌ند یێ‌ ئه‌كادیمی بیت نه‌شێت بیته‌ مۆزیكژه‌ن یان سترانبێژ”.
هه‌روه‌سا گۆت: هه‌تا نوكه‌ من كه‌س نه‌دیتیه‌ كو ده‌رچوویێ‌ په‌یمانگه‌هێ‌ بیت ل سه‌ر جادێ‌ وه‌كو وه‌لاتێن بیانی مۆزیكێ‌ ب ژه‌نیت و دبیت شه‌رم بكه‌ت و هزربكه‌ت پێنچ سالان من په‌یمانگه‌ه ته‌مام كری و ئه‌كادیمی مه‌ بۆچی دێ‌ ل سه‌ر جادێ‌ مۆزیكێ‌ ژه‌نم و دبیت ژی ئه‌و كه‌سه‌ خوه‌ مه‌زن بینت و ژخوه‌ نه‌گریت وی كاری بكه‌ت و ب مخابنی ژی ڤه‌ ل كوردستانێ‌ مرۆڤ چه‌ند ئه‌كادیمی بیت و بخوینت دمۆزیكێ‌ دا نابیته‌ ده‌رگه‌هه‌ك مرۆڤ خوه‌ پێ‌ خودان بكه‌ت بتنێ‌ ئه‌و ئه‌و مۆزیكژه‌نێن دچنه‌ ده‌واتان خوه‌ ب هونه‌ری خودان دكه‌ن، ژبه‌ركو ده‌وات رۆژانه‌ نه‌ و دبینم گه‌له‌ك یا خه‌له‌ته‌ مرۆڤ پێنچ سالا ئه‌كادیمی خاندبیت و مرۆڤ بیته‌ مۆزیكژه‌نێ‌ ده‌واتان و ئه‌ڤ چه‌نده‌ ژی بۆ سه‌ندیكا هونه‌رمه‌ندان و رێڤه‌به‌ریا گشتی یا ره‌وشه‌نبیری و هونه‌ری دزڤریت كو دڤێت ببنه‌ هاریكار و پشته‌ڤانێن هونه‌رمه‌ندا دا كو دبه‌رده‌وام بن ل سه‌ر كاری َخوه‌ و رۆژ بۆ رۆژێ‌ كارێن جوانتر ئه‌نجام بده‌ن، چونكو هه‌موو ملله‌ت ب هونه‌ری پێش دكه‌ڤن.

ئه‌ڤرۆ نیوز، ره‌مه‌زان هه‌رنی:
سترانبێژ شه‌یدا قه‌وامی د دیداره‌كێ‌ دا دیار كر كو وێ‌ ل سالا 2013 ل وه‌لاتێ‌ ئه‌لمانیا ده‌ست ب كارێ‌ هونه‌ری كریه‌ و د هه‌مان سال دا به‌رهه‌مه‌ك ل دۆر وان ئافره‌تێن ل وه‌لاتێ‌ ئیرانێ‌ دهێنه‌ سێداره‌دان به‌لاڤكر، به‌لێ‌ به‌ری كو ب شێوه‌یه‌كێ‌ فه‌رمی بهێته‌ د ناڤ گۆره‌پانا هونه‌ری دا وێ‌ حه‌زه‌كا مه‌زن ل سه‌ر گۆتنا سترانان هه‌بوو و به‌رده‌وام ستران بۆ كه‌سوكارێن خوه‌ و ل شه‌هیانان دگۆتن و گۆت: “سه‌ره‌رایی گۆتنا سترانان من ئامیرێ‌ ده‌فێ‌ ژی ژه‌نیه‌، چونكو بابێ‌ من ژی ئه‌ڤ ئامیره‌ دژه‌نی و ژ وی فێری ژه‌نینانا ڤی ئامیره‌یی ببووم”.
