ديدار، سالار محةمةد دؤسكى:

1-2

پێشمەرگەكێ‌ هەر دو شۆرەشێن ئیلۆن و گولانێ‌ د یاركر كو نەخوشترین رۆژێن ژیانا وی ل ئاوارەیێ‌ بووینە و تایبەت دەمێ‌ ئوردیگایێ‌ زێوە ژلایێ‌ حوكمەتا ئیراقێ‌ ڤە هاتیە توبارانكرن و هەڤژین و كچ و دو كورێن وی بووینە قوربانی و شەهید بووین.
پێشمەرگەیێ‌ هەر دو شۆورەشێن ئیلۆن و گولانێ‌ فەرماندە مەهدی مەم سینی نێروەیی د دیدارەكێ‌ دا ل گەل رۆژناما ئەڤرۆ دیاركر، كو هەست و ڤیانا وی بۆ مللەتێ‌ كورد بۆ دەسپێكا سالێن شێستان ڤەدگەریت و تایبەت دەمێ‌ شەرەك دناڤبەرا پێشمەرگەی و دوژمنێن مللەتێ‌ كورد دا، ل گوندێ‌ وی دا روودای وی دەمی خەلكی دگۆتن ئەڤە لەشكەرێ‌ مەلا (مستەفا بارزانی) هات و هەر ژ وێ‌ رۆژێ‌ هەتا نوكە هزر و ڤیانا كوردینیێ‌ دناڤا مێشكێ‌ من دا سەرهلدا و دروست بوو، وی دەمی بابێ‌ من ئێك ژ كەسانێن بەرنیاس بوو دناڤا مرۆڤێن خوە دا و (مەلا مستەفا بارزانی و شێخ ئەحمەد) و پتر ژ (100) پێشمەرگەیان ل گەل دا بووینە و بابێ‌ من ل گەل جەنابێ‌ خودێ‌ ژێ‌ رازی هەر (14) سالێن شورەشا ئیلونێ‌ ل گەل بوویە و چەكێ‌ شەرەف و كەرامەتێ‌ بۆ مللەتێ‌ كورد و ئازادای یا وەلاتی هەلگرتیە وەك هەر پێشمەرگەكی و ئەڤە ل گەل هەمی مرۆڤێن خوە، ژ زاردەڤێ‌ بابێ‌ خوە من وەرگرتیە كو دەمێ‌ خودێ‌ ژێ‌ رازی (مەلا مستەفا بارزانی) هاتیە دەڤەرێ‌ و دەربازی دەڤەرا بەرواری یا بوو هەمی كورد كومكرن كو ژ هەمی هوزێن مللەتێ‌ كورد پێك دهاتن وی دەمی بابێ‌ من مرۆڤەكێ‌ زەلام باش بوو و یێ‌ پێشكێش بوو و جەنابێ‌ (مەلا مستەفا بارزانی) گۆتە بابێ‌ من تو ل گەل كێ‌ دایی؟ و بابێ‌ من گۆتێ‌ ل گەل (محەمەد تاهر)م و خودێ‌ ژێ‌ رازی (مەلا مستەفا بارزانی) پەیڤەكا گرنگ و دیرۆكی پێشكێشی وی خەلكی كر و كەرم كر و گۆت: ئەم نەهاتی نە مالێ‌ خەلكی بخوین و ئەم نەهاتینە تەرش و كەوالێ‌ خەلكی بخوین و مالێن كەسەكێ‌ تالان بكەین، كێشامە كێشا مللەتەكێ‌ زولم لێكریە و هەمی بزاڤ و خەباتا مە دێ‌ بۆ رزگاركرنا مللەتێ‌ مەبیت ژ بن دەستیێ‌ و سەخمراتی ئازادیێ‌ ئەم خەباتێ‌ دكەین، و هەر دوێ‌ روینشتنێ‌ دا جەنابێ‌ (مەلا مستەفا بارزانی) بەرپرس بۆ هەر دەڤەرەكێ‌ دیاركرن، و چەندین شیرەت و ئاموژگاری و پەیامێن راست و دروست و ئاڤاكەر ل سەر خەبات و بەرخودانێ‌ دانە پێشمەرگەی و هیڤیێن سەركەفتنێ‌ بۆ گشت پێشمەرگەی خواستن و ئەڤە ل سالا 1961ێ‌ بوویە.
