ل ژێر درووشمێ (ڤەژاندنا هێزا گەنجان) و ب بەرهەڤبوونا مەلا مستەفا بارزانی و د. عەبدولفەتاح عەبدلرەزاق، بریكارێ وەزارەتا خواندنا بلند و ڤەكۆلینێن زانستی و د. عەلی تەتەر، پارێزگارێ دهۆكێ و سەرۆكێ زانكۆیا دهۆك و هەژمارەكا رێڤەبەرێن دام و دەزگەهێن حكومی و حزبی و لەشكری و كەسایەتی و گەنجێن دەڤەرێ و 21 بەهرەمەندێن كوردستانێ، دیدار و پێشانگەها قۆبەهان یا دویێ ل پەیمانگەها تەكنیكی یا ئامێدیێ، ژ لایێ زانكۆیا پولیتەكنیكی یا دهۆكێ‌ ڤە هاتە ئەنجامدان.
ل دەستپێكێ پێشانگەهەكا كارێن دەستی بۆ 21 گەنج و كەسێن بەهرەمەند ل سەرانسەری كوردستانێ هاتبوو رێكخستن و ژ لایێ مەلا مستەفا بارزانی ڤە هاتە ڤەكرن.
پ. د. ئاری عادل، سەرۆكا زانكۆیا پۆلیتەكنیكی یا دهۆكێ‌ د پەیڤەكێ دا گرنگی یا هەبوونا پەیمانگەها تەكنیكی ئامێدیێ دا زانین و گۆت: «پەیمانگەها تەكنیكی یا ئامێدیێ وەك وێستگەهەكا ئەكادیمی ل دەڤەرێ بۆ بەرهەڤكرنا كادرەكێ بسپۆر و شارەزا و ئەكادیمی د پێگەهاندنا خەلكێ دەڤەرێ دا كار كریە و یا بەردەوامە ژ بۆ پێشڤەبرنا ئاستێ زانستی و ئەكادیمی ل دەڤەرێ‌، دێ بزاڤێ كەین خۆلێن فێركرنێ یێن جودا ژ بۆ بهێزكرنا شیانێن گەنجێن ڤێ دەڤەرێ ڤەكەین و پەیمانگەها تەكنیكی ئامێدیێ بكەینە دەزگەهەكێ بەرهەمئینانا كادرەكێ سەردەمیانە و پێشكەفتی، دیسا دڤێت ژبیر نەكەین ئەڤ گەنجێن خودان شیان و داهێنەر، شەنگستێ وەلاتینە، لەو دڤێت وەكو شۆڕەشگێرێن ئەكادیمی ئەوان بۆ گەل و وەلاتی بەرهەڤ بكەین».
پ. د. عەبدولفەتاح عەبدولرەزاق، برێكارێ وەزارەتا خواندنا بلند و ڤەكولینێن زانستی پەسنا سەرۆكاتیا زانكۆیا پۆلیتەكنیكی یا دهۆكێ‌ كر و گۆت: «گەنج ب بڕبڕەیا پشتا ئاڤاكرنا وەلات و پێشخستن و پرۆسەیا گەشەپێدانا هەموو كەرتێن جڤاكی دهێنە نیاسین، دڤێت گەنجێن مە ل سەر وێ هێزا زیندی و ئەرێنی‌ بمینن و بشێن رۆلێ‌ خوە د پێشخستنا جڤاكێ مە دا ببینن».
د. عەلی تەتەر، پارێزگارێ دهۆكێ رۆلێ گەنجێن دەڤەرا ئامێدیێ د شۆڕەشێن كوردی دا بلند هەلسەنگاند و گۆت: «گەنجێن دەڤەرێ بووینە، شیاینە ملێن خوە بدەنە بەر شۆڕەشێ و مە بگەهیننە ڤی ئاستی و دێ هەر مینن دینەمۆیا پێشخستنا مللەتێ مە».
د دووڤ دا دیدارا قۆبەهان یا دویێ ب پانێلەكی دەستپێكر، ل دۆر گەنجان و ڤەژاندنا هێزا وان ب مێهڤانداریا هەر ئێك ژ د. محەمەد ئیحسان، پروفیسۆر ل زانكۆیا لەندەن و وەزیر د پێنج كابینەیێن بەرێ یێن حوكمەتا هەرێما كوردستانێ دا، دكتۆرە ڤالا فەرید، وەزیرا هەرێمێ بۆ كاروبارێن پەرلەمانی، هەرمان میرزا بەگ، بریكارێ میرێ ئێزدیان و راوێژكارێ سەرۆكێ حوكمەتێ بۆ كاروبارێن ئێزدیان، مەیسەر نهێلی سكرتێرێ ئێكەتیا لاوێن دیموكراتا كوردستانێ.
پشكداران رۆلێ زانكۆیان د پێشخستن و گەشەپێدانا شیانێن گەنجان و چاوانیا سەرەدەریكرنا گەنجان ل گەل تەكنولۆژیا سەردەم و چ بهێتە كرن بۆ نەهێلانا ئاستەنگ و رێگریێن ل هەمبەری گەنجان بەحسكرن، هەروەسا پەیوەندی و پشكداریا گەنجان د ب رێڤەبرنا حوكمەتێ و پەرلەمانی دا هاتنە گەنگەشەكرن و بەرسڤا پرسێن بەرهەڤبوویان ژی هاتەدان.
