پشتی فیدراسیۆنا تەپا پێی یا ئیراقێ ب فەرمی راگەهاندی كو هەڤڕكیێن گەڕا پێنجێ ژ خولا پیشەكاران ژ 12ێ هەتا 22ێ ڤێ مەهێ بهێتە راوەستاندن ل دووڤ بەرنامەیێ فیدراسیۆنا تەپا پێی یا فیفایی ژبۆ ئەنجامدانا یاریێن هەلبژارتیێن جیهانی د ڤاڤارتنێن كۆپا یێن مۆندیالا 2026 یێن هەمی كێشوەرێن جیهانی دا، ئەڤ راوەستیانە وەكو وێستگەهەك بۆ یانەیێن ئیراقێ ب گشتی و كوردستانێ ب تایبەت هاتە دانان ژبۆ زێدەتر خوە بەرهەڤكرن بۆ یاریێن داهاتی یێن خولێ، یانەیێن دهۆك و زاخۆ چەند مفا ژێ وەرگرتییە تایبەت پشتی ئەنجامدانا یاریێن هەڤالینی و چەند مفا ژێ وەرگرتییە، رۆژنامەیا ئەڤرۆ بووچوونێن جودا بڤی رەنگی وەرگرتینە.
ل دەستپێكێ سلێمان رەمەزان راهێنەرێ تیما یانەیا دهۆك گۆت: راوەستیانا خولێ ب گشتی بۆ هەمی یانەیان یا باش بوو ژبەركو د ماوەیێ چار یاریێن بۆری دا كڤاشتنەكا مەزن ل سەر یاریزانان هەبوویە، د ماوەیێ بۆری یێ راوەستیانێ دا مە چەندین پلان و گوهۆڕین پەیدا دكرن ژبۆ زێدەتر بهێزكرنا رێزێن تیمێ و دووڤچوونا هەر كێماسیەكێ، یاریێن خولێ كاریگەرییا سترێسێ ل سەر جەستەییا یاریزانی پەیدادكربوو ژبەركو هەر چار رۆژان یارییەك هەبوو، لێ پاشئێخستنا خولێ وەكو وێستگەهـ بۆ تیمێ ژلایێ بهێنڤەدانێ و ڤەگەڕاندنا جەستەییا یاریزانی و دۆبارە راوەستیان ل سەر خالێن كێماسی و هێزا تیمێ هاتە كرن ئەڤچەندە هەمی یانەیان مفا ژێ وەرگرتیە، وەكو تیما دهۆكێ ب هیڤی نە و رژدین بۆ یاریێن داهاتی بەردەوامیێ بدەینە ئاست و ئەنجامێن باش و گەشبینم دگەل پشتەڤانی و هاریكارییا كارگێرییا یانەیێ و پشتەڤانییا مەعنەوی یا جەماوەری بەردەوامیێ بدەینە ئەنجامێن دلخوەشكەر.
حەمید ئیسماعیل رێڤەبەرێ تیما زاخۆ گۆت: ب شێوەكێ جودا و پێكهاتییەكێ نوو تیما مە هاتبوو دناڤ خولێ دا و پشتی بۆرینا چار یارییان ژی تیما مە ئێك ژ هەڤڕكێن بهێزە، هەرچەندە كادرێ راهێنانێ و پرانییا یاریزانان نوو هاتینە لەوما دەمەك بۆ دڤیا، سەرباری سێ وەكهەڤی هاتینە ژ چار یارییان لێ ئەگەرێ سەرەكی یێ ڤان ئەنجامان ڤەدگەڕێتە بێ چەنسییا تیمێ لێ دبینم تیما مە بۆ یاریێن بهێت دێ باشتر و بهێزتر بیت، راوەستیانا خولێ د بەرژوەندییا هەمی تیمان دا وەكو یانەیا زاخۆ د ماوەیێ بۆری دا كار ل سەر چارەسەركرنا ئەوان خالێن لاوازی هاتیەكرن، جەماوەرێ زاخۆ كۆپیتكا وەفاداریێ یە بۆ تیما خوە و رەوشا خولا ستێرێن ئیراقێ یە كو هەمی شرۆڤەكار و خەلكێ ئیراقێ و عەرەبی سەرسۆرمانكرینە، نە بتنێ هژمارە 12نە بەلكو هژمارە ئێكن ل سەر ئاستێ ئیراقێ، بۆ یاریێن بهێت دێ بەردەوامبن ل سەر ئێكەمینا خوە.
ل دووماهیێ وەحید رەشید شرۆڤەكارێ وەرزشی ل پارێزگەها دهۆكێ گۆت: د ماوەیێ هەر چار یاریێن بۆری دا ئەنجام و ئاستێ تیما دهۆكێ گەلەك د باش بوون و یاریزانێن خودان شیان ل هەمی هێلان هەبوون ئانكو چو كێماسی ژلایێ یاریزانان نەبووینە دبیت هندەك خەلەتیێن تەكتیكی هەبن ئەوژی هەبوونا هنگاڤتنان یان ژی وەستیانا یاریزانان بووینە و هەكە خەلەتی ژی هەبن ئەو راهێنەر شارەزاییە و دووڤچوونەكا باش یا كری، ب دیتنا من دڤێت تیما دهۆكێ بەردەوامیێ بدەتە ئاستێ خوە تایبەت دەمێ گڤاشتن ل سەر دهێتە كرن و یا سەركەفتی هەرزوو پاشڤەنەچیتە هێلا بەرەڤانیێ و دەلیڤێ بۆ تیما هەڤڕك پەیدا بكەت، دبینم بۆ یاریێن بهێت دێ باشتر بیت و بەردەوامیێ دەتە ئەنجامێن خوە، ژلایەكێ دووڤە ل سەر یانەیا زاخۆ ئەو ئاست و ئەنجامێن وان یا چاڤەڕێ كری نەبوو سەرباری كوهۆڕینێن مەزن كربوون ژ كادرێ راهێنانێ هەتا هەمی یاریزان ئەڤە ژی دەم بۆ دڤییا هەتا بگەهنە ئاستێ پێدڤی، ب دیتنا من ئەڤ راوەستییانە بۆ زاخۆ گەلەك باش بوو و دبیت مفایەكێ پراكتیكی ژی وەربگریت، بۆ یاریێن بهێت تەلال ئەلبلوشی چو بوهانە نامینن ژبەركو یاریزانێن خودان شیان هەنە و كارگێرییا یانەیێ پشتەڤانە وجەماوەرەكێ مەزن هەیە، ب گشتی بۆ هەردو یانەیێن پارێزگەهێ دەلیڤەكا زێرین دا بوون پێخەمەت چارەسەركرنا كێماسییان، ب هیڤییا سەركەفتنێ بۆ یانەیێن كوردستانی د خولا ئیراقێ دا.
راوەستیانا خولێ دەلیڤەكا زێرین بۆ یانەیێن دهۆك و زاخۆ پەیداكر
نيشاندان