هەمان پێشمەرگەی دیاركر، كو مێژوویا بنەمالا وان ل گەل دوزا مللەتێ‌ كورد دیرۆكەكا پری سەروەری هەیە و مامێ‌ وی بناڤێ‌(خالدێ‌ شەرەف) ل گەل هەر ئێك(شێخ عەبدوسەلامێ‌ بارزانی، تەتەر بەگێ‌ نێروەیی، محەمەد ئاغایێ‌ نێروەیی) ل سالا 1914 زیندانێ‌ دا بوویە ل مویسل و ب ئەشكەنجەدانێ‌ گیانێ‌ خوە ژ دەست داینە.
هەمان پێشمەرگەیێ‌ شۆرەشێن ئیلۆن و گولانێ‌ ئەو ژی دیاركر، كو ل شۆرەشا ئیلۆنێ‌ وی دەمی گەلەكێ‌ بچووك بوو لێ‌ گەلەك بیرهاتن ل گەل پێشمەرگەی و دەڤەرێ‌ بۆ دروست بووینە و بیرا وی دهێت وەك خەونەكێ‌ ل پێش چاڤا و هەتا بۆ دەسپێكا بەیانا 11ی ئادارێ‌ ل سالا 1970 كو حوكمەتا ئیراقێ‌ دانپیدان ب دوزا مللەتێ‌ كورد كری و ل گەل سەركردایەتی یا شۆرەشا ئیلۆنێ‌ كەفتیە دانوستاندنا پێخەمەت راوستاندنا شەری دناڤبەرا سەركردایەتی یا كوردی و حوكمەتا ئیراقێ‌ دا و بیرا من دهێت دەمێ‌ چەند مادێن دەستوری ل سەر وێ‌ بەیانێ‌ بۆ مافێن كوردان هاتینە قەبوولكرن، وی دەمی ژیێ‌ من رنێزیكی چاردە سالان بوو و ل گەل بابێ‌ خوە من گۆت دێ‌ چمە بارزان و ئەڤە ل سالا 1970ێ‌ بوو، و جارا ئێكێ‌ بوو ئەز تڤەنگێ‌ ب هەلگرم و بچینە دەف جەنابێ‌ (مەلا مستەفا بارزانی) و بیرا من دهێت (مەلا مستەفا بارزانی) بابێ‌ من نیاسی و ب ناڤ ل گەل ئاخفت و چەند سوحبەت كرن، و (مەلا مستەفا بارزانی) چەند دەرچكان هاتە خوارێ‌ و پرسیارا ساخلەمی و ژیان و حالێ‌ وی كر و ئەڤە ژی ڤەدگەریت كو وی دەمی كێشەكا جڤاكی دناڤا گوندێ‌ مە دا هەبوو، و مالێن مە هاتبوونە گوندێ‌ (بالندا) و بابێ‌ من ژ خواست ئاگەه ژ كێشە و گلە و گازندێن خەلكێ‌ گوندێ‌ وی هەبیت و پشتەڤان و چاڤدێر بیت، ل سەر خەلكێ‌ گوندی بگشتی و پشتی بەیانا 11ی ئادارێ‌ خەلكێ‌ كوردستانێ‌ و ل گەل خەلكێ‌ ئیراقێ‌ چارسالێن گەلەك خوش و تەنا و ئارام دەربازكرن، ل سالا 1972ێ‌ ب دروستی بوومە پێشمەرگە ل گەل هێزا بارزان ل گەل (شێخ عەبدوللایێ‌ بارزانیێ‌) و بارەگایێ‌ هێزێ ل (بلێ‌) بوو و هێزا پێشمەرگەی دچوو چیایێ‌(پیرس) ل سالا 1974ێ‌ دووبارە حوكمەتا ئیراقێ‌ هێرشی كوردستانێ‌ كر و گەلەك هێز چوو (بابەكایەتی) و خودێ‌ ژێ‌ رازی (محەمەد تاهر) گازی بابێ‌ من كر، و گۆتێ‌ یێ‌ پێشمەرگە و نە پێشمەرگە ل گەل خوە بینە و (150) كەس ژ هوزێن (نێروەیی، نهێلی، رێكانی، بەرواری) ل