ناڤهاتیێ‌ خویا كر كو هه‌تا نوكه‌ وێ‌ حه‌فت ستران ب شێوه‌یێ‌ تراك به‌لاڤكرینه‌ و یا به‌رهه‌ڤیان بۆ به‌لاڤكرنا به‌رهه‌مه‌كێ‌ نوو دكه‌ت ب ناڤێ‌ (نا بۆ جه‌نگ) كو دێ‌ دگه‌ل سترانبێژه‌كێ‌ فارس ب زمانێ‌ كوردی به‌لاڤ كه‌ت و گۆت: “سترانان بۆ دلێن شكه‌ستی و زه‌لامان دبێژم و دژی وێ‌ چه‌ندێ‌ مه‌ ئافره‌ت سترانا ب ئافره‌تێ‌ بێژیت”.

ئه‌ڤرۆ نیوز، زنار تۆڤی:
موزیكژه‌ن و هه‌لبه‌ستڤان و نڤیسه‌ر و شێوه‌كار سارا ته‌لایی، كو خه‌لكا رۆژهه‌لاتێ‌ كوردستانێ‌ یه‌ و نوكه‌ ل هه‌ولێرێ‌ دژیت و ئامیرێ‌ ده‌فێ‌ دژه‌نیت، د دیداره‌كێ‌ دا دیار كر كو ل دووڤ به‌لگه‌یان، پرانیا ده‌فێن جیهانێ‌ ل كوردستانێ‌ دهێنه‌ دروست كرن، ئه‌ڤه‌ ژی وێ‌ چه‌ندێ‌ دگه‌هینیت، كو كوردان ئه‌ڤ ئامیره‌ یێ‌ دروست كری، دیسان د وارێ‌ ده‌روونناسی ژی دا، هند یا نزیكه‌ بۆ روحا كه‌سێ‌ كورد و جڤاكێ‌ مه‌ گه‌له‌ك مفا یێ‌ ژێ‌ وه‌رگرتی، دیسان د موزیكا هه‌ڤچه‌رخ دا، مامۆستا و ژه‌نیارێن ژێهاتی یێن ڤی ئامیری وه‌كریه‌، كو ئه‌ڤ ئامیره‌ هه‌ر ب ساخی ب مینیت، هه‌روه‌سا ئه‌ڤ ئامیره‌ بوویه‌ پێدڤیه‌كا گرنگ بۆ په‌روه‌رده‌كرنا قۆتابیان و د كور و كۆمبوونێن موزیكێ‌ ژی دا، دیسان ڤی ئامیری رۆله‌كێ‌ مه‌زن هه‌یه‌ د وارێ‌ ته‌سه‌وفێ‌ دا ل كوردستانێ‌ دا د گه‌له‌ك جه‌ژن و هه‌لكه‌فتێن ئایینی دا ئامیرێ‌ ده‌فێ‌ دهێته‌ ب كارئینان، هه‌روه‌سا ئامیرێ‌ ده‌فێ‌ ب ڤی ره‌نگێ‌ نوكه‌ مولكێ‌ چ وه‌لاتان نینه‌ و یێ‌ تایبه‌ته‌ ب ملله‌تێ‌ كوردستانێ‌ ڤه‌ و گه‌له‌ك ستران ژی ب تنێ‌ ب ڤی ئامیری دهێنه‌ چێكرن.
سارا زێده‌تر دبێژیت: ل دووڤ بورینا ده‌می گوهۆڕین ب سه‌ر ئامیرێ‌ ده‌فێ‌ دا هاتیه‌، ئامیرێ‌ ریتمی یان درام وه‌كو بازنێ‌ ل دۆر ئالاندیه‌ ب پیستی و ل پرانیا وه‌لاتێن رۆژئاڤایی و رۆژهه‌لاتی هه‌بوویه‌ و نوكه‌ ژی هه‌یه‌، لێ‌ ئه‌و شێوازێ‌ نوكه‌ ل كوردستانێ‌ دهێته‌ دیتن، ئه‌م ب روونی دشێین بێژین، كو یێ‌ تایبه‌ته‌ ب وی وه‌لاتی و ئاخێ‌ و یێ‌ جۆدایه‌ ل گه‌ل یێن وه‌لاتێن دیتر، دیسان ل شارستانیێن كه‌ڤن ژی دا ئه‌ڤ ئامیره‌ بۆ مه‌ره‌مێن جۆدا هاتیه‌ ب كار ئینان.
