سەرۆكێ حوكمەتا هەرێما كوردستانێ راگەهاند، ل دەمێ سەرەدانا وی بۆ بەغدا داخواز ژ ئالیێن سیاسی كر پێكڤە « بلا پێكڤە بەرنامەیەكی بۆ پێشئێخستنا ئیراقێ و هەرێما كوردستانێ دانین» ئاماژە ب ئەوێ چەندێ ژی كر» مە وەلاتەكێ زەنگین یێ هەی، تنێ مە پێدڤی ئیدارەكرنا باشتر یا هەی تاكو بگەهینە ئاستێ وەلاتێن پێشكەفتی ل جیهانێ».
دوهی دوشەمبی 3/6/2024، مەسرور بارزانی، سەرۆكێ حوكمەتا هەرێما كوردستانێ د رێورەسمەكیدا، بەرێ بنیاتی بۆ هەردو پاركێن ئالۆكا و سەرهلدان ل باژێرێ دهۆكێ ب گۆژمەیێ 131 ملیار و 898 ملیۆن و 515 هزار دیناران دانا.
سەرۆكێ حوكمەتا هەرێما كوردستانێ د رێورەسمیدا پەیڤەك ل دۆر پلان و بەرنامەیێ كابینەیا نەهێ یا حوكمەتا هەرێمێ بۆ زێدەكرنا رووبەرێ كەسكاتیێ ل هەرێما كوردستانێ، روو ب رووبوونا دیاردەیا گەرمبوونا ئەردی و گوهۆڕینا سەقای، سەردانا وی یا ئەڤێ دووماهیێ بۆ بەغدا و چارەسەركرنا كێشەیێن هەلاویستی د ناڤبەرا هەردو حوكمەتێن هەرێما كوردستانێ و فیدرالیدا، پێشكێشكر.
مفا وگرنگییا هەردو پاركان بۆ وەلاتیێن دهۆكێ
ل دووڤ گۆتنا سەرۆكێ حوكمەتا هەرێما كوردستانێ» هەردو پاركێن ئالۆكا و سەرهلدان چەندین خزمەتگوزاریێن گرنگ بخوەڤە دگرن و دێ خزمەتەكا باش گەهێننە ئاكنجیێن باژێرێ دهۆكێ، چونكە رووبەرێ هەردو پاركان گەلەك یێ بەرفرهەیە و هیڤیدارم ئەڤ هەردو پاركە ببنە جهەكێ باش بۆ بۆراندنا دەمەكێ خوەش هەروەسا تمامبوونا ئەڤان هەردو پاركان دێ دیمەنەكێ دلڤەكەر دەتە دهۆكا رەنگین و دێ كاریگەری ژی ل سەر سەقایێ د ناڤ باژێرێ دهۆكێدا هەبیت».
پلانا حوكمەتا هەرێمێ بۆ زێدەكرنا رووبەرێ كەسكاتیێ
وەكو سەرۆكێ حوكمەتا هەرێما كوردستانێ ئاماژێ پێدای» مخابن ژ روویێ كەسكاتیێ، هەرێما كوردستانێ هێشتا ل ئاستێ پێدڤی و ستانداردێن نێڤدەولەتی نینە هەرچەندە پارێزگەها دهۆكێ د ئەڤی بیاڤیدا ژ دەڤەرێن دی باشترە، بەلێ پێدڤییە گرنگییەكا پتر ب زێدەكرنا رووبەرێ كەسكاتیێ ل هەرێما كوردستانێ بدەین».
مەسرور بارزانی گوت ژی» كابینەیا نەهێ یا حوكمەتا هەرێما كوردستانێ، رێنمایێن پێدڤی یێن دەركرین بۆ زێدەكرنا رووبەرێ كەسكاتیێ و چاندنا داروباری ل دەمێ بجهئینانا پڕۆژەیان ب تایبەتی ل جهێن ئاكنجیبوونێ».
سالانە رۆژا 5 خزیرانێ رۆژا جیهانییا ژینگەهێیە، سەرۆكێ حوكمەتا هەرێما كوردستانێ گوت» ئەڤێ رۆژا جیهانی ب دەلیڤە دزانم بۆ ئەوێ چەندێ داكۆكیێ ل پێگیریبوونا حوكمەتا هەرێما كوردستانێ بكەم د بوارێ پاراستنا ژینگەهێدا، كو نابیت تنێ ئەركێ حوكمەتێ بیت، بەلكو پێدڤییە ئەركێ مە هەموویان و وەلاتییان بیت».