گەل بابێ‌ من چوونە دەڤەرا (بالەكایەتی)وی دەمی بابێ‌ من ب بوو جێگرێ‌ ئامر هێزی و برایێ‌ من ژی ل گەل چوون، وی دەمی بابێ‌ من بەرپرسایەتی یا وێ‌ هژمارێ‌ كر و دناڤا مللەتێ‌ خوە دا كەسەكێ‌ پێشكێش بوو و سەركردایەتی یا كوردی ژی رێزەكا تایبەت لێ‌ دگرت، گاڤ بۆ گاڤێ‌ زێدەتر كاودانێن مللەتێ‌ مە تێكچوون و هەتا نسكۆیا سالا 1975ێ‌ و زێدەتر كاودان تێكچووین و هەیڤا ئادارێ‌ ئێدی رێكەفتنا خیانەتكاری یا جەزائیر دروست بوو و شۆرەش راوستیا، و ئیرانێ‌ خواست هەمی پێشمەرگە بچیتە ئیرانێ‌ و دێ‌ مافێ‌ سیاسی دەتێ‌، و هەر كەسەكێ‌ ژ خوە نەترسیت بلا دناڤا ئیراقێ‌ دا بمینت وی دەمی ئەم چووینە ئیرانێ‌.
مەهدی مەم سینی گۆت: وی دەمی مالا مە دناڤا گوندی دا بوو و 25 خزیرانێ‌ ئەم چووین و ب رێكەفتین بۆ ئیرانێ‌ و بابێ‌ من چەكێ‌ خوە ڤەشارت بوو و حوكمەت وی دەمی هاتبوو دەڤەرێ‌ و نێزیكی مەغرەب بوو و بابێ‌ من وا چەكێ‌ خوە ئینادەر و دەربازبووین و هاتینە گوندێ‌ (جارمەندا) و ئەو گوند ژ دو تاخان پێك دهێت و تاخەك نێروەیی نە و تاخەك رێكانی و تاخەك بەر حوكمەتا ئیراقێ‌ كەفتیە و تاخەك بەر حوكمەتا توركیا كەفتیە وی گوندی مرۆڤێن شلرەزا بۆ رێكێ‌ هاتنە گەل مە و چەندین گوندێن دی ئەم دەربازبووین و هەتا ئەم دەربازبووینە (مەیدان بەلەكێ‌) و دووڤ دا چووینە گوندێ‌ (خرواتە) دناڤا ئاخا توركی یا دا و بابێ‌ من دو كەس هنارتنە مالا (كەرەم ئاغا) خرواتەی و گۆتێ‌ ئەم نێزیكی (50) خێزاناینە و داخاز ژێ‌ كر ترۆمبێل بۆ ئەڤان خێزانا بهێنە تەرخانكرن دا ب سلامەتی دناڤا باژێران دا دەربازبن چونكو وی دەمی دزانین حوكمەت دناڤا باژێران دا هەیە و نێزیكی مەغرەب بوو و ترۆمبێل بوومە هاتنە بەرهەفكرن و ئەم چووینە تێدا و دناڤا باژێرێ‌ گەڤەرێ‌ دا ئەم دەرباز بووین و ئەم چووینە سەر سنورێ‌ ئیرانێ‌ و ئەڤە رۆژا (10) بوو و خوارن و ڤەخوارنا وی خەلكی ل سەر ئەوان گوندان بوو ئەوێن ئەم تێدا دبورین و ب دەست مە دكەفت و خەلكێ‌ ئەوان گوندان تەخسیری نەكر هەمبەر هاریكاریا خەلكێ‌ مە ژ خوارن و ڤەخوارنێ‌ و ئەم چووینە (قەرەقولا) ئیرانێ‌ و مە ناڤێن خوە نڤێسین و و مە خوە رادەستی حوكمەتا ئیرانێ‌ كرو ناڤێن مە ل گەل پێزانینن ل سەر ئەوان كەسان بگشتی هەمی هاتنە نڤێسین و ژ مە خواست بچینە كیش ئوردیگایی (زێوە یان رەبەتی).