ناڤهاتیێ‌ ئه‌و چه‌ند ژی ئاشكرا كر كو ره‌سه‌ناتیا ده‌فێ‌ ل كوردستانێ‌ و مێژوویا وێ‌ گه‌له‌ك یا كه‌ڤنه‌، دبیت هنده‌ك نوویاتی د پێكهاتا وێ‌ دا هاتبنه‌ كرن، هه‌تا گه‌هشتیه‌ ڤێ‌ قۆناغا نوكه‌، هه‌روه‌سا ل پارێزگه‌ها خۆرستانێ‌، كو خه‌لكێ‌ وێ‌ نه‌ڤیێن لۆریانه‌، ل سالێن 1962 هه‌تا سالا 1966 ژ ئالیێ‌ ستافه‌كێ‌ میژوونڤیسێن هه‌ڤبه‌ش، یێن زانكۆیا كالیفۆرنیا و سه‌نته‌رێ‌ رۆژهه‌لاتناسیێ‌ یێ‌ زانكۆیا شیكاگۆ پێكهاتبوون، وان دیار كریه‌، كو ئه‌و تشتێن وان ل وێ‌ ده‌ڤه‌رێ‌ دیتین، مێژوویا وان ڤه‌دگه‌ریت بۆ به‌ری سه‌رده‌مێ‌ داهێنانا نڤێسینێ‌، هه‌ر چه‌نده‌ موزیك د ئاسته‌كێ‌ باش دا بوویه‌، دیسان بۆ ده‌رخستنا ریتمێ‌، كو پیستێ‌ ئاژه‌لان ب سه‌ر چارچۆڤه‌كێ‌ گرێدایی ڤه‌ بوویه‌، هه‌روه‌سا ل كوردستانێ‌ ده‌واتێن كوردی د ناڤ بازنه‌كێ‌ دا جهێ‌ خوه‌ گرتیه‌، هه‌روه‌سا خه‌له‌كێن ده‌فێ‌ سمبۆلن بۆ ژیانێ‌ و په‌روه‌رده‌كرنا بازنێ‌ مرۆڤاتیێ‌ و فه‌لسه‌فا بلند و نزمبوونا ده‌نگان، بلندی و نزمبوونا مرۆڤی، ده‌نگڤه‌دان و په‌یوه‌ندیێن دناڤبه‌را خه‌له‌كێن ده‌فێ‌ دا، ئاماژه‌نه‌ بۆ ب هێزبوون و ئێكگرتی و یێكده‌نگیا ده‌ستهه‌لات و ریتمێ‌ دگه‌هینیته‌ دناڤبه‌را مرۆڤان دا.
دیسان ئه‌و چه‌ند ژی گۆت: ئه‌و گه‌له‌ك حه‌ز ژ ژه‌نینا ئامیرێ‌ ده‌فێ‌ دكه‌ت و خۆشیه‌كا تایبه‌ت ژ ڤی ئامیری دبینیت، ل گه‌ل هندێ‌ ژی ئه‌ڤه‌ ده‌مێ‌ چه‌ندین سالانه‌ ئه‌و كارێ‌ شێوه‌كاریێ‌ دكه‌ت و ئێكه‌ ژ شێوه‌كارێن هه‌ری دیار ل كوردستانێ‌، هه‌روه‌سا موزیك و شێوه‌كاری و هه‌لبه‌ست هه‌موو پێكڤه‌ تمامكه‌رێن ژیانا وێ‌ نه‌ و هندی د ژیانێ‌ دا مابیت، ئه‌و دێ‌ ب رێیا موزیكێ‌ و شێوه‌كاریێ‌ و هه‌لبه‌ستێ‌ خزمه‌تا هونه‌رێ‌ كوردی كه‌ت.