روو ب رووبوونا دیاردەیا گەرمبوونا ئەردی و گوهۆڕینا سەقای
مەسرور بارزانی ل دۆر پاراستنا ژینگەهێ دوپاتكر» خودایێ مەزن سرۆشت و ژینگەهەكا جوان یا دایە مە، پێدڤییە بپارێزین و ب پاقژی بهێلین بۆ ئەوێ چەندێ نڤشێن بهێن مفای ژێ ببینن، مە ل حوكمەتا هەرێما كوردستانێ، ل دووڤ شیانان، چەند پێنگاڤ یێن هاڤێتین بۆ روو ب رووبوونا دیاردەیا گەرمبوونا ئەردی و گوهۆڕینا سەقای».
سەرۆكێ حوكمەتا هەرێمێ دیاركر ژی» ب گۆڕەی شرۆڤەیێن زانایێن ئەڤی بواری، دەڤەرا مە دێ ئێك ژ وان دەڤەران بیت كو ب دژواری دێ كەڤیتە بن كاریگەرییا گوهۆڕینا سەقای، لەوما ئەم یێن رابووین بجهئینانا هەژمارەكا پێنگاڤ و پێرابوونێن پێدڤی بۆ ئەوێ چەندێ روو ب روویێ دیاردەیا گەرمبوونا ئەردی و گوهۆڕینا سەقای ببین».
سەبارەت ئەوێ چەندێ كابینەیا نەهێ یا حوكمەتا هەرێمێ چ كریە بۆ روو ب رووبوونا ئەوێ دیاردەیێ، مەسرور بارزانی راگەهاند كو كار یێ هاتییە كرن بۆ كونترۆلكرن و بكارئینانا ئەوان غازێن ژ زەڤیێن پەترۆلی دەردكەڤن، چەندین بەنداڤ یێن دروستكرین و هەروەسا كار بۆ ڤەژاندنا دارستانێن هەرێما كوردستانێ كریە، بەلێ ب پێدڤی دزانیت» پێنگاڤێن زێدەتر ب هاڤێژین و ژ هەموویان گرنگتر، ب هێزكرنا فەرهەنگا ژینگەهپارێزیێ د ناڤ گەلێ خوە دا، بۆ ئەوێ چەندێ ژی رۆلێ راگەهاندنێ، پەروەردەیێ، رێكخراوێن جڤاكێ مەدەنی و ب تایبەت رۆلێ خێزانێ یێ گرنگە».
سەرەدانا سەرۆكێ حوكمەتا هەرێمێ بۆ بەغدا
سەرۆكێ حوكمەتا هەرێمێ ل دۆر سەرەدانا خوە یا ئەڤێ دووماهیێ بۆ بەغدا ئاماژەكر د كۆمبوونێن خوە دا ل گەل بەرپرسێن حوكمەتا ئیراقێ و ئالیێن سیاسی یێن ئیراقێ «مە ب شێوەیەكێ گەلەك رۆهن و ئاشكرا دانوستاندن ل سەر چارەسەركرنا بنەڕەتی یا كێشەیێن هەلاویستی د ناڤبەرا هەردو حوكمەتێن هەرێما كوردستانێ و ئیراقێدا كر».
هەروەسا دیاركر، ل بەغدا ب پترییا ئالیێن سیاسی و بەرپرسێن حوكمەتا ئیراقێ راگەهاندییە» جهێ داخێ و دلتەنگێییە هەتا كو نوكە دانوستاندن ل سەر بابەتێ مووچەی و قەیرانێن هەلاویستی د ناڤبەرا هەردو حوكمەتێن هەرێما كوردستانێ و فیدرالیدا دكەین. پێدڤییە ئەڤ مافە د سروشتی بن و نەبنە دەنگوباسێن راگەهاندنێ».
