قەیس وەیس:

دهێتە چاڤەڕێ‌ كرن ئەڤرۆ قارەمانا وەرزێ‌ 2023-2024 یا خولا فوتبۆلا كوردستانێ‌ بۆ یانەیێن پلا نایاب دناڤبەرا سێ‌ یانەیا بهێتە دیار كرن دیسان دو یانەیێن دی یێن دووماهیێ‌ دێ‌ ب فەرمی خاترا خوە ژ خولێ‌ خوازن ئەوا بڕیارە هەشت یاری د ئێك دەم دا كو ل دەمژمێر سێ‌ ئێڤاری ل یاریگەهێن جودا یێن هەرێمێ‌ بهێنە ئەنجامدان.
ئاكرێ‌ بەرانبەر تۆماركرنا دیرۆكێ‌ یە
تیما یانەیا ئاكرێ‌ نوونەرا پارێزگەهێ‌ بەرانبەر تۆماركرنا دیرۆكەكا نوویە ژبۆ ب دەستڤە ئینانا ناسناڤێ‌ خولا كوردستانێ‌ دەمێ‌ دبیتە مێڤانا یانەیا چوارقۆرنە د یارییەكا دیرۆكی دا، كوڕێ‌ پایتەختێ‌ نەورۆزێ‌ ئەوا نوكە سەرێ‌ لیستێ‌ دهێت و نێزیكی خەونا خوە بوویە ب كۆمكرنا 49 خالان ژ 13 سەركەفتن،10 وەكهەڤییان، تیما چوارقۆرنە خودانا 37 خالانە ل رێزا 10ێ‌ دهێت چو مەترسی ل سەر داكەفتنا وێ‌ نینە و دیسان هیڤیێن رێزێن ئێكێ‌ هەتا پێنجێ‌ ژی نینن، لێ‌ ئەڤە ڕامانا وێ‌ نادەت كو تیمەكا ب سانەهی نابیت، دبەرانبەر دا ئاكرێ‌ ئەوا ڕەدكر هیچ داخویانیەكێ‌ بۆ چو دەزگەهێن راگەهاندنێ‌ نەدەن و هزرا وان بتنێ‌ ل سەر یاریێ‌ بیت هوسا دیارە ئەو دێ‌ شەڕێ‌ مان و نەمانێ‌ كەن و ژبلی سەركەفتنێ‌ چو ئەنجامێن دی نەڤێت پێخەمەت بگەهنە ئارمانجا خوە.
دهۆك د یارییا مان و نەمانێ‌ دایە
ژلایێ‌ خوەڤە تیما یانەیا دهۆك ئەوا د مەترسیا داكەفتنێ‌ دا دێ‌ هەمی بزاڤان كەت ئەڤرۆ بەرانبەر خودانێن ئەردی یانەیا هندرین خوە ژ ڤێ‌ مەترسیێ‌ دووربێخیت، تیما دهۆكێ‌ 33 خال كۆمكرینە ل رێزا 15 و بەری دووماهیێ‌ دهێت ژ هەشت سەركەفتن و نەهـ وەكهەڤیان، د بەرانبەر دا تیما هندرین ژی چو مەترسی ل سەر داكەفتنا وێ‌ دان ینن ئەوا ب37 خالان رێزا نەهێ‌ دهێت و هەر ئەنجامەك هەبیت چو كارتیكرنێ‌ لێ‌ ناكەت، لێ‌ تیما دهۆكێ‌ ژبلی سەركەفتنێ‌ چو ئەنجامێن دی نەڤێت پێخەمەت پاراستنا مانا خوە د خولێ‌ دا.
چو گڤاشتن ل سەر تیما زاخۆ نینن
ژلایەكێ‌ دیڤە تیما یانەیا زاخۆ چو گڤاشتن ل سەر نینن ئەوا دێ‌ ل یاریگەها خوە مێڤاندارییا یانەیا دەربەندیخان كەت، كوڕێن خابوری خودانا 39 خالانە ل رێزا شەشێ‌ دهێت ژ هەشت سەركەفتن و پێنج وەكهەڤییان، مێڤانا وێ‌ رێزا حەفتێ‌ دهێت ب 37 خالان، ئەنجامێ‌ ڤێ‌ یاریێ‌ بتنێ‌ دێ‌ رێزبەندیێ‌ گوهۆڕیت لێ‌ مانا هەردو تیمان مسۆگەر بوویە.