ل دووماهیێ مەلا مستەفا بارزانی خەلاتێ قۆبەهان پێشكێشی 21 گەنج و كەسێن بەهرەمەند و كەسانێن هاریكار و پشتەڤانێن دیدارا قوبەهان كر.

ب بەرهەڤبوونا د. عەلی تەتەر، پارێزگارێ دهۆكێ و هەژمارەكا بەرپرسێن حزبی و ئیداری و نڤیسەر و رەوشەنبیر و هەلبەستڤان و رۆژنامەڤانان، ناڤەندا خانی یا رەوشەنبیری و راگەهاندنێ ل رۆژا 6/12/2023 ل ئۆتێلا ریكسوس ل باژێرێ دهۆكێ مەراسیمەكا رێزلێنانێ بۆ نڤیسكار و هەلبەستڤان و مامۆستایێ ئەكادیمی (پروفیسۆر دكتۆر بەدرخان سندی ) سازكر.
د بەرنامێ رێزلێنانێ دا پەیڤێن ناڤەندا خانی و پشكا رەوشەنبیری و راگەهاندنا مەكتەبا سیاسی یا پارتی دیموكراتی كوردستان هاتنە خواندن و رۆلێ د. بەدرخان سندی بلند هەلسەنگاند.
پاشی چالاكیێن جودا جودا وەكو ستران و فلمەكێ دیكیۆمێنتی ل دۆر ژیانا سندی هاتنە پێشكێشكرن، هەروەسا د پەنەلەكێ تایبەت دا هەر ئێك ژ (مۆئەیەد تەیب و موسەدق توڤی و بەیار باڤی) سمینار ل دۆر رۆلێ د. بەدرخان سندی د وارێ رەوشەنبیری و هەلبەست و زانست و رۆژنامەڤانیا كوردی دا پێشكێشكرن.
ل دووڤ دا سترانەك ژ پەیڤێن د. بەدرخان سندی هاتە گۆتن، هونەرمەند ئەمیر سەدیق خواندنەك ل دۆر هوزانا سترانێ پێشكێشكر، پاشی خەلاتێن چەند ناڤەند و كەس و دەزگەهان ل سەر پ. د. بەدرخان سندی هاتنە بەلاڤكرن.
د. بەدرخان سندی د پەیڤەكێ دا سوپاسیا ناڤەندا خانی و هەموو لایەنان كر، كو ئەڤ رێزگرتنە ل وی گرتی و گۆت: «ئەز ڤێ رێزگرتنێ پێشكێشی هەموو رەوشەنبیر و ئەدیب و هەلبەستڤانێن كورد دكەم و هیڤیدارم گەلێ كورد ب هیڤی و ئومێدێن خوە شاد ببیت و دەولەتا كوردستانێ بهێتە ئاڤاكرن، ل دووماهیێ ژی پ. د. بەدرخان سندی هندەك هۆزانێن خوە بۆ بەرهەڤبوویان خواندن.
هەژی گوتنێ یە پ. د. بەدرخان سندی ل سالا ١٩٤٣ ل زاخۆ ژ دایك بوویە و ل سالا ١٩٦٦ پشكا زانستێن دەروونی ل زانكۆیا بەغدا ب دووماهی ئینایە و هەتا نوكە پتر ژ ١٨ بەرهەمێن جوراوجور ژ هەلبەست و بابەتێن رەوشەنبیری و ئەكادیمی چاپكرینە.

ب سەرپەرشتیا د. عەلی تەتەر، پارێزگارێ دهۆكێ و ب بەرهەڤبوونا لایەنێن پەیوەندیدار كۆمبوونا لژنا گەشەپێدان و پشتگیریكرنا پڕۆژەیێن پیشەسازی ل پارێزگەها دهۆكێ‌ هاتە كرن و تێدا ئەرد بۆ 20 كارگەهێن نوو هاتە تەرخانكرن.
پارێزگارێ دهۆكێ د كۆمبوونێ دا دۆپاتی ل بەرنامێ حوكمەتا هەرێما كوردستانێ بۆ زێدەكرنا بەرهەمێ ناڤخوەیی ب كوالێتیەكا باش كر و پاشی دانوستاندن ل دۆر پڕۆژەیێن نوو هاتە كرن.
پشتی هەلسەنگاندن و وەرگرتنا بۆچوونێن رێڤەبەریێن پەیوەندیدار بڕیار بۆ تەرخانكرنا ئەردی بۆ ٢٠ كارگەهان د بیاڤێن (بەرهەمئینانا نایلۆنی، دوبارە بەرهەمئینانا زەیتێ، بەرهەمئینانا دارتاشیێ، بۆڕیێن ئاسنی، پەمبیێ نۆشداری، مۆبیلیاتێن پلاستیكی، بەرهەمئینانا قێرێ شل، دروستكرنا تانكێن پلاستیكی، بەرهەمئینانا كەرەستێن ئاڤاهیان و سیرامیكی، هەروەسا بەرهەمئینانا كاربۆناتێن كالسیومی، گێچێ و كلینسان) هاتە تەرخانكرن و دەلیڤەیێن كاری بۆ پتر ژ ٦٠٠ كەسان دێ هێنە پەیدا كرن.