دیدار، سالار محەمەد دۆسكی:

2-5

دەمێ‌ (مەلا مستەفا بارزانی) هاتی ل گەل (ملا حەسەن سادقێ‌ برو) چووینە دەف و هەمی بابەت بۆ هاتیە شرۆڤەكرن و زاخۆ ئێكەم قەزا بوو ل دەسپێكا شۆرەشێ‌ بهێتە ئازادكرن و ئەڤە بۆ بنیاتەك بۆ شورەشا ئیلۆنێ‌ و (ملا مستەفا بارزانی) (ملا قاسم) راسپارد بۆ بەرپرسایەتی یا رێكخراوا (بەهدینان) كو دەڤەرێن (ئیبراهیم خەلیل و پێشابور،هەوێری و دەشتا سلێڤانەی)یا و (عەلی هالو) بۆدەڤەرێن سلێڤانەی وێ‌ دەڤەرێ‌ و ل گەل (ملا مستەفا بارزانی) مان هەتا هاتینە ئاسهێ‌ و كەفتینە شەڕی و دووڤ هاتنە دەڤەرا دۆسكیا و پشت بەنداڤا دهۆك و دووڤ دا گوندێن (حوجاڤا) هەتا داستانا (زاویتە) دەست پێكری وی دەمی (ملا قاسم و سەعدی زاویتە) مەفرزا ئێكێ‌ بووینە گەهشتینە گەلیێ‌ زاویتە و دو هێز بووینە ئێك (سەعدی) و ئێك( ملا قاسم) هەتا پێشمەرەگە گەهشتی و پشت باگێرا لەشكرێ‌ ئیراقێ‌ شكەستی یە و ل گەل (ملا مستەفا بارزانی) چووینە ناف بەرواری یا و هەتا گەهشتینە (مرێبا) و دووڤ دا (ملا مستەفا بارزانی) چوویە (بارزان) و (ملا قاسم) و هەڤالێن خوە جارەكا دی ڤەگەریاینە (زاخۆ) و هەتا سالا 1975 بەرەدەوام بوویە، دووڤ دا ل سالا 1961 هەمی دەستهەلاتا دەڤەرا زاخۆ كەفتیە دەستێ‌ فەرماندێ‌ خودێ‌ ژێ‌ رازی (عیسێ‌ سوار) و بابێ‌ من ئەو هەر ل دەڤەرێ‌ ماینە وەك (سەرقول) هەتا سالا 1965 هاتە ڤەگوهاستن بۆ هێزا شێخان و شورشا ئیلونێ‌ دو جاران بریندار بوویە، ل شۆرەشا گۆلانێ‌ رۆلەكێ‌ كاریگەر هەبوو دناڤا رێكخستنێن نهینی دا دناڤا باژێری و سالا 1991 بەری سەرهلدانێ‌ چەند كۆمبوون ل گەل (خالد بانی) ئەنجامداینە وی دەمی چەند نێزیكی (12) نامە ب رێكا دو كەسان هاتبوونە (محەمەد، كەریم بانی) ئەو نامە بۆ مستەشارا بوونە مالا مە، ژ ئەوێ‌ هژمارا من نیاسین هەر ئێك ژ (براهیمێ‌ عەلی) و (عسمەت دینو) و (خەلیل نعمەت) نیاسین و نامێن وا ل گەل دابوون و بابێ‌ من ئەو نامە گەهاندیە (براهیمی عەلی) و پشتەڤانیا خوە بۆ سەرهلدانێ‌ دیاركر و گومان نینە هندەك مستەشار نە ل گەل سەرهلدانێ‌ وبون و هەر وێ‌ ئێڤارێ‌ بابەتێ‌ سەرهلدانێ‌ ئاشكرابوو و ئەمنێ‌ (براهیمێ‌ عەلی) گازی كر و چەكدار ل گەل پێشمەرگێن بەر هەوا ئەنفالا كەفتین و ل بەحركێ‌ ئاكنجیبووین كۆمبوونەك ل مالا (براهیمێ‌ عەلی) كر و بەرنامە هاتەدانان و بۆ هەر دەڤەرەكێ‌ مەفرەزەك هاتە هنارتن و (فرقا بەرۆشكێ‌) بابێ‌ من (ملا قاسم) هاتە راسپاردن كو وی جهی ئازاد بكەت و هەمی دەڤەر هاتە بەلاڤەكرن و پێشتر بابێ‌ من كومبوونەك ل چیایێ‌ ئێمینكێ‌ ل گەل (خالد بانی) هاتەكرن و شەڤا 13-14/3/1991 سەرهلدانا باژێرێ‌ دهۆكێ‌ دەست پێكری و ئەو بوو پشتی سەرهلدانێ‌ بابێ‌ من بوو ئامر هێز ل لژنا شێخان و بەردەوام بوو و هەتا نەخوش كەفتی و ل سالا 2001 چوویە بەردلوڤانی یا خودێ‌.