مەسرور بارزانی گوت رۆهنكر كو ب بەرپرسێن ئیراقی راگەهاندییە» بلا پێكڤە بەرنامەی بۆ پێشئێخستنا ئیراقێ و هەرێما كوردستانێ ب شێوەیەكێ باشتر بدانین تاكو هەڤڕكیێ ل گەل وەلاتێن كەنداڤی و وەلاتێن دی یێن جیهانێ بكەین. هەروەسا بلا ژ هەموو روویەكیڤە وەلاتێ خوە بەر ب پێشڤە ببەین».
سەرۆكێ حوكمەتا هەرێمێ دوپاتی ل ئەوێ چەندێ كر» وەلاتێ مە، وەلاتەكێ زەنگینە و مە گەلەك سامانێن سروشتی و مادی یێن هەین، تنێ مە پێدڤی ب ئیدارەكرنا باشتر یا هەی تاكو بگەهینە ئاستێ وەلاتێن پێشكەفتی یێن جیهانێ. هیڤیدارم ئێدی دەمێ خوە بۆ دروستكرنا گرفت و ناكۆكییان ب هەروە نەبەین و ئەم هەموو هەڤڕكیێ بكەین بۆ زیچدەتر خزمەتكرنا وەلاتیێن خوە و بەر ب پێشڤەبرنا ئەڤەدانییا وەلاتێ خوە».

دوهی دوشەمبی 3/6/2024، مەسرور بارزانی، سەرۆكێ حوكمەتا هەرێما كوردستانێ ل باعەدرێ بەرێ بنیاتی بۆ دروستكرنا رێكا دوسایدییا باعەدرێ – ئێتیتێ دانا، درێژییا رێكێ 26 كیلۆمەترە و ب گۆژمەیێ 135 ملیار و 584 ملیۆن دیناران دێ هێتە دروستكرن و ب تمامبوونا ئەوی پڕۆژەی هەموو رێكا دهۆك – هەولێر دێ بیتە دوساید.
سەرۆكێ حوكمەتا هەرێما كوردستانێ د ئەوێ رێورەسمیدا پەیڤەك پێشكێشكر و ئەڤە دەقێ وێ یە:

بەرهەڤبوویێن بەرێز، سوپاسییا بەرهەڤبوونا هەوە دكەم. ب تایبەت سوپاسییا بەرهەڤبوونا میرێ ئێزدییان و جڤاتا رۆحانی دكەم كو د ئەڤی رێورەسمیدا ل گەل مە د پشكدارن.
گەلەك یێ دلخوەشم ئەڤرۆ بۆ جارا دویێ كۆم دبین بۆ دانانا بەرێ بنیاتێ هەژمارەكا پڕۆژەیێن
گرنگ بۆ ئەڤێ دەڤەرێ. ئەو پڕۆژەیێ نوكە بەرێ بنیاتی بۆ ددانین، پڕۆژەیێ رێكا باعەدرێ – ئێتیتێ یە كو ئێكە ژ پڕۆژەیێن گەلەك پێدڤی و پشكەكا گرنگە ژ پڕۆژەیێ پێكڤەگرێدانا پارێزگەهێن مەیە ب رێكێن ستاندارد و باش.
تمامبوونا ئەڤێ رێكێ دێ خزمەتەكا مەزن گەهینیتە خەلكێ باعەدرێ و شێخان و دهۆكێ و هەولێرێ و كوردستانێ ب گشتی. بزاڤێن مە دەستپێكەكە بۆ باشتركرنا رێكێن بەرفرەه و ئۆتۆبانان ل سەرانسەری هەرێما كوردستانێ ب هاریكارییا بسپۆرێن دەرڤە و شیانێن ناڤخوە. مە دەست ب ئەوان رێكاران كریە كو ئێدی رێك و پر ل هەرێما كوردستانێ ل گۆڕ پیڤەرێن جیهانی بهێنە دروستكرن.