ژ یاریێن دی یێن مایی، سەیدسادق- رانیە، شێروانە- پێشمەرگەیا هەولێر، ئارارات- هەولێر، شەقلاوە- سۆران، سیروانی نوو- برایەتی، هەلوەستێ‌ گشتی بڤی رەنگی یە.
1- ئاكرێ‌ 49 خال.
2- پێشمەرگەیا هەولێر 48 خال.
3- شێروانە 47 خال.
4- ڕانیە 41 خال.
5- سیروانی نوو 41 خال.
6- زاخۆ 39 خال.
7- دەربەندیخان 37 خال.
8- هەولێر 37 خال.
9- هندرین 37 خال.
10- چوارقۆرنە 37 خال.
11- سەید سادق 36 خال.
12- برایەتی 33 خال.
13- ئارارات 33 خال.
14- شەقلاوە 33 خال.
15- دهۆك 33 خال.
16- سۆران 30 خال.

چاڤەڕێ‌ دهێتە كرن ئەڤرۆ ژی چار یاریێن مایی ژ هەڤڕكیێن گەڕا 22ێ‌ یا خولا پلا ستێرێن ئیراقێ‌ یا تەپا پێی بهێنە ئەنجامدان، یانەیا دهۆك دناڤ ئەردێ‌ خوە دا لێ‌ بێ‌ ئامادەبوونا جەماوەرێ‌ خوە دێ‌ یانەیا كەرخ یا بەغدایی مێڤان كەت، هەرچەندە بێ‌ ئامادەبوونا جەماوەری یە لێ‌ پێشبینی دهێتە كرن ل پاركا نەورۆز ب هزاران جەماوەر بەرهەڤبیت بۆ دیتنا یاریێ‌ و پشتەڤانییا تیما خوە.
بڕیارە ئەڤرۆ ل دەمژمێر 5:30 مەغرەب تیما تەپا پێی یا یانەیا دهۆك ل یاریگەها نێڤدەولەتی دهۆك و بێ‌ ئامادەبوونا جەماوەرێ‌ خوە مێڤاندارییا یانەیا كەرخ یا بەغدایی بكەت، نە بەرهەڤبوونا جەماوەری ژبەر بڕیارێن سزایێ‌ یێن فیدراسیۆنا فوتبۆلا ئیراقێ‌ ئەوا دهۆك ب سزادنا دو یارییا بێ‌ جەماوەر دناڤ ئەردێ‌ خوە دا و 30 ملیۆن دیناران سزایێن دارایی دایی دەرئەنجامێ‌ ئەوان ڕەفتارێن نە بەرپرسیارانە یێن پێنج ژ كەسێن ب ناڤێ‌ جەماوەرێ‌ دهۆكێ‌ هاتینە دناڤ یاریگەهێ‌ دا ددەمێ‌ یاریا دهۆكێ‌ بەرانبەر یانەیا جەوییە و ئیرشی گۆلپارێزێ‌ وان كری ژ گەڕا 20ێ‌ یا خولا ستێرێن ئیراقێ‌، لێ‌ دبەرانبەر دا و د چالنچەكا جەماوەر دا كو ژلایێ‌ ئەیاز دوسكی ژ دەستەیا پشتەڤانێن دهۆكێ‌ دەستپێكری جەماوەرێ یانەیا دهۆك زێدەتری 85% پلێتێن یارییا دهۆك دگەل كەرخ كرینە و بێ‌ ئامادەیی یاریێ‌ بن ئەڤ نڤێسینە بەری یاری ب 24 دەمژمێران هاتیە بەرهەڤكرن و دبیت رێژە زێدەتر لێبهێت.