(ئەحمەد مەلا قاسم ئێمینكی) دیدارەكێ‌ دا ل گەل رۆژناما ئەڤرۆ دیاركر كو ل سالا 1968 بۆ جارا ئێكێ‌ خواندنا كوردی ل باژێرێ‌ دهۆكێ‌ هاتە خواندن ل قوتابخانا (دهۆك الاولی) یا نوكە دهێتە نیاسین ب قوتابخانا(صەلاح الدین) وی دەمی ئەو برایێ‌ خوە عەبدولرحمان دەست ب خواندنێ‌ كرن و گۆت: وی دەمی ئاڤاهیێ‌ قوتابخانێ‌ دناڤا باژێری دا بوو كو پشتی سەرهلدانێ‌ بۆ پەیمانگەها هونەرێن جوان هاتوو دەست نیشانكرن، و ئەم چەند قوتابی پێكڤە بووین وێرێ‌ وەك (فەهیم عەبدوللا حەمو، براهیم مستەفا) وی دەمی دهۆك یا بچیك بوو مالا مە ل محلا قەرەچا بوو و و (فەهیم) ئەو ل تاخێ‌ گرێ‌ باصێ‌ بوون وی دەمی زێدەتر خانی ئاخ بوون، پشتی مە خواندنا سەرەتایی ب دووماهی ئینای ئەم هاتینە ناڤنجی(نەوروز) و دووڤ ئەم بوو قوتابخانا (شۆرەش) هاتینە ڤەگوهاستن، ل سالا 1976 ناڤنجی یا برایەتی هاتە ئاڤاكرن و ئەم ژ قوتابخانا شۆرەش بۆ قوتابخانا (برایەتی) هاتینە ڤەگوهاستن وی دەمی ئەم پولا ئێكێ‌ ناڤنجیێ‌ بووین و ئەم كومەكا هەڤال ل گەل ئێك بووین، (فەهیم عەبدوللا، عزەت فندی، پائیز عومەر، ئیبراهیم مستەفا) ئەم ئێكەم قوناغ بووین هاتینە وەرگرتن و خواندن ب كوردی بوو و ئاڤاهیێ‌ وێ‌ پشت ئوتێلا (سولاڤ) یا نوكە بوو كو نوكە ئاڤاهیێ‌ قوتابخانا (ئالا)یە، وی دەمی رێڤەبەرێ‌ مە (مەجید ئەحمەد دهۆكی) رێڤەبەر بوو و چەندین مامۆستا مە هەبوون و ئێكەم قوتابخانە بوو ل دەڤەرا بەهدینان ب زمانێ‌ كوردی بهێتە خواندن برایەتی بوو.