ئه‌ڤرۆ نيوز، هه‌رهین محه‌مه‌د:
سینه‌ماكارێ‌ گه‌نج محه‌مه‌د پیرۆ دیاركر كو تشتێ‌ خوه‌ش دسینه‌مایێ‌ دا ئه‌وه‌ ده‌مێ‌َ ده‌رهێنه‌ر دزانیت په‌یاما وی گه‌هشت و گه‌هاندنا په‌یامێ‌ بۆ بینه‌ری خوه‌شترین تشته‌.
پیرۆی گۆت: په‌یڤا دراما ئه‌م خه‌له‌ت ب كاردئینن و په‌یڤا دراما ئه‌رستوی یا به‌حس كری ژسینه‌مایێ‌ و شانۆیێ‌ پێك دهێت و په‌یڤا دراما ئه‌م بۆ زنجیرێن ته‌له‌ڤزیۆنی ب كاردئینین و زنجیرا ته‌له‌ڤزیۆنی كێمتر نینن ژ سینه‌مایێ‌ زنجیرا ته‌له‌ڤزیۆنێ‌ خزمه‌ته‌كه‌ و گه‌هاندنا په‌یامه‌كێ‌ یه‌ و دروستكرنا ئه‌كته‌رانه‌ و گه‌له‌ك تشتێن دی، به‌لی َپتر بازرگانیه‌ و زنجیرا ته‌له‌ڤزیۆنی پالپشته‌كه‌ بۆ سینه‌مایی، چونكو سینه‌ما پرتووكخانه‌كا زانستی یه‌ ب شێوازه‌كێ‌ جودا و گه‌هاندنا په‌یامێ‌ و هه‌ر ده‌مێ‌ خه‌لك ژ پرتووكان بێزار ببیت وان په‌یڤان دكه‌نه‌ لڤین و ب سینه‌مایێ‌ نیشادده‌ن و هه‌ر گه‌هاندنا پرتووكێ‌ یه‌ ب لڤین.
ناڤهاتی خویا كر كو هه‌ر تاخه‌كی هۆله‌كا سینه‌مایێ‌ هه‌بیت نابیته‌ ئه‌گه‌رێ‌ پێشخستنا سینه‌مایێ‌ و هه‌ر كه‌سه‌كێ‌ كورد نوكه‌ د بوارێ‌ سینه‌مایێ‌ دا كاربكه‌ت بتنێ‌ مه‌ره‌مامه‌ پێشكه‌فتنا سینه‌مایێ‌ یه‌ ل هه‌رێما كوردستانێ‌ و نوكه‌ قوتابیێ‌ په‌یمانگه‌ها هونه‌رێن جوانم پشكا سینه‌مایێ‌ و هه‌تا نوكه‌ پشكداری 21 فلمێن سینه‌مایی بوویمه‌ ب رۆلێن جودا و من رۆلێن سه‌ره‌كی ژی وه‌رگرتینه‌.
ل دووماهیێ‌ محه‌مه‌دی گۆت: فلمه‌ فیسته‌ڤالێن دهۆك و سلێمانیێ‌ ل سه‌ر سیسته‌مه‌كێ‌ بازرگانیه‌ و فیسته‌ڤالێن فلمێن كوردی ل هه‌رێما كوردستانێ‌ پێناسا سینه‌ما كوردی ناكه‌ن ب گشتی فیسته‌ڤال یا كوردیه‌ و ل دهۆكێ‌ دهێته‌ گێران، به‌لێ‌ كه‌سه‌كێ‌ ئیرانی خه‌لاتی دبه‌ت دڤێت فیسته‌ڤالێن كوردی دا سینه‌ما كوردی هه‌با و ده‌رهێنه‌رو ئه‌كته‌رێن كورد خوه‌ تێدا دیت با و هه‌ر فلمێن كوردی خه‌لاتێ‌ فیسته‌ڤالێ‌ بربا.