تیما ئەلهۆیێن چیا خودانا 33 خالانە ژ نەهـ سەركەفتن و شەش وەكهەڤیان، 18 گۆل هەنە و 16 گۆل ل سەر هاتینە تۆماركرن، د بەرانبەر دا یانەیا كەرخ 22 خال كۆمكرینە و رێزا 16ێ‌ دهێت، ئارمارێن هەردو یانەیان د بەرژوەندییا تیما دهۆكێ‌ دا نە ئەوا نەهـ سەركەفتن ئینایین بەرانبەر چار سەركەفتنان بۆ تیما كەرخێ‌ و دو جاران وەكهەڤ بووینە، لێ‌ دووماهی یارییا واندا ئەوا ل قۆناغا ئێكێ‌ یا وەرزێ‌ ئەڤ سالە كەرخێ‌ شیابوو سەركەفتنێ‌ بینت، لەوما دهۆك دێ‌ هەمی بزاڤان كەت بۆ قەرەبوویا سێ‌ خالێن قۆناغا ئێكێ‌ و مزگینەكا خوەش بدەتە جەماوەرێ‌ خوە یێ‌ نە بەرهەڤبوویی.
ژ یاریێن دی یێن ئەڤرۆ، جەوییە دێ‌ یانەیا نەفت میسان مێڤان كەت، ئەنفت ئەلوەسەت دێ‌ بیتە مێڤانا نەفت، حدود ل یاریگەها مینامێڤانا نەفت ئەلبەسرایە، ئەلقاسم و نەجەف دێ‌ ل یاریگەها كوت هەمبەری ئێك راوەستێن.

د داخویانیه‌كێ دا سه‌رۆكێ فیدراسیۆنا باسكێت بۆلا ئیراقێ دیار كر هه‌ردو هه‌لبژارتیێن ئیراقێ ل سه‌ر ئاستێ لاوان و ل سه‌ر ئاستێ تازه‌پێگه‌هشتییان كه‌مپا خوه‌ یا راهێنانێ ل ئێك ژ وه‌لاتێن كه‌نداڤییا عه‌ره‌بی دانایه‌ خوه‌ به‌رهه‌ڤكرن بۆ ڤاڤارتێن كۆپا ئاسیا.
زێده‌تر حسێن ئه‌لعمێدی گۆت: ل دیڤ پلانێن دارشتی هه‌ردو هه‌لبژارتیێن نشتیمانی یێن ئیراقێ ل سه‌ر ئاستێ تازه‌پێگه‌هشتییان و لاوان گه‌شتا خوه‌ بۆ وه‌لاتێ كوێتێ برییه‌ و كه‌مپه‌كێ راهێنانێ دانایه‌ خوه‌ به‌رهه‌ڤكرن بۆ ڤاڤارتنێن كۆپا ئاسیا و قاره‌مانیێن داهاتی یێن رۆژئاڤا ئاسیا و عه‌ره‌بی و بڕیاره‌ چار یاریێن هه‌ڤالینی ئه‌نجامبده‌ت پێخه‌مه‌ت كادرێ راهێنانێ زێده‌تر ل سه‌ر ئاست و شیانێن یاریزانان ب راوه‌ستیێن ژبۆ دیاركرنا پێكهاتیه‌كێ درۆست و پشت گه‌رمی بهێته‌ كرن.
هه‌روه‌سان ناڤهاتی دیاركر ئه‌و یاریزانێن ل سه‌ر هه‌ردو ئاستان هاتینه‌ ژێگرتن ژ ئه‌وان یانه‌یێن د خولا پلا نایاب دا پشكداری كرین و ئاسته‌كێ مه‌زن نیشان دایی و ئه‌ڤچه‌نده‌ ژی وه‌كو پووته‌دان ب وان یاریزانان و دانانا شه‌نگسته‌كێ ئه‌كادیمی بۆ پاشه‌رۆژا وه‌رزشا باسكێت بۆلا ئیراقێ.
ل دیڤ لیسته‌یا هه‌ردو پێكهاتییان هاتیه‌ به‌لاڤكرن چار یاریزانێن یانه‌یا زاخۆ دگه‌ل دانه‌ ئه‌وژی ل سه‌ر ئاستێ لاوان زنار هشیار دۆبانكی، سالح فارس و سیداد خدر، ل سه‌ر ئاستێ تازه‌پێگه‌هشتییان ژێهات جه‌مال دگه‌ل دانه‌.