(ئەحمەد مەلا قاسم ئێمینكی) زێدەتر گۆت: پشتی نسكۆیا سالا 1975ێ‌ گەلەك خەلكێ‌ مە قەستا ئیرانێ‌ كرو گەلەك مانە دناڤا وەلاتی دا و دڤی ماوەی دا حزبا بەعس وەكی گورگی هار ب بوو و دەست ب راكرنا گوندان كر و ب سەدان گوندێن كوردان ل سەر سنوری راكرن و دگوندێن بەرواری یا راكرن و دەڤەرا سلێڤانەی یا راكر و عرەب برنە سەر گوندێن وا و گوند نەهێلان و بنەمالێن گەلەك پێشمەرگا ڤەگوهاستنە ژ‌یریا ئیراقێ‌ وەكی گوركەكێ‌ بریندار لێ هاتبوون، وی دەمی ئەم ل ژیێ‌ چاردێ‌ هەتا پازدێ نە و ئەم قوناغەكا هشیاری یا نەتەوەیی هشیار بووین و ئێدی چاڤدانەكا مەزن كەفتە سەر برایەتی و ئەگەر ئەم بێژین بۆچی برایەتی هوسا چاڤدێری كەفتە سەر؟ ئێكەم قوتابخانە بوو ب زمانێ‌ كوردی بهێتە خواندن و ئەڤە پێنگاڤەك بوو مێشكەكێ‌ كوردیێ‌ ساخلەم دناڤا تەخا قوتابیان و گەنجان دا بهێـتە ئاڤاكرن، یا دووێ‌ رۆلێ‌ مامۆستایێن برایەتی دڤێت نەهێتە ژبیركرن و رۆلەكێ‌ مەزن هەبوو و هەر چەند نەشیان ب شێوەكێ‌ ئێكسەر بەحسێ‌ كوردایەتیێ‌ بكەن لێ‌ نەئێكسەر و نەراستەوخو بەحشێ‌ شۆرەشێ‌ دهاتەكرن و ئەڤە ژی هاندەر و پالدەرەكێ‌ بهێز بوو هەستا نەتەوەیی دناڤبەرا رقوتابیان دروست بیت و بهێز بكەڤیت، بیرا من دهێت گەلەك جاران مامۆستایێ‌ مە (عەبدولرحمان مزیری) دا بێژیت ژمن ڤەبن و بەتەنیێن من نەدەنە بن كەفشێ‌ من، ئامادەیا (كاوە) بزمانێ‌ عەرەبی بوو لێ‌ رێكخستن وێری ژی دەست پێكر بوو و ئامادەیا دهۆك یا پیشەسازی ب هەمان شێوە رێكخستن مە هەبوون، وی دەمی سترانبێژن بهێز مە هەبوون و مە هەلبەستڤانێن بهێز هەبوون وەكی(تحسین تاها، محەمەد شێخو، كەریم كەبان، فوئاد ئەحمەد) و هەلبەست (موئەیەد تەیب، بدرخان سندی، عەبدولرحمان مزیری) هەر دەمێ‌ پەیڤەك ژ دەڤێ‌ ئەڤان كەسان دەردكەت ئەم گەش بووین و ئەم ل سەر ئەڤان بنەمایێن نەتەوی دهاتینە ئاڤاكرن و پەروەردەكرن.

عەلی حاجی:

د داخویانیەکێ سەرۆکێ یانەیا زاخۆ یا وەرزشی بۆ رۆژنامەیا ئەڤرۆ دیار کر ئەو چاڤەرێ بریارەکا ئێکلاکەر یا دادگەها کاس یانێڤده‌وله‌تی و داخاز کریە بەری ب دووماهی هاتنا خولێ بریارەک بهێتە دا.
ئه‌ڤچه‌نده‌ هات ل سه‌ر ئه‌وێ سكالایا یانه‌یا زاخۆ دژی یانه‌یا شورته‌ كری پشتی تیما وان ب شێوه‌كێ نه‌ یاسایی ل جهێ دو یاریزانێن پیشه‌كار یێن ڕێپێدایی لبن رێزبه‌ندییا ئیراقێ د لیسته‌یا كێشوه‌رێ ئاسیا ب سێ یاریزانان پشكداری به‌رانبه‌ر زاخۆ كربوو، یانه‌یا زاخۆ بۆ ماوه‌یێ دو هه‌یڤه‌ سكالا تۆماركریه‌.
زێدەتر عەمار فەرهاد گۆت: پێنگاڤێن دادگەها کاس یا نێڤدەولەتی هێدی نە كو بلەز کێشە ل وێ دادگەهێ ب رێڤە ناچن و ئەوا پێدڤی ل سەر مە وەکو یانەیا زاخۆ هەمی تشتەک ئەنجامدایە و دووماهی نامەیا مە بۆ دادگەها کاس ئەو بوو کو خول نێزیکە دێ ب دووماهی هێت لەوما پێدڤیە بەری ب دووماهی هاتنا خولا ستێرێن ئیراقێ فوتبۆلێ بریارەکێ دەربکەن و ئەو دووماهی ژڤانێ دادگەها کاس دایە فیدراسیۆنا فوتبۆلا بتنێ هەتا دووماهیا ڤێ حەفتیێ یە و هەکە چو بەرسڤەک نە گەهشتە دادگەهێ د وی دەمی دا دێ بریارەک هێتە دان و مە هەمی کارەک ژی کرینە کو بەری ب دووماهی هاتنا خولێ بریارەک بهێتە دان و ئەو هەمی تێبینیێن مە هەین ژی مە ڕادەستی دادگەهێ کرینە و ئەم پشت راستین دێ باددەکێ ڤێ کێشەیێ بۆ مە بیت و سێ خالان ڤەگەرینن بۆ یانەیا زاخۆ.