ل سالێن بۆری سەرەرای هەموو ئاستەنگێن دارایی و ئابۆری و ئەڤ ئاستەنگێن هاتینە پێش، مە كاركرن د بیاڤێ رێك و پرا دا رانەگرتییە و بێگومان ب باشتربوونا رەوشا دارایی دێ هەموو بزاڤێن خوە كەین ب شێوەیەكێ بەرفرەهتر و ب لەزتر ژی ئەڤان پڕۆژەیان ئەنجام بدەین. هەروەكو گەلەك بوارێن دی بابەتێ فەرهەنگ و كەلتوورێ بكارئینان و سەرەدەریكرن ل گەل رێك و جادە و پران ئەوژی گەلەك یا گرنگە. ئەركێ حوكمەتێیە ب باشترین شێوە جادە و رێك و پران دروست بكەت و بێخیتە د خزمەتا وەلاتییاندا و د هەمان دەمدا ئەركێ وەلاتییان ژی یە كو رێنماییێن هاتنوچوونێ ل بەرچاڤ بگرن و خوە و كەسوكار و هەڤالێن خوە بپارێزن و هەروەسا بابەتەكێ دی یێ گرنگ یێ هەی كو دخوازم باس بكەم، وەكو ئەز دبینم نە حوكمەتێ و نە وەلاتییان وەكو پێدڤی گرنگی پێ نەدایە ئەوژی بابەتێ پاراستنا ( موحەرەماتێن) جادە و ئۆتۆبان و رێك و پرایە، جهێ داخێیە كو دبینین وەلاتی گەلەك جاران دوكانێن خوە یان هندەك جاران مالێن خوە و جهێن كارێ خوە ل رەخێن جادەیان دروست دكەن و ئەڤ چەندە ژی یا بوویە مەترسی ل سەر ژیانا وان و كەسوكارێن وان و زارۆیێن وان و ژ ئالییەكێ دیڤە سیمایێ ئەڤان جادە و ئۆتۆبانان یا تێكدای و ئاریشەیێن هاتنوچوونێ ژی هندەك جاران دروست دكەن، پێدڤییە ب رژدی كار ل سەر ئەڤی بابەتی بهێتە كرن و رێك و دەور و بەرێن وی ل گۆڕەی ستانداردان بهێنە پاراستن و داخوازێ ژ وەلاتییان دكەم ئێدی سیمایێ ئەڤان جادەیان تێك نەدەن و (موحەرەماتێن) جادەیان دەرباز نەكەن و داخوازێ ژ دەزگەهێن میری و حوكمەتێ ژی دكەم چاڤدێریێ ل ئەڤان رێكا بكەن و هەكە كەسەكی ب نەزانین یان ب هەر مەرەمەكا دی ئەڤ (مەحەرەمات) پێشێل نەكربیت هەلگرن و ب تێكگەهشتن هندەك جهێن دی بۆ بهێنە پێشنیازكرن.
جهێ دلخوەشیێیە كو ل ئامارێن ل ئەڤێ دووماهیێ روودانێن هاتنوچوونێ ل ڤێ دەڤەرێ یێن كێم بووین كو گەلەك جاران بووینە ئەگەرێ گیان ژدەستدانا خەلكەكی و گەلەك روودانێن هاتنوچوونێ یێن دلتەزین كو ئەم گەلەك دلگران دكرین پەیدا د بوون، هیڤیدارم ب ئەنجامدانا ئەڤان پرۆژەیێن رێك و پران ئەڤ روودانە ژی كێم ببن.
سەرەرای هەموو زەحمەت و دژواری و قەیرانان ئەم ل سەر ئەنجامدانا پڕۆژەیان د بەردەوام بووین و مە رانەگرتینە و دێ د بەردەوام ژی بین ئەڤێ دەرفەتێ ب دەلیڤە دبینم كو پەیامەكێ ئاراستەی مووچەخۆرێن هەرێما كوردستانێ بكەم، ئەركێ مە یێ بەراهیێ دابینكرنا مووچەیێن وانن و بۆ ئەڤێ مەرەمێ بەردەوام ئەم د پەیوەندیێ و هەڤكاریێ داینە د گەل حوكمەتا فیدرالیدا بۆ ئەوێ چەندێ كو ئەڤ بابەتە بەر ب دووماهی بچیت و مووچە و بودجەیا هەرێما كوردستانێ ب شێوەیەكێ بنەڕەتی بهێنە چارەسەركرن و ئێدی مە ب ئەڤان گرفت و كێشەیان ڤە مژوول نەكەن. داكو ئەم ژی هێز و شیانێن خوە یێن سەرەكی بۆ خزمەتكرنا خەلكی و پێشكێشكرنا پڕۆژەیێن زێدەتر بۆ خەلكێ دەڤەرێ و هەموو كوردستانێ بێی جوداهی تەرخان بكەین .