ژلایه‌كێ دیڤه‌ ناڤبری گۆت: ئەم به‌رده‌وام بزاڤان دكه‌ین ژ بۆ لادانا کارتا سۆر یا راهێنەرێ خوە تەلال ئه‌لبلوشی و کاپتنێ تیمێ ئەحمەد ئیبراهیمی ژبەرکو هەردو ژ هەژی کارتا سور نەبوون و دادڤانێ یاریێ ئەگەرێ سەرەکی بوو.
ل دووماهیێ گۆت: بۆ وەرزێ بهێت یێ خولا ستێرێن ئیراقێ دێ ب تیمەکا ب هێز و باشتر هەڤرکیێ ل سەر ناسناڤی کەین و دێ هەمی كارا کەین پێخەمەتی هندێ یانەیا زاخۆ ژ تیمێن هەڤرکا خولێ بیت.

قەیس وەیس:

د ادخویانیەكێ‌ دا عەلی تەكلیف سەرۆكێ‌ فیدراسیۆنا بۆكسانێ‌ ل ئیراقێ‌ دیار كر قارەمانییا ل سەر ئاستێ‌ پێشكەفتییان بۆ كوڕان ژ كوردستانێ‌ هاتە ڤەگۆهاستن بۆ بەغدا ئەوا بڕیارە ل ئەینییا بهێت هەڤڕكیێن وێ‌ ل هۆلا جادرییە بهێتە كرن.
زێدەتر ناڤهاتی گۆت: ل دووڤ بەرنامەیێ‌ مە یێ‌ سالانە بڕیار بوو قارەمانییا بۆكسانێ‌ ل سەر ئاستێ‌ پێشكەفتییان ل ئێك ژ پارێزگەهێن هەرێما كوردستانێ‌ هاتبا كرن لێ‌ پشتی نڤێسار بۆ یانەیێن هەرێمێ‌ چووین چو لایەنان بەرهەڤییا خوە دیار نەكرن بۆ مێڤانداریێ‌ و پشكداری د قارەمانیێ‌ دا ب بوهانا وێ‌ یەكێ‌ نەبوونا بودجەیەكا تایبەت ب یانەیێ‌ ڤە و ئەو شیان نینن پشكداریێ‌ بكەن لەوما نە چاربووین قارەمانی ژ كوردستانێ‌ بۆ بەغدا بهێتە ڤەگۆهاستن.
هەروەسان ناڤهاتی گۆت: مە حەز دكر ل ئێك ژ باژێرێن كوردستانێ‌ هاتبا كرن ژبەركو خودان هۆلێن تایبەت و باش هەنە و هەروەسان وەكو پیشتەڤانی بۆ ڤێ‌ یاریێ‌ ل هەرێمێ‌، لێ‌ بەرۆڤاژی پێشبینیێن مە هاتن، هەرچەوابیت قارەمانی دێ‌ ل بەغدا ب پشكدارییا دناڤبەرا 40 هەتا 50 یانەیان بیت و بڕیارە ئەینییا بهێت هەڤڕكیێن وێ‌ ل سەر هەمی كێشان بهێتە كرن و دیار كرهیچ رەنگەكی ئەوان خوە ژ ڤاڤارتنێن ئۆلمپیادا پاریس2024ێ‌ نە ڤەكێشاینە لێ‌ هنگاڤتنا یاریزانێ‌ مە یێ‌ ئئێكانە عەلی قاسم حەمدان یێ‌ 63كگم بوو ئەگەر پشكداریێ‌ ژ دەست بدەین، لەوما ئەوا هاتییە بەلاڤكرن چ راستی بوو نینە و رۆژنامەڤان دشێن دۆڤچوونێ‌